Syaꞌilal Conobꞌ Israel Jix Yalel Naj Oseas
9
Jex wet Israelal, cꞌam ojabꞌ chex tzala tinaniꞌ,cꞌam ojabꞌ chex a tꞌujna yu tzalacꞌulal jaxca chi yun ebꞌ txꞌoj conobꞌal, yutol jix je bꞌejcan je Diosal, jaxca chi yun sbꞌejoncan yichamil ebꞌ ix amul ix. Caw chex tzala je txꞌoxon je camcꞌulal tet jun comon dios chi yij Baal, yutol watxꞌ chi yun sat je yawo yu je yaloni.
2 Yu cꞌal jun tiꞌ, yuxan txenne je tiriw yetoj je yal uva oj je yambꞌa ocoj. Jantaj yal an acꞌ uva oj je yambꞌa, manxa oj yabꞌ je yuqꞌueni.
3 Manxa cꞌal oj skeꞌ je yecꞌabꞌ bꞌey sconobꞌ Jehová. Oj jex meltzotoj bꞌey txꞌotxꞌ Egipto junelxa. Jaꞌ bꞌey conobꞌ Asiria, jaꞌ tituꞌ oj je loꞌ wan loꞌbꞌe tol ey sowalil yu ley.
4 Manxa oj skeꞌ je yakꞌon je yal uva yin ofrendail yu je yiꞌon a can sbꞌi Jehová, manxa oj ẍaꞌ je xaambꞌal tuꞌ. Jaꞌ loꞌbꞌe oj je loꞌ jaxca loꞌbꞌe chi loꞌle yet ey camich, yuxan jaꞌ mac oj loꞌon oj, man watxꞌoj chi yun can jaxca yalon ley. Oj ecꞌ swail ebꞌ yu, asan xin man oj skeꞌ yiꞌontoj ebꞌ bꞌey stemplo Jehová.
5 ¿Tzet oj yun ebꞌ yet scꞌual kꞌin, jaꞌton wan kꞌin yet Jehová?
6 Ta oj ela ebꞌ tet jun syaꞌilal oj jul tuꞌ. Jaxa ebꞌ a Egipto oj yambꞌantoj ebꞌ. Jaꞌ bꞌey conobꞌ Menfis oj mujle ebꞌ. Jaꞌ bꞌey yaman sbꞌeomal ebꞌ, cꞌal bꞌey ey scalubꞌal ebꞌ, oj chꞌibꞌa an cꞌultaj cꞌal teꞌ qꞌuix.
7 Jaꞌ tinaniꞌ, tuxa jix apni oc scꞌual sjul syaꞌilal je yibꞌan. Tuxa jix apni oc scꞌual yet che chaꞌon je tool jaxca wal smooal je chaꞌoni. Jex Israel, oj je yabꞌ syaꞌil yu jun syaꞌilal tuꞌ. Oj je yalon jaxca tiꞌ: Jaꞌ jun ẍejabꞌ Dios tuꞌ, caw cꞌam snaꞌbꞌal. Jaꞌ jun mac ijbꞌabꞌil yu Yespíritu Dios tiꞌ, tuxa jix oc locoal, je chi. Che yal jaxca tiꞌ, yutol chi al-le je penail yu ebꞌ, yuxan chi chichon oc je cꞌul yin ebꞌ.
8 Jaꞌ Dios jix yaoc ẍejabꞌ yet chi teynele conobꞌ Israel; jal ebꞌ ánima tuꞌ chi swaꞌnen ey yaal ebꞌ yul-laj bꞌe sattaj jun eyoc steynemaloj tuꞌ. Tol tax chi chichon oc scꞌul ebꞌ yin stemplo Dios.
9 Jix etex xacꞌal el ebꞌ yin junelne, jaxca jix yun bꞌey conobꞌ Guibeá.a Yuxan jaꞌ Jehová, oj naꞌontej spenail ebꞌ tuꞌ, catuꞌ oj ale oc syaꞌilal yibꞌan ebꞌ yu spenail tuꞌ.
Oj Yabꞌ Syaꞌilal Ebꞌ Israel Yu Spenail
10 Chi yalon Jehová jaxca tiꞌ: Jaꞌ yet jix jin chaꞌlen jin bꞌa yetoj Israel, caw jix tzala a jin cꞌul, jaxca junoj mactxequel chi chaꞌlo an uva yu bꞌey txꞌotxꞌ cusiltaj txꞌotxꞌ. Jaꞌ ebꞌ je mam icham, jaxca wal higo chi pet eloloj, queytuꞌ yeoc ebꞌ yul jin sat. Jaxa yet jix apni oc ebꞌ bꞌey Baal-peor xin, jix yiꞌey sbꞌa ebꞌ yin eyilal tet Baal, yuxan caw yaabꞌetaj jix yute sbꞌa ebꞌ jaxca jun comon dios jix scamcꞌulne ebꞌ tuꞌ.
11 Jaꞌ smimanbꞌilal conobꞌ Israel, tucꞌal oj qꞌueya jaxca chi yun stoo jenenoj junoj tzꞌiquin. Cꞌamxa cꞌal unin oj aloj, cꞌamxa junoj ebꞌ ix ix oj yijoc yuneꞌ, cꞌamxa cꞌal unin oj il-le chꞌibꞌoj.
12 Caxcꞌal mi eyto bꞌey oj chꞌibꞌa unin xin, jain xa oj wiꞌecꞌ tet ebꞌ. Cꞌamxa cꞌal junoj oj wakꞌcanoj. Okꞌbꞌal cꞌul ebꞌ ánima tuꞌ, yet oj jin el scꞌatan ebꞌ an.
13 Jaꞌ yet jix wilon conobꞌ Israel, laan yili jaxca junoj teꞌ palma,b awbꞌil bꞌey yaax sat txꞌotxꞌ, queytuꞌ yeoc ebꞌ jix wilaꞌ. Jal pax tinaniꞌ xin, oj yiꞌeltej yuninal ebꞌ yet chi makꞌle camoj, ẍi Jehová.
14 Jaach Jehová jin Diosal, ¿tzet smoo jin kꞌanon ey jaach yu wan ánima tiꞌ? Watxꞌ mi, ta ey ebꞌ ix ix cꞌam unin chi yilaꞌ. Ta ey ebꞌ ix ey yuneꞌ xin, watxꞌ mi, ta cꞌam yal yim ebꞌ ix yet watxꞌ cam yuneꞌ ebꞌ ix chi yakꞌ txutxwoj.
Sjowal Scꞌul Jehová Yin Conobꞌ Israel
15 Jix yalon Jehová jaxca tiꞌ: Jaꞌ bꞌey Guilgal jix ẍaꞌel yich yunen spenail ebꞌ, yuxan jaꞌcꞌal pax tituꞌ jix el yich stit jin jowal yin ebꞌ. Jaꞌ yu masanil spenail chi yun ebꞌ, yuxan oj wiꞌeltoj ebꞌ yul jin na. Manxa oj jin camcꞌulne ebꞌ, yutol jaꞌ masanil ebꞌ syaawil ebꞌ, yel xacꞌal pit chi yute sbꞌa ebꞌ.
16 Jal ebꞌ conobꞌ Israel xin, yasinajxatoj ebꞌ. Laan ebꞌ jaxca junoj teꞌ teꞌ tol tajin xa xeꞌ, cꞌamxa chi yakꞌ sat. Caxcꞌal ey yuninal ebꞌ, jain oj wakꞌ cam yuninal ebꞌ camcꞌulnebꞌil yu tuꞌ, ẍi Jehová.
17 Jaꞌ jun conobꞌ tiꞌ, junelne cꞌam chi ẍaꞌ yabꞌ tzet chi yal jin Diosal. Yuxan oj intajnele el ebꞌ yu Dios, tuxa cꞌal oj ecꞌabꞌtoj ebꞌ bꞌey yul-laj txꞌoj conobꞌal.