Chi Txali Naj Oseas Tol Chi Meltzo Ebꞌ Conobꞌ Israel Bꞌey Jehová
14
Jex wet Israelal, meltzaanwej yul skꞌabꞌ Jehová cu Diosal.Caxcꞌal jix jex eyqꞌuey yu je penail,
2 meltzaanwej bꞌey Jehová, catuꞌ chex txali tet Naj jaxca tiꞌ: Akꞌ tan el cu penail jon, catuꞌ cha chaꞌon cu eyilal jon, cꞌal cu watxꞌ kꞌane chi kal ey jaach.
3 Jaꞌ Asiria cꞌam chi skeꞌ cu col-le el yu. Tam wal oj skeꞌ cu col-le yu noꞌ che yet jowal. Ma xacꞌal kaloc cu diosaloj wan tzetyetal chi cu waꞌne ey yetoj cu kꞌabꞌ jon, yutol asanne ja win, jaach Jehová, chi yiꞌ smimanil scꞌul ebꞌ unin cꞌamxa smam, xutx.
Jaꞌ Jehová Oj Akꞌon Scawil Ebꞌ Israel
4 Chi yalon Jehová jaxca tiꞌ: Oj wakꞌ jichlo oc snaꞌbꞌal ebꞌ jin conobꞌ tol pit yeoc snaꞌbꞌal. Caxcꞌal man smoo oj ebꞌ, oj jin camcꞌulne cꞌaltaꞌ ebꞌ, yutol manxa oj waoc sjowal jin cꞌul yin ebꞌ.
5 Jaxca chi yun xumac an chochol yu yal akꞌbꞌal, ma jaxca teꞌ kꞌuteꞌ bꞌey sjolomlaj txꞌotxꞌ wonan Líbano, tol naat chi too xeꞌ, queytuꞌ oj wute ebꞌ Israel tiꞌ.
6 Yuxan txꞌojxa swatxꞌil yel kꞌuyan jaxca skꞌabꞌlaj teꞌ olivo, catuꞌ laan yoc sabꞌ jaxca yoc sabꞌ teꞌ kꞌuteꞌ bꞌey Líbano.
7 Oj jin yaoc ebꞌ yipoj scꞌul junelxa. Watxꞌ xacꞌal oj yun ẍꞌibꞌ ebꞌ jaxca chi yun ẍꞌibꞌ ixim tiriw, watxꞌ xacꞌal xumacli jaxca teꞌ uva, caw bꞌinabꞌil oj yun jaxca teꞌ yal uva chi tit bꞌey Líbano.
8 Jex a Israel, tumi ey yopiso wan comon dios tuꞌ. Jain oj jin takꞌwoj ey jex, cꞌal jex jin teyneni. Jaxca junoj teꞌ taa tol yaax xaj, queytuꞌ weoc je yu. Wu cꞌal an, yuxan chex a can, ẍi Jehová.
Slawubꞌal
9 Jaꞌ ebꞌ jelan, cꞌal ebꞌ ey snaꞌbꞌal, oj naꞌcha el wan jin kꞌane tiꞌ yu ebꞌ. Jaꞌ jun bꞌe chi yalte Jehová ey jon, caw jichan toni. Jaꞌ ebꞌ watxꞌ snaꞌbꞌal, chi too ebꞌ yul jun bꞌe tuꞌ; jal pax ebꞌ pit chi yute sbꞌa xin, chi telcꞌo a ebꞌ.