7
Jaꞌ yet lalan wanten jin conobꞌ Israel, cꞌal Samaria,jaꞌ yet tuꞌ jix txeclo a syaabꞌetajil, cꞌal spenail ebꞌ. Yutol jun laan xacꞌal chi yun sbꞌeybꞌalnen lekꞌtiꞌal ebꞌ. Elkꞌom xacꞌal el masanil ebꞌ. Tol tꞌinan xacꞌal yoc ebꞌ yin elkꞌan yul-laj na, cꞌal bꞌey yul-laj scalleal conobꞌ chi oc ebꞌ elkꞌan yinlaj ánima.
2 Junelne cꞌamxa chi snaꞌ niꞌoj ebꞌ, ta tol tꞌanan jin oc yin spenail ebꞌ tuꞌ. Jaꞌ tinaniꞌ jaꞌ spenail ebꞌ tuꞌ, tol joyanxa oc yinlaj ebꞌ jaxca junoj colal, yutol txequel yeoc spenail ebꞌ tuꞌ jin sattaj.
Spenail Ebꞌ Eyoc Yin Yopiso
3 Jaꞌ ebꞌ rey yetoj ebꞌ yaaw, caw chi tzala ebꞌ yunen spenail cꞌal yin yetnen yet animail ebꞌ.
4 Amul xacꞌal el masanil ebꞌ. Jaꞌ yochwan ebꞌ tuꞌ, laan jaxca junoj jorna cꞌamto chi oc mimanoj skꞌakꞌal yu junoj waꞌnem pan yajbꞌan chi paabꞌi ixim jarina; jaꞌ yet tuxa chi paabꞌi ixim tuꞌ xin, catuꞌ chi oc skꞌakꞌal sicꞌlebꞌil.
5 Jaꞌ yet chi oc kꞌin yu naj rey, jaꞌ ebꞌ ey yopiso yetoj naj, chi yucꞌ an ebꞌ, chi yakꞌon an ebꞌ tet naj masantaꞌcꞌal chi a teꞌ an tuꞌ sjolom naj yetoj ebꞌ. Comon xacꞌal chi tzala naj yetoj ebꞌ yet chi bꞌuchwa ebꞌ yin naj.
6 Jaxa cꞌal pena naꞌbꞌale eyoc yin snaꞌbꞌal ebꞌ. Laan sjowal ebꞌ jaxca skꞌakꞌal junoj jorna eyoc skꞌakꞌal masanil akꞌbꞌal, catuꞌ chi xuꞌle cajbꞌoj skꞌakꞌal yet chi kꞌinibꞌi a yet junxa cꞌu.
7 Masanil ebꞌ tuꞌ, laan ebꞌ jaxca sjowal skꞌakꞌal junoj jorna, jix akꞌle lawoj ey ebꞌ yet yaawil yu sjowal scꞌul ebꞌ. Pilan jix cam masanil ebꞌ rey yu ebꞌ, cꞌamxa junoj ebꞌ chi yal sbꞌa ey jin.
Jix Sbꞌejcan Sdiosal Ebꞌ Conobꞌ Israel
8 Jaꞌ ebꞌ Israel, tuxa jix scaltoj sbꞌa ebꞌ xol wanxa txꞌoj conobꞌal. Laan xacꞌal ebꞌ jaxca junoj ixim paat ma meltzo yul saam.
9 Jaꞌ ebꞌ txꞌoj conobꞌal jix akꞌon lawoj ey yipal ebꞌ, junelne cꞌam chi yiltej sbꞌa ebꞌ. Jix sajbꞌi el xil sjolom ebꞌ, cꞌamxa cꞌal chi yiltej sbꞌa ebꞌ.
10 Jaꞌ smeynebꞌail ebꞌ Israel chi txꞌoxon el spenail ebꞌ. Caxcꞌal mi jaxca tuꞌ yeoc ebꞌ, cꞌam cꞌaltaꞌ chi snaꞌ sbꞌa scꞌul ebꞌ yet chi meltzotej ebꞌ jin cꞌatan, jain Jehová sDiosal jin ebꞌ tiꞌ.
11 Jaꞌ conobꞌ Israel, laan jaxca junoj noꞌ uch cꞌam snaꞌbꞌal, tucꞌal chi qꞌueyecꞌoj. Jun txolan chi too skꞌan colwal bꞌey Egipto, jaꞌ yet junxa txolan xin, chi too pax skꞌanon colwal bꞌey Asiria.
12 Jaꞌ yet oj toj ebꞌ tituꞌ, oj jin kꞌojtoj jin txꞌan yaal yibꞌan ebꞌ. Oj eyqꞌuey ebꞌ jaxca chi yun yeyqꞌuey junoj noꞌ tzꞌiquin. Oj waoc syaꞌilal yibꞌan ebꞌ, jaxca jix yun yal-le tet ebꞌ bꞌey jix syambꞌa sbꞌa ebꞌ.
13 Okꞌbꞌal cꞌul ebꞌ, yutol jix jin sbꞌejcan ebꞌ. Oj michꞌcha ebꞌ yu syaꞌilal oj jul yibꞌan ebꞌ, yutol jix oc spitalil ebꞌ ey jin. Chi woche chin colel ebꞌ; asan cꞌal pax lekꞌtiꞌal chi yal ebꞌ win.
14 Man yetoj masanil scꞌul ebꞌ chin yawte ebꞌ yet chi el yaw ebꞌ bꞌey sat xꞌat. Chi syambꞌa sbꞌa ebꞌ, catuꞌ chi skꞌanon ebꞌ tol watxꞌ chi yun yawo tiriw, cꞌal yuva ebꞌ, caw jacꞌalaꞌ pax spitnen sbꞌa ebꞌ ey jin.
15 Jix wakꞌ scuybꞌanil ebꞌ, jix wakꞌon cꞌal pax yipal ebꞌ; asan cꞌal pax spenail chi snaꞌoc ebꞌ win.
16 Chi meltzo ebꞌ; cꞌamxa chi jul ebꞌ jin cꞌatan, jain tol Miman Weloc Apnoj tiꞌ. Jaxca junoj julbꞌal tol cotxan, cꞌam chi michꞌcha tzetyetal chi jul-le yetoj, queytuꞌ ebꞌ. Jaꞌ yu skꞌane ebꞌ syaawil chi yal yin meynebꞌail, yuxan oj eyqꞌuey ebꞌ yu chꞌen espada. Jal ebꞌ a Egipto xin, tuxa cꞌal oj bꞌuchwatej ebꞌ yin ebꞌ.