Jaach Waawil, jin Diosal jaach, caw miman ja weloc apnoj, caw ey ja wipalil. Chi eloc jantaj tzet ja walnaj canoj, catuꞌ cha txꞌoxon ja camcꞌulal tet ebꞌ ey scamcꞌulal ja win, jaꞌton ebꞌ chi jijen ja chejbꞌanil. 5 Jaon tiꞌ jon, jix oc cu penail cꞌal cu pital ey jaach. Jaxa cꞌal spenail chi kunne, manxa naꞌanoj jaach ku jon. Jix kintajne xacꞌal can el ja chejbꞌanil cꞌal ja ley. 6 Ma cu chaꞌ kabꞌ niꞌoj tzet jix yal ebꞌ ja chejabꞌ. Jix yal ja kꞌane ebꞌ tet ebꞌ cu reyal jon, cꞌal tet ebꞌ yaaw yeoc cu xol jon, tet ebꞌ cu mam icham jon, cꞌal tet masanil ebꞌ ket Israelal jon. 7 Jaach jin Diosal, caw watxꞌ ton ja naꞌbꞌal. Jaon Israel jon tiꞌ jon, caw qꞌuixwiltaj keecꞌ chi kabꞌ jon. Jaxca ebꞌ titnaj bꞌey Judá cꞌal bꞌey Jerusalén yetoj cꞌal wanxa ebꞌ ket Israelal caan bꞌey naat cꞌal bꞌey cawil, jaon ton jix jon ja sajlemne cantoj, yutol jix oc cu pitalil ey jaach. 8 Jaach Jehová jin Diosal, jaon tiꞌ jon, caw laan jix kute cu bꞌa jaxca ebꞌ cu reyal jon, ebꞌ yaaw yeoc cu xol, yetoj cꞌal ebꞌ cu mam icham jon. Qꞌuixwiltaj xacꞌal kecꞌ ja sattaj chi kabꞌ jon, yutol jix oc cu penail ey jaach. 9 Jaach tiꞌ, cu Diosal jaach jon. Caw chi okꞌ ja cꞌul kin, catuꞌ caw ey ja mimancꞌulal. Jal jon jaon tiꞌ jon, caw pit chi kute cu bꞌa ja sattaj. 10 Jaach Jehová jin Diosal, man jijemoj jon ey jaach, ma cu chaꞌ kabꞌ ja chejbꞌanil jix yal ebꞌ ja chejabꞌ ey jon. 11 Jaon Israel jon tiꞌ, caw ma cu jije tzet chi yal ja chejbꞌanil, ma cu chaꞌ kabꞌ tzet jix ja walaꞌ. Yu cu penail tuꞌ, yuxan jix jul masanil wan syaꞌilal tzꞌibꞌebꞌilcan yul an libro jix stzꞌibꞌe can naj ja chejabꞌ Moisés. 12 Tuxa jix yun tzetyetal jix ja walaꞌ, tol oj jul kibꞌan jaon tiꞌ, cꞌal yibꞌan ebꞌ yaaw yeoc cu xol jon. Caw miman jix yun ja waon oc syaꞌilal yibꞌan conobꞌ Jerusalén yintaj junojxa conobꞌ. 13 Masanil wan syaꞌilal tzꞌibꞌebꞌilcan bꞌey yul an libro yu naj Moisés, jix jul kibꞌan tinaniꞌ, jaach Jehová cu Diosal, jaon tiꞌ jon, caw ma yal cu cꞌul jix cu oc tzajan ja wintaj. Jaꞌ yin spenail jix cu toocan jon, ma xacꞌal cu jije tzet chi yal ja kꞌane. 14 Yu jun tuꞌ xin, jaach Jehová jin Diosal, yuxan jix ja naꞌ ja waontej jun miman syaꞌilal tiꞌ kibꞌan jon. Yutol jaach tiꞌ, cu Diosal jaach, caw jichan cꞌal tzet cha wunne, jal jon jaon tiꞌ yel xacꞌal ma cu chaꞌ kabꞌ tzet cha walaꞌ.

15 Jaach cu Diosal, tol Kaawil jaach. Jix ja txꞌox ja wipalil yet jix ja wiꞌon eltej ebꞌ cu mam icham bꞌey txꞌotxꞌ Egipto. Caw jix jaach bꞌinale yet tuꞌ, jaxca cꞌal ton yet tuꞌ, queytuꞌ chi kute cu bꞌa tinaniꞌ jon, jix oc cu penail ey jaach, asan cꞌal spenail chi cu bꞌeybꞌalne jon. 16 Jaach jin Diosal, kotaj jon tol cha wun cꞌal tzet cha walaꞌ. Yu jun tuꞌ, eloj yin ja cꞌul tol cha wiꞌel wan syaꞌilal, cꞌal sjowal ja cꞌul eyoc yibꞌan conobꞌ Jerusalén tiꞌ, yutol ja conobꞌ keoc jon, ja wet yeoc txꞌotxꞌ wonan Sión. Masanil wan nacionlaj ey scawilal chi bꞌuchwa ebꞌ yin ja conobꞌ Jerusalén, yu cꞌal cu penail jon, cꞌal yu spenail ebꞌ cu mam icham jon. 17 Jaach cu Diosal, abꞌ tzet chi wal yin jin txa jain ja chejabꞌ jin tiꞌ. Caw bꞌinabꞌil jaach, txꞌox ja watxꞌcꞌulal yibꞌan ja templo tol uchbꞌil eyoj. 18 Jaach jin Diosal, chaꞌ ja wabꞌ tzet chi wal ey jaach, chi cu kꞌan mimancꞌulal ey jaach. Chi cu oc tean ja win, kotaj jon tol chi okꞌ ja cꞌul kin jon. Cꞌam chi cu oc tean ja win yetoj cu watxꞌil yul ket, asanne ton yu ja miman watxꞌcꞌulal. Yutol jix uchle ey jun conobꞌ tol bꞌinabꞌil tol ja wet yeocoj. 19 Jaach jin Diosal, Waawil jaach, abꞌ tzet chin kꞌan ey jaach, akꞌ mimancꞌulal yibꞌan cu penail jon, colwaan ketoj jon. Yutol caw bꞌinabꞌil jaach, cꞌam ojabꞌ chi ecꞌ tiempo yet chon ja colon eloj, yutol caw okꞌbꞌalcꞌule keoc jaon a Jerusalén tiꞌ jon, jin chi yin jin txa.

20 Jix oc cꞌal ian jin txali yin walon atej jin penail, cꞌal walon spenail jin conobꞌ Israel, catuꞌ chin oc cꞌal tean yin Jehová jin Diosal yu wonan Sión, jaꞌton Jerusalén, tol yet yeocoj. 21 Yajbꞌan lalan jin txali xin, jaꞌ Gabriel, jun jix xꞌox sbꞌa ey jin yet yalantoj, jix jul jenenoj bꞌey ey jin ecꞌ tuꞌ, jaxca wal yorail yet chi akꞌle xaambꞌal tet Jehová yet yeycꞌualil. 22 Jix yalon ey jin jaxca tiꞌ:

Jaach Daniel, chin jul ey jaach yu jul wakꞌon ja jelanil yet chi naꞌcha el ja wu tzetyetal lalan ja cuyon tiꞌ. 23 Jaꞌ yet jix ja chaꞌon oc ja txali, jix spajtze Dios ja txa, yuxan chi jul wal ey jaach, yutol caw camcꞌulnebꞌil jaach yu Dios. Jaꞌ tinaniꞌ xin, maj cꞌal ja wabꞌ jun kꞌane tiꞌ, yet chi naꞌcha el ja wu tzet jix ja wil yin ja weyich tiꞌ: