5
Jex conobꞌ Israel, yetoj jex yakꞌomal xaambꞌal, abꞌwej tzet chi walaꞌ,che majon je yabꞌ jaex yicꞌaal ebꞌ rey: Jaꞌ je yibꞌan jaex tiꞌ oj oc jun syaꞌilal tiꞌ, yutol jaex tiꞌ, jaxca wal junoj yaal je yeoc bꞌey Mizpá, jaxca junoj txꞌan yaal je ye cꞌal pax oc bꞌey sjolom txꞌotxꞌ wonan Tabor.
2 Caw ecꞌal ánima jix je makꞌ camoj, yuxan oj waoc syaꞌilal je yibꞌan.
3 Wotaj tzet utbꞌil yeoc Efraín, tumi man otajbꞌiloj Israel tuꞌ wu che naꞌ. Jix oc conobꞌ Efraín tuꞌ yin amulal, jacꞌal ton conobꞌ Israel jix yetnetoj sbꞌa yin bꞌeybꞌale caw yaabꞌetaj yul jin sat.
4 Jaꞌ yu spena bꞌeybꞌal ebꞌ conobꞌ tuꞌ, yuxan cꞌam chi skeꞌ meltzotej ebꞌ ey jin. Chi yiꞌey sbꞌa ebꞌ yin eyilal tet comon dios, yuxan cꞌamxa chin naꞌletej yu ebꞌ.
5 Jaꞌ smeynebꞌail ebꞌ Israel chi txꞌoxon el spenail ebꞌ ey jin. Jal conobꞌ Efraín tuꞌ xin, jaꞌ yin spenail tuꞌ chi telcꞌotoj. Laan xacꞌal oj yun yeyqꞌuey Judá yetoj ebꞌ.
6 Ey jun cꞌual oj jin seyle ecꞌ yu ebꞌ jaxca chi yun seyon smeꞌ ebꞌ cꞌal yetoj swacax ebꞌ chi yakꞌ yin xaambꞌalil; manxa cꞌal oj jin ilcha oc yu ebꞌ, yutol tuxa jix wiꞌel jin bꞌa xol ebꞌ.
7 Yutol caw pena jix yute sbꞌa ebꞌ ey jin, jaxca junoj ix ix ey yuneꞌ, tol txꞌoj smam yu, queytuꞌ yeoc ebꞌ. Yu jun tuꞌ, yuxan yin junne xꞌaaw oj yun sqꞌueyle el ebꞌ yetoj masanil xꞌotxꞌ.
Syaꞌilal Conobꞌ Israel Yetoj Conobꞌ Judá
8 Xuꞌle ojabꞌ noꞌ cacho yet jowal bꞌey Guibeá, catuꞌ xuꞌle ojabꞌ chꞌen trompeta bꞌey Ramá. Awanwej bꞌey Bet-avén, ey ojabꞌ xiwcꞌulal xol ebꞌ ánima yet Benjamín.
9 Chi wal xol masanil ebꞌ yicꞌaal Israel, tzetyetal tol sowalil oj jul yibꞌan ebꞌ: Jaꞌ conobꞌ Efraín, caw oj lawoj ey yet oj jul jun scꞌual syaꞌilal tuꞌ, ẍi Dios.
10 Chi yalon Jehová: Jaꞌ ebꞌ syaawil soldado bꞌey Judá, laan ebꞌ jaxca wan ánima tol chi lacwi ecꞌ smoonal txꞌotxꞌ, yuxan jain oj wakꞌ lawoj ey ebꞌ yetoj sjowal jin cꞌul.
11 Jaꞌ conobꞌ Efraín tiꞌ, tuxa oj jul yibꞌan. Cꞌamxa smajul, yutol jix ya xacꞌal oc yin scꞌul stoo tzajan yintaj wan comon dios cꞌam chi skeꞌ colwai.
12 Jain chi wetnetoj conobꞌ Efraín jaxca chi yun yoc noꞌ ii yin junoj jinat. Chi wetne cꞌal pax toj conobꞌ Judá jaxca noꞌ kꞌisaj.
13 Jaꞌ yet oj yilon conobꞌ Efraín tol yaꞌey, catuꞌ oj yilon cꞌal pax Judá tol yasil, oj tojcan conobꞌ Efraín bꞌey Asiria, oj skꞌanon scolwal jun rey bꞌinabꞌil yin yakꞌwi jowal; ma skeꞌ yu jun rey tuꞌ yakꞌon waꞌxoj scꞌul, tam wal yanten bꞌey yasil tuꞌ.
14 Jaxca chi yun smajwa junoj noꞌ bꞌalam, jaxca tuꞌ oj yun jin majwa yin Efraín, cꞌal yin conobꞌ Judá. Jain oj jin kocꞌ tzilnecantoj ebꞌ, catuꞌ oj jin eloj. Jain oj jin tzakꞌa ebꞌ, cꞌam junoj mactxequel oj skeꞌ scolon el ebꞌ yul jin kꞌabꞌ.
15 Catuꞌ oj jin meltzotej yin eymanil bꞌey caan jin, masantaꞌcꞌal oj yotajne el spenail ebꞌ, catuꞌ oj jul ebꞌ jin seyon ecꞌoj. Jaꞌ snan xol syaꞌilal ebꞌ tuꞌ, oj jin seyle ecꞌ yu ebꞌ yin masanil scꞌul, ẍi Jehová.