2 Caxcꞌal chi yal ebꞌ ey jin jaxca tiꞌ: Cu Diosal jaach, caw jix jaach kotajne eloj, caxcꞌal ẍi ebꞌ.

3 Yutol jaꞌ ebꞌ Israel tiꞌ, tuxa jix yintajne el tzetyetal watxꞌ ebꞌ, yuxan oj ujtele ebꞌ yu scajat.

4 Jaꞌ yet chi yaon oc sreyal ebꞌ, cꞌam chi skꞌanle ebꞌ ey jin. Jaꞌ yetoj splata ebꞌ, cꞌal chꞌen oro ey tet ebꞌ, jix swaꞌne a sdiosal ebꞌ, jacꞌal oc wan tuꞌ oj iꞌontej yibꞌan ebꞌ.

5 Caw yaabꞌetaj yili jun yechel wacax waꞌnebꞌil yu ebꞌ tuꞌ, jaꞌton jun bꞌey chi oc ebꞌ a Samaria yin eyilal, yu jun tuꞌ, yuxan oj tit sjowal jin cꞌul yin ebꞌ. ¿Bꞌakꞌin wal oj sbꞌej ebꞌ Israel yunen jun spenail tuꞌ?

6 Jaꞌ jun yechel wacax tuꞌ, man dios oj. Ánima jix waꞌnen eyoj, yuxan kocꞌ xacꞌal oj yun smakꞌle poꞌotoj.

7 Yu spenail jix yun ebꞌ tuꞌ, yuxan caw miman syaꞌilal oj jul yibꞌan ebꞌ. Cꞌam niꞌoj tzet oj syambꞌa ebꞌ yin yawo awbꞌil yu, cꞌam jarina oj yiꞌ ebꞌ yin sjolom stiriw. Caxcꞌal mi ey niꞌoj chi yiꞌ ebꞌ, jaꞌ ebꞌ txꞌoj conobꞌal oj loꞌon eytoj tet ebꞌ.

8 Jaꞌ conobꞌ Israel, oj akꞌle lawoj. Cꞌamxa niꞌoj yeloc apnoj jun conobꞌ tiꞌ yul sat wanojxa conobꞌ.

9 Caw cꞌam niꞌoj snaꞌbꞌal ebꞌ. Laan xacꞌal ebꞌ jaxca junoj noꞌ xol-laj teꞌal bꞌuru, jaxa cꞌal chi naꞌon bꞌey chi caꞌ stoocoj. Jaꞌ ebꞌ conobꞌ Israel, jix too ebꞌ skꞌan scolwal Asiria yetoj. Jix toolane mac chi colwa yetoj.

10 Caxcꞌal chi stoolane wanxa nación yet chi col-le yu ebꞌ, jain Jehová jin oj jin yambꞌa oc ebꞌ, catuꞌ oj wakꞌon yabꞌ syaꞌil ebꞌ, yu junoj rey oj etnen ebꞌ.

11 Jaꞌ ebꞌ conobꞌ Israel, caw ecꞌal wan yet xaambꞌal oj swaꞌne a yu yelcan spenail ebꞌ yaloni, yu cꞌal wan yet xaambꞌal chi swaꞌne ebꞌ tuꞌ, yuxan chi a can yaon oc spenail ebꞌ jin sattaj.

12 Caxcꞌal caw miman cuybꞌanile jix wakꞌ tzꞌibꞌele tet ebꞌ, caw comon kꞌane cꞌal jix yun can yul sat ebꞌ.

13 Chi yakꞌ xaambꞌal ebꞌ ey jin, catuꞌ chi ẍiꞌon ebꞌ, cꞌam chin tzala yetoj ebꞌ. Naꞌan cꞌal spenail ebꞌ tuꞌ wu an, yuxan oj waon oc syaꞌilal yibꞌan ebꞌ. Oj wakꞌon meltzo ebꞌ junelxa bꞌey Egipto.

14 Jaꞌ ebꞌ Israel, caw ecꞌal wan spalacio ebꞌ rey jix swaꞌne a ebꞌ; manxa naꞌanoj jin yu ebꞌ, tol jain pax jix jin waꞌne ebꞌ. Jaꞌ ebꞌ a Judá, caw ecꞌal wan conobꞌ eyoc smuroal jix swaꞌne aoj, jain oj waoc skꞌakꞌal wan conobꞌ tuꞌ yetoj scuartel ebꞌ, ẍi Jehová.