Oj Snaꞌ Sbꞌa Scꞌul Ebꞌ Israel
6
Oj yal ebꞌ conobꞌ jaxca tiꞌ: Titanwej, meltzojonwej cu masanil bꞌey Jehová.Jaꞌ jix cu kocꞌtzilnentoj, jaꞌ tinaniꞌ oj cu yante pax oj. Jix cu yakꞌ yasoj, catuꞌ oj yante pax cu yasil tuꞌ.
2 Jaꞌ yet oj ecꞌ can el caabꞌoj cꞌual, catuꞌ oj yakꞌon pax cu cawil. Jaxa yet yox cꞌual, oj cu pitzcꞌunele aoj, oj cu iquisbꞌoj ecꞌ sattaj Jehová junelxa.
3 Kakꞌwej kip kotajnewej el Jehová. Yutol tꞌinan cꞌaltaꞌ ye tol oj colwa Naj ketoj, jaxca chi yun kotajne eloj tol tꞌinan oj sajbꞌoj yet skꞌinibꞌalil. Oj tit sajil yichcan kibꞌan jaxca chi yun stit yaxnabꞌ bꞌey sat txꞌotxꞌ txꞌotxꞌ yet bꞌabꞌel nabꞌ, cꞌal yet slawubꞌal naꞌbꞌil kꞌinal, ẍi ebꞌ conobꞌ.
Spajtzebꞌal Oj Yakꞌ Jehová Tet Ebꞌ
4 Jix yalon Jehová jaxca tiꞌ: ¿Tzet watxꞌ oj wun je yetoj jex a Israel? ¿Tzet watxꞌ oj wun je yetoj jex a Judá? Jaꞌ je camcꞌulal win, laan jaxca asun yet skꞌinibꞌalil, jaxca yal akꞌbꞌal yet eyto sajbꞌi, jaxa yet chi kꞌinibꞌi aoj, catuꞌ chi qꞌueyaoj.
5 Yuxan jix jex wakꞌ qꞌueyeloj, jaxca jix yun wakꞌon yal ebꞌ jin chejabꞌ ey jex. Jaꞌ yu jin kꞌane, jix jex wakꞌ qꞌueyeloj. Caw txequel jix yun waon oc syaꞌilal je yibꞌan jaxca yajan cꞌu.
6 Jaꞌ tzet chi woche che yunne, tol chi okꞌ je cꞌul yin je yet animail, cꞌal jin je yotajnen eloj, tol je Diosal jin, yintaj pax yet che yakꞌon tzꞌaꞌ xaambꞌal ey jin an.
7 Jaꞌ jun jin conobꞌ tiꞌ, jix yintajne el tzet chi yal jin wa kꞌane jaxca jix yun Adán. Pena jix yute sbꞌa ey jin.
8 Jaꞌ ebꞌ ánima bꞌey conobꞌ Galaad, caw wal yaxkꞌainaj ebꞌ, chicꞌ xacꞌal chi ecꞌ can yu ebꞌ tituꞌ.
9 Jaꞌ ebꞌ yakꞌomal xaambꞌal, laan yeoc ebꞌ jaxca junoj bꞌulan elkꞌom. Chi majwa ebꞌ yin ebꞌ ánima yet chi smakꞌon camoj. Jaꞌ bꞌey sbꞌeal Siquem chi makꞌwi cam ánima ebꞌ, cꞌal yunen masanil spenail ebꞌ.
10 Caw yaabꞌetajxa yili ebꞌ Israel tuꞌ chi wilaꞌ. Jaꞌ ebꞌ a Israel eyoc yin amulal; jix yetnetoj sbꞌa ebꞌ yu spenail.
11 Yetoj cꞌal pax jex a Judá, tuxa jix walaꞌ tzet cꞌual oj waoc syaꞌilal je yibꞌan.
Chi woche chin qꞌuex tzetyetal eyoc yibꞌan jin conobꞌ Israel.