Eyto cꞌal oc oxwan rey bꞌey Persia, catuꞌ oj oc junxa yet scan rey. Jaꞌ jun tuꞌ yel xacꞌal caw bꞌeom yintaj ebꞌ oxwan tuꞌ. Jaꞌ yu sbꞌeomal tuꞌ, yuxan oj yiꞌ yip ebꞌ soldado, catuꞌ oj yakꞌon jowal sicꞌlebꞌil yin sreyal Grecia. 3 Oj lawoj tuꞌ xin, oj oc pax sreyal Grecia tuꞌ yin jowal, yutol caw jelan yakꞌon jowal. Yel xacꞌal miman oj yun sbꞌeytoj bꞌey oj smajbꞌa oc sbꞌa yetoj yopiso, catuꞌ oj yunen masanil tzet oj yoche scꞌul. 4 Jaꞌ yet tuxa jix yiꞌ yip yopiso tuꞌ, canebꞌ tujan oj yun spoꞌochatoj. Jaꞌ yopiso jun rey tuꞌ, manxa oj bꞌey cꞌaltoj yin ebꞌ yicꞌaal, cꞌal yipal yopiso tuꞌ, manxa laan oj yetoj jaxca yet sbꞌabꞌelal. Yutol jix poꞌochatoj, catuꞌ txꞌojxa wanxa oj oc can yin reyal sqꞌuexeloj.

5 Jaꞌ jun sreyal sur yel xacꞌal oj yiꞌ yip yopiso, asan xin, jaꞌ junojxa ebꞌ sgeneral naj bꞌabꞌel rey tuꞌ, yel xacꞌal miman yopiso yintaj jun sreyal sur, catuꞌ oj yakꞌon yaawil yibꞌan jun miman conobꞌ. 6 Jaꞌ yet oj ecꞌ el jayebꞌoj abꞌil, jaꞌ ebꞌ cawan rey tuꞌ oj swaꞌne junoj swa kꞌane ebꞌ. Jaꞌ jun sreyal sur oj yatoj scutzꞌin tet sreyal norte, yet watxꞌ ja caabꞌ nación tuꞌ ey watxꞌcꞌulal snan xol caabꞌ mimej conobꞌ tuꞌ. Asan xin, man oj skeꞌ yiꞌon bꞌey jun wa kꞌane tuꞌ ix, tam wal yichamil ix, yu jun tuꞌ, yuxan oj makꞌle cam ix yetoj yichamil, cꞌal yuneꞌ, cꞌal ebꞌ yakꞌomal servil. 7 Asan xin, jaꞌ junoj ebꞌ yican ix oj oc yin reyal, catuꞌ oj yakꞌon jowal yetoj ebꞌ soldado yet norte tuꞌ. Oj eyqꞌuey ebꞌ yu, masantaꞌcꞌal oj eyqꞌuey sconobꞌ ebꞌ sreyal norte yu. 8 Yetoj cꞌal pax oj, oj yiꞌtoj bꞌey Egipto jantaj sdiosal ebꞌ tol waꞌnebꞌil yin chꞌen chꞌen, cꞌal chꞌen oro cꞌal plata chi kꞌanle bꞌey wan diosal ebꞌ tuꞌ. Oj ecꞌ el jayebꞌoj abꞌil yu ebꞌ, yin tol cꞌam jowal oj yakꞌ yetoj naj sreyal norte. 9 Oj lawoj tuꞌ xin, jaꞌ jun sreyal norte tuꞌ, oj yakꞌ jowal yin sreyal sur, man pax oj skeꞌ yu, catuꞌ oj meltzo bꞌey sconobꞌ tuꞌ junelxa.

10 Oj a waan ebꞌ scꞌaal naj sreyal norte, catuꞌ oj yakꞌon jowal ebꞌ, manxa jantajoj sbꞌisil soldado ebꞌ oj syambꞌa ocoj. Jaꞌ junoj ebꞌ tuꞌ, oj toj yetoj soldado yin yakꞌon eyqꞌuey sreyal sur yaloni. Oj ecꞌtoj ebꞌ jaxca junoj jaꞌ elom jaꞌ, catuꞌ oj yakꞌon jowal masantaꞌcꞌal oj apnoj oc yul sconobꞌ naj sreyal sur. 11 Jaꞌ yu jun tuꞌ, yel xacꞌal oj tit sjowal jun sreyal sur. Oj eltej yakꞌon jowal yin jun miman bꞌulan soldado tuꞌ, catuꞌ oj akꞌle lawoj el masanil ebꞌ yu. 12 Yutol oj cam jun miman bꞌulan ebꞌ scajat tuꞌ yu, oj smeyne sbꞌa, man pax naatil oj oc yin yopiso tuꞌ. 13 Jaꞌ yet oj ecꞌ el jayebꞌoj abꞌil, jaꞌ naj rey bꞌey norte tuꞌ, oj syambꞌa oc mimanoj soldado yintaj ebꞌ eyoc yet yalantoj, caw miman sbꞌisil ebꞌ soldado iꞌbꞌil oc smitxꞌkꞌabꞌ yet jowal yu, catuꞌ oj yakꞌon jowal yin naj sreyal sur, yet chi yakꞌon eyqꞌueyoj.

14 Jaꞌ yet tuꞌ, caw ey ebꞌ oj yaoc sbꞌa yetoj naj rey bꞌey norte tuꞌ, oj yakꞌon jowal yin sreyal sur. Jaꞌ xol ebꞌ tuꞌ ey wan ja wet conobꞌ Israel caw pena snaꞌbꞌal, oj yakꞌ jowal ebꞌ yin naj rey tuꞌ, yet chi eloc tzet jix ja wil yin ja weyich tuꞌ, asan xin, oj eyqꞌuey cꞌaltaꞌ ebꞌ. 15 Oj jul naj sreyal norte, catuꞌ oj oc joyan ebꞌ soldado yinlaj jun conobꞌ tol caw watxꞌ yeoc smuroal, catuꞌ oj eyqꞌuey yu ebꞌ. Jaꞌ ebꞌ soldado yet sur, manxa oj skeꞌ stecꞌbꞌan sbꞌa ebꞌ sattaj scajat tuꞌ. 16 Ja jun rey oj skeꞌ yakꞌon eyqꞌuey jun jowal tuꞌ, oj yun cꞌal tzet chi yoche scꞌul. Cꞌamxa mactxequel oj skeꞌ stecꞌbꞌan sbꞌa sattaj. Oj octoj bꞌey txꞌotxꞌ yel xacꞌal watxꞌ yili, jaꞌton conobꞌ Israel, catuꞌ oj yakꞌon qꞌueyel jantaj cꞌal tzet oj yoche scꞌul. 17 Caw oj yakꞌ yip yetoj ebꞌ soldado yet chi yakꞌon snaꞌbꞌaloj swaꞌnen oc sbꞌa yibꞌan jun conobꞌ bꞌey chi yakꞌ yaawil naj sreyal sur. Catuꞌ oj yakꞌon jun swa kꞌane yetoj jun yet reyal tuꞌ, oj yaontoj scutzꞌin tol txꞌojxa sakꞌalil yili tet jun rey tuꞌ, yet chi yakꞌon eyqꞌuey yaloni, man oj eloc jaxca chi yun snaꞌon tuꞌ. 18 Oj lawoj tuꞌ, catuꞌ oj yakꞌon eyqꞌuey wan conobꞌlaj ey bꞌey stiꞌlaj jaꞌ mar. Ecꞌal ebꞌ oj eyqꞌuey yu yetoj yipalil. Ey jun sgeneralil ebꞌ soldado, tol jix tit bꞌey junxa conobꞌ, jaꞌ oj mitxꞌon oc tucanoj, jaxa yelcan sqꞌuixwil jun sreyal norte tuꞌ. 19 Oj lawoj tuꞌ, oj meltzotoj bꞌey ey, jaꞌton bꞌey wan conobꞌ caw ey yip, eyoc smuroal yinlaj, manxa oj skeꞌ scolon sbꞌa, tol oj lawoj xacꞌal eyoj.

20 Txꞌojxa junxa rey oj oc can sqꞌuexeloj, asan tol oj ẍejtoj junoj yakꞌomal servil yin skꞌanon el toolabꞌal yet chi a can smimanbꞌilal yopiso. Jayebꞌixto cꞌual tuꞌ, oj makꞌle camoj, caxcꞌal man yin oj jowal oj camoj.

21 Oj lawoj tuꞌ xin, ey junxa caw pena snaꞌbꞌal oj oc can sqꞌuexeloj jun winaj tuꞌ yin reyal, tol man smoo oj chi oc yin yopiso. Man yotaj oj ebꞌ ánima ta tol chi yaoc sbꞌa yin reyal yu yiꞌle eytej sat ebꞌ yu. 22 Oj yakꞌ lawoj masanil ebꞌ soldado chi stecꞌbꞌa sbꞌa sattaj yin jowal, yetoj cꞌal naj syaawil wa kꞌane. 23 Catuꞌ oj iꞌle eytej sat ebꞌ yu, jaꞌton ebꞌ oj swaꞌne swa kꞌane yet watxꞌcꞌulal yetoj. Caxcꞌal txenne ánima eyoc yetoj, oj skeꞌ cꞌal yu. 24 Jaꞌ yet man naꞌanoj el yu ebꞌ ánima, catuꞌ oj octoj sat txꞌotxꞌ txꞌotxꞌ yel xacꞌal watxꞌ yili, catuꞌ oj yunen cꞌal tzettaj yetal tol cꞌam bꞌey jix yun ebꞌ smam icham yet peyxa. Jantaj tzet oj yiꞌ yin jowal, oj spoꞌon ecꞌ xol ebꞌ eyoc yetoj. Oj snaꞌon cꞌal yakꞌon jowal yin wanxa conobꞌlaj eyoc smuroal yinlaj, ebꞌ caw ey yip, man naatil oj skeꞌ yu jaxca tuꞌ.

25 Oj yaoc yipalil yipoj scꞌul, catuꞌ oj yakꞌon jowal yin sreyal sur yetoj jun miman bꞌulan soldado, oj spajtzen pax sbꞌa naj sreyal sur tuꞌ, catuꞌ oj oc yakꞌon jowal yetoj jun miman bꞌulan soldado caw ey yip tuꞌ, manxa oj skeꞌ stecꞌbꞌan sbꞌa ebꞌ soldado tuꞌ, yutol oj iꞌle eytej sat naj sreyal sur tuꞌ yu. 26 Jaꞌ ebꞌ yet yaawil eyoc yetoj, oj awtele low yu ebꞌ bꞌey smeẍa, jaꞌ ebꞌ tuꞌ oj yakꞌle yin yakꞌon eyqꞌueyoj. Oj eyqꞌuey ebꞌ soldado naj tuꞌ, caw miman ebꞌ oj cam xol jun jowal tuꞌ. 27 Jaꞌ tzet eyecꞌ yin snaꞌbꞌal cawan ebꞌ rey tuꞌ, asan yin yetnen sbꞌa junjun ebꞌ. Yu jun tuꞌ, yuxan oj ey chotan ebꞌ lowoj, catuꞌ oj yakꞌon lekꞌtiꞌal ebꞌ tet junjun, cꞌam cꞌal junoj ebꞌ cawan tuꞌ oj yun jaxca chi yoche scꞌul, yutol cꞌamto chi apni oc scꞌual. 28 Jal naj sreyal norte xin, jaꞌ yet oj meltzotej bꞌey sur yetoj masanil tzet oj yiꞌ yin jowal tuꞌ, oj yakꞌ sowalil yet chi oc ebꞌ Israel yin eyilal tet Dios, jatacꞌalaꞌ swa kꞌane Dios yetoj ebꞌ, catuꞌ oj yunen masanil tzetyetal tol naꞌbꞌil yu. Oj lawoj tuꞌ, catuꞌ oj paxtoj bꞌey sconobꞌ. 29 Jaꞌ yet oj apnoj jun scꞌual tol naꞌbꞌilxa yu tuꞌ, oj toj yetoj ebꞌ soldado yin jowal yin naj sreyal sur. Jaꞌ yet junelxa tuꞌ, manxa oj skeꞌ yakꞌon eyqꞌuey jowal jaxca jix yun yet sbꞌabꞌelal. 30 Yutol jaꞌ ebꞌ soldado ey yetcꞌulal bꞌey chi too cꞌu, oj jul ebꞌ yul barco. Jaꞌ ebꞌ tuꞌ oj tenon oc tucanoj. Queytuꞌ oj yun xiwa naj sreyal norte tuꞌ, catuꞌ oj meltzo yintaj. Catuꞌ oj yiꞌon el sjowal scꞌul naj sreyal norte yin swa kꞌane Dios jix swaꞌne yetoj ebꞌ Israel, oj ẍaꞌon yabꞌ snaꞌbꞌal ebꞌ tol jix bꞌejon can swa kꞌane Dios tuꞌ.

31 Jaꞌ ebꞌ soldado oj yetnetoj stemplo Dios ebꞌ yetoj cuartel junne yeoc yetoj, catuꞌ oj tenle oc tucan yakꞌle xaambꞌal yet junjun cꞌu, oj yaoctoj jantaj tzet yaabꞌetaj yu Dios yul templo, yu yetnen eloj. 32 Jaꞌ jun rey tuꞌ, caw oj yakꞌ yip smonten ebꞌ yet Israelal, jaꞌton ebꞌ ma jijen tzet chi yal swa kꞌane Dios. Jal pax ebꞌ conobꞌ caw ey scamcꞌulal yin sDiosal xin, oj stecꞌbꞌa sbꞌa ebꞌ sattaj tzet oj jul tuꞌ. 33 Ey ebꞌ ja wet conobꞌ oj cuyle yu ebꞌ jelan snaꞌbꞌal bꞌey yul ja conobꞌ tuꞌ, ey pax ebꞌ xin, jayebꞌne cꞌual catuꞌ oj makꞌle cam ebꞌ. Oj nusle tzꞌaꞌ ebꞌ, catuꞌ oj elkꞌaneletoj stzettaj yetal ebꞌ. Oj iꞌletoj ebꞌ yin yakꞌomaloj servilal bꞌey txꞌoj conobꞌal. 34 Jaꞌ yet oj ujtele ecꞌ ebꞌ tuꞌ, ey niꞌoj colwal oj ẍaꞌ ebꞌ. Caw ecꞌal ebꞌ oj sjunbꞌane sbꞌa yetoj ebꞌ yin caabꞌ satil. 35 Catuꞌ oj ujtele ecꞌ jaywanoj ebꞌ ey snaꞌbꞌal jix cuywa xol ebꞌ conobꞌ tuꞌ, yet watxꞌ oj akꞌle porobꞌal ebꞌ oj to cancanoj, yet watxꞌ chi iꞌle el ebꞌ caabꞌ sat xol ebꞌ, cꞌal swaꞌxi oc snaꞌbꞌal ebꞌ, masantaꞌcꞌal chi apni oc slawubꞌ cꞌual, jaxca cꞌaltaꞌ tzet naꞌbꞌil yu Dios.

36 Jaꞌ naj sreyal yeoc bꞌey norte oj yun masanil tzet chi yoche scꞌul, jaxca ton tuꞌ oj yun smeynen sbꞌa, catuꞌ oj yaloni tol miman yeloc apnoj yintaj tzet chi al-le oc diosal. Tol oj yal pena kꞌane yin jun jaꞌcaw Dios. Oj yun cꞌal masanil tzetyetal oj yoche scꞌul, masantaꞌcꞌal oj lawoj ecꞌ sjowal scꞌul Dios yin sconobꞌ, yutol jaꞌ tzet naꞌbꞌil yu Dios, oj cꞌal yunne. 37 Jaꞌ jun rey tuꞌ, cꞌam yeloc apnoj yopiso sdiosal smam icham yul sat, cꞌal wan sdiosal ebꞌ ix ix, bꞌey chi yiꞌey sbꞌa, cꞌam cꞌal yeloc apnoj yul sat, tam wal junojxa tzet chi al-le oc diosal, yutol oj snaꞌ yin snaꞌbꞌal, tol yel xacꞌal miman yeloc apnoj yintaj masanil wan tuꞌ. 38 Asan xin, txꞌoj jun dios bꞌey oj oc yin eyilal, jaꞌton jun dios tol ma yiꞌey sbꞌa ebꞌ smam icham tet, jaꞌton jun dios chi teynen conobꞌ tol watxꞌ yeoc smuroal, catuꞌ oj yakꞌon saꞌbꞌeal tet jun dios tuꞌ, jaꞌton oro, plata, chꞌen chꞌen caw watxꞌ yili, yetoj cꞌal wanxa tzettaj yetal tol caw ey stool. 39 Jaꞌ yetoj scolwal jun sdiosal tuꞌ, chi yalaꞌ tol oj skeꞌ yakꞌon eyqꞌuey wan conobꞌ tol caw yel xacꞌal ey yip. Jaꞌ mac oj yaoc sbꞌa yetoj jun rey tuꞌ, caw oj ale oc yopiso ebꞌ tol caw miman yeloc apnoj, oj akꞌle txꞌotxꞌ txꞌotxꞌ yu spajtzebꞌaloj tet ebꞌ.

40 Jaꞌ yet oj aapnoj slawubꞌ cꞌual, jaꞌ naj sreyal sur oj yakꞌ jowal yin sreyal norte tuꞌ. Catuꞌ oj eltej naj sreyal norte tuꞌ yin, yetoj masanil yipal oj eltej jaxca junoj jaꞌ elom jaꞌ, catuꞌ oj yakꞌon eyqꞌuey snación jun rey tuꞌ yetoj scarruaje yet jowal, yetoj ebꞌ soldado eyoc yibꞌan che, ecꞌal pax teꞌ barco jaꞌjun yetoj. 41 Oj oc cꞌal pax toj bꞌey yul sconobꞌ ebꞌ Israel, jaꞌton txꞌotxꞌ txꞌotxꞌ yel xacꞌal sakꞌal yili. Caw miman ebꞌ ánima oj makꞌle cam yu. Jal pax ebꞌ caan bꞌey Edom cꞌal bꞌey Moab xin, oj colcha can el ebꞌ, yetoj ebꞌ a Amón, ecꞌbꞌanto nan ebꞌ oj colcha can eloj. 42 Caw ecꞌal to pax wanxa nación oj yiꞌecꞌoj, manxa oj skeꞌ scolon el sbꞌa conobꞌ Egipto yul skꞌabꞌ. 43 Oj iꞌletoj masanil sbꞌeomal Egipto, jaxca chꞌen oro, plata, yetoj cꞌal wanxa tzetyetal watxꞌ. Tol oj cancan ebꞌ a Libia cꞌal ebꞌ a Etiopía yul skꞌabꞌ. 44 Jaꞌ yet tuꞌ, oj yabꞌ skꞌumal ebꞌ caan bꞌey chi aol cꞌu, cꞌal bꞌey norte. Jaꞌ yet oj yabꞌen oc naj jun tuꞌ, caw oj oc xiwcꞌulal yin, yu jun tuꞌ, oj eltej yetoj sjowal scꞌul, naꞌan xacꞌal yu, tol oj smakꞌ cam ecꞌaloj ánima. 45 Catuꞌ oj swaꞌnen ey sbꞌa cꞌal swaꞌnen a skꞌap na snan xol jaꞌ mar bꞌey jun wonan bꞌey ey stemplo Dios, jaꞌton yet tuꞌ oj apnoj slawubꞌal, cꞌamxa junoj mactxequel oj skeꞌ scolon eloj.