2 Jaꞌ yet wan cꞌual tuꞌ, ey oxebꞌ semana caw ey jin oc yin cuscꞌulal. 3 Cꞌam loꞌbꞌe tol watxꞌ jix jin loꞌ, ma wabꞌle niꞌoj chiꞌbꞌe, tam wal jix wucꞌ vino, cꞌam cꞌal niꞌoj perfume jix waoc win masantaꞌcꞌal jix ecꞌ el oxebꞌ semana tuꞌ. 4 Jaꞌ yet 24 yoc bꞌabꞌel xꞌaaw yul jun abꞌil tuꞌ, ey jin ecꞌ bꞌey stiꞌ jaꞌ miman jaꞌ chi yij Tigris. 5 Jix jin to tꞌananoj, jix wilon jun winaj eyoc pichile tol lino cꞌal eloj eyoc yu, cꞌal jun kꞌalile eyoc chꞌen oro yin. 6 Tuxa cꞌal chi kopopi yili smimanil jaxca chꞌen topacio, tuxa cꞌal chi kopopi yili sat jaxca letzꞌlom, jaꞌ sbꞌakꞌ sat caw chi chaw skꞌakꞌal jaxca tzejtebꞌal. Jaꞌ skꞌabꞌ cꞌal yajan, caw chi kopopi jaxca chꞌen bronce tol neleli xacꞌal ye swaꞌxi, jaꞌ yul snukꞌ jaxca yoc yul snukꞌ junoj miman bꞌulan ánima.

7 Asanne jin jix skeꞌ wilon jun tuꞌ, jal pax masanil ebꞌ ánima eyecꞌ wetoj, ma yil ebꞌ, yutol jix jul xiwcꞌulal yin ebꞌ, catuꞌ jix too yewbꞌan el sbꞌa ebꞌ. 8 Asanne jin ey jin ecꞌ jin txꞌojli yet jix wilon jun tuꞌ, caw jix pax jin chiqꞌuil yu xiwcꞌulal, cꞌamxa wip jix wabꞌe. 9 Jaꞌ yet jix wabꞌen skꞌanabꞌ a tuꞌ, jix pax xacꞌal wip, jix qꞌueyel jin cꞌul, jix jin ey nonaj sat txꞌotxꞌ. 10 Jix lawi tuꞌ xin, ey junoj jix oc mitxꞌan yin jin kꞌabꞌ, jix jin sketzon a waanoj, masantaꞌcꞌal jix skeꞌ wey kaan yetoj sjolom jin penec cꞌal yetoj jin kꞌabꞌ. 11 Catuꞌ jix yalon ey jin jaxca tiꞌ: Daniel, tol camcꞌulnebꞌil jaach yu Dios, chi cam ja wabꞌen tzet oj walaꞌ. Aan waanoj, yutol jix jin chejletej ey jaach, ẍi.

Jaꞌ yet jix lawi yalon wan kꞌane tuꞌ, tuxa cꞌal chin lujloni, jix jin oc linanoj. 12 Catuꞌ jix yalon ey jin: Jaach Daniel, cꞌam ojabꞌ chach xiwi. Jix yabꞌ Dios ja txa yet tax bꞌabꞌel cꞌual yet jix ja waon oc yin ja cꞌul ja woc yin eyilal tet. Yu ja txa tuꞌ, yuxan jix jin chejletej jain tiꞌ. 13 Jaꞌ jun sat espíritu yaaw yeoc bꞌey yul yet Persia, 21 cꞌual jix jin smitxꞌoc tucanoj. Jal pax Miguel, jun ángel tol yaaw cꞌal pax yeocoj, jaꞌ jix jul colwa wetoj, tol jix cancan scꞌatan ebꞌ syaawilal Persia. 14 Yuxan jaꞌ tinaniꞌ, chi jul wal ey jaach yu tzet oj ecꞌtoj yibꞌan jun conobꞌ tiꞌ yet oj jul slawubꞌ cꞌual, yutol jaꞌ jun tzet jix txꞌoxle ja wilaꞌ chi yal yu tzet oj jul yet yatoj tuꞌ, ẍi ey jin.

15 Jaꞌ yet lalan yalon wan kꞌane tuꞌ ey jin, cꞌamxa cꞌal junoj bꞌelan kꞌane jix walaꞌ, tuxa cꞌal tꞌanan jin ey sat txꞌotxꞌ. 16 Jix lawi tuꞌ xin, ey jun laan yili jaxca ánima, eyman jix oc mitxꞌan yin jin tiꞌ. Jix walon tet jun linan oc jin sattaj tuꞌ: Jaach Waawil, jaꞌ yu jun tzet jix wil yin jin weyich tiꞌ, jix jin oc yin bꞌiscꞌulal yu, caw cꞌamxa wip chi wabꞌe. 17 ¿Tzet wal oj yun jin kꞌanabꞌ jain ja chejabꞌ jin tiꞌ ja wetoj jaach Waawil? Yutol cꞌamxa wip, catuꞌ cꞌamxa chi skeꞌ wiꞌon jin kaꞌeꞌ chi wabꞌe, jin chi tet.

18 Jaꞌ jun laan yili jaxca ánima tuꞌ, jix oc pax mitxꞌan win junelxa, catuꞌ jix oc wip. 19 Jix yalon ey jin jaxca tiꞌ: Cꞌam chach xiwi, cꞌam chach oc il. Jaꞌ Dios caw chach scamcꞌulne. Asan tol cha tecꞌbꞌa ja bꞌa, ẍi ey jin.

Jaꞌ yet lalan skꞌanabꞌ ey jin tuꞌ, caw jix oc wip sicꞌlebꞌil jix wabꞌe, jix walon jaxca tiꞌ: Jaach Waawil, kꞌanabꞌan ey jin, yutol jix jul wip junelxa ja wu, jin chi tet. 20-21 Catuꞌ jix yalon ey jin: ¿Ja wotaj mi tzet yu, yuxan chin jul jaach wilaꞌ? Chi jul wal ey jaach yu jantaj tzet tzꞌibꞌebꞌilcan ey yul an libro tol yel. Jaꞌ tinaniꞌ tol oj wakꞌle jowal yetoj jun sat espíritu yaaw yeoc bꞌey Persia. Jaꞌ yet oj lawoj wakꞌlen jowal yetoj tuꞌ, catuꞌ oj jul jun sat espíritu yaaw yeoc bꞌey Grecia. Jaꞌ yin jun jowal tuꞌ, asan Miguel, jun ángel yaaw yeoc bꞌey conobꞌ Israel chi colwa wetoj.