Jun Meꞌ Cꞌal Jun Chiw Jix Txꞌoxle Yil Naj Daniel
8
Jaꞌ yet yox abꞌil yoc naj Belsasar yin reyal, ey junxa jin weyich jix txꞌoxle wil jain Daniel jin tiꞌ, yintaj jun jix txꞌoxle wil yet yalantoj. 2 Jaꞌ jix yun wiloni, jaxca tol ey jin ecꞌ bꞌey conobꞌ Susa, bꞌey yul yet Elam, bꞌey stiꞌ jaꞌ chi yij sbꞌi Ulai. 3 Jix wilontoj jun noꞌ meꞌ eyecꞌ bꞌey stiꞌ jaꞌ tuꞌ. Ey caabꞌ yucꞌaꞌ mimej steel, ey junxa yucꞌaꞌ tzajan jix yun yaol yintaj wanxa tuꞌ, yel xacꞌal miman steel yibꞌan junxa tuꞌ. 4 Jix wilon jun meꞌ tuꞌ, jaꞌ yetoj yucꞌaꞌ tuꞌ jix yakꞌ lawoj el jantaj tzettaj yetal ey yetcꞌulal bꞌey chi too cꞌu, cꞌal bꞌey norte, cꞌal bꞌey sur. Cꞌam junojxa tzetyetal chi skeꞌ stecꞌbꞌan sbꞌa sattaj, cꞌal scolon sbꞌa tet sjowal. Caw chi yun cꞌal tzet chi yoche scꞌul. Junjuntaj cꞌal el, caw chi oc yip sicꞌlebꞌil.5 Lalantocꞌal jin naꞌon yin tzet jix wil tuꞌ, jix wilontej tol ey jun icham chiw lalan stit yetcꞌulal bꞌey chi too cꞌu, yelcꞌulal chi yakꞌ yip stita, jaxca xacꞌal tol cꞌam chi ey niꞌoj yajan bꞌey sat txꞌotxꞌ. Jaꞌ snan xol sbꞌakꞌ sat jun chiw tuꞌ, jaꞌ tituꞌ eyeltej jun yucꞌaꞌ caw miman. 6 Jaꞌ yet jix apni oc bꞌey scawilal noꞌ meꞌ caabꞌ yucꞌaꞌ tuꞌ, noꞌ jix wil bꞌey stiꞌ jaꞌ jaꞌ tuꞌ, jix too lemna yin yetoj masanil yip cꞌal sjowal, 7 catuꞌ jix makꞌle kꞌatoj yucꞌaꞌ noꞌ meꞌ tuꞌ scaabꞌil. Cꞌamxa yip noꞌ meꞌ tuꞌ yet chi stecꞌbꞌa sbꞌa noꞌ sattaj. Jix lawi tuꞌ xin, jix eyqꞌuey yu noꞌ chiw tuꞌ bꞌey sat txꞌotxꞌ, catuꞌ jix tecꞌle ey yu. Cꞌamxa mac chi skeꞌ scolon eloj.
8 Jacꞌalaꞌ cꞌal yiꞌon yip jun icham chiw tuꞌ. Jaxa jix yunen a xin, jaꞌ yet lalan yakꞌon yip tuꞌ, catuꞌ jix kꞌatoj jun yucꞌaꞌ caw miman tuꞌ, jaxa bꞌey elnaj jun yucꞌaꞌ tuꞌ, jaꞌ tituꞌ jix aol canebꞌxa yucꞌaꞌ, catuꞌ jix yetcꞌulnetoj bꞌey scanpaqꞌuil yul yibꞌankꞌinal. 9 Jaꞌ yin junoj wan yucꞌaꞌ tuꞌ, jix aol junxa yucꞌaꞌ yaliẍ. Jaꞌ jun tuꞌ yel xacꞌal miman jix yun ẍꞌibꞌtoj bꞌey sur, cꞌal bꞌey chi aol cꞌu, cꞌal bꞌey yetcꞌulal txꞌotxꞌ txꞌotxꞌ sakꞌal yili.a 10 Caw jix chꞌibꞌtoj sicꞌlebꞌil. Jix a tacꞌal apnoj bꞌey ey ebꞌ soldado yet Dios bꞌey satcan, jix skꞌojon eytej jayebꞌoj weycan tituꞌ, jix stecꞌon eyoj. 11 Catuꞌ jix stecꞌbꞌan sbꞌa sattaj jun syaawil ebꞌ ey bꞌey satcan. Jix stenon oc tucan yakꞌle xaambꞌal chi akꞌle junjun cꞌu, jix yetnentoj bꞌey chi oc cꞌaltaꞌ eyilal tet Dios. 12 Jaꞌ yu yecꞌnajilal jun yaaw tuꞌ, jix yaoc soldado bꞌey chi akꞌle cꞌaltaꞌ xaambꞌal yet junjun cꞌu, jix stenoc tucan yakꞌle wan xaambꞌal tuꞌ, catuꞌ jix qꞌueyle el jaꞌcaw eyilal yu. Catuꞌ jix yunen masanil jantaj tzet chi yoche scꞌul.
13 Jix lawi tuꞌ xin, jix wabꞌeni tol ey jun ángel chi skꞌanle tet junxa ángel: ¿Bꞌakꞌin wal oj lawoj wan tzetyetal chi kil tiꞌ? ¿Jantaj tocꞌal tiempo eyecꞌ jun intajnebꞌil el yu Dios tiꞌ, jaꞌton jun chi qꞌuexontoj xaambꞌal chi akꞌle cꞌaltaꞌ yet junjun cꞌu? ¿Bꞌakꞌin oj oc tucan stecꞌle ey ebꞌ soldado yet satcan, cꞌal bꞌey chi oc cꞌaltaꞌ eyilal? ẍi. 14 Jix takꞌwi junoj ebꞌ ángel tuꞌ jaxca tiꞌ: Jaꞌ yet oj lawoj ecꞌ 2,300 cꞌu, man oj akꞌle xaambꞌal yet yeycꞌualil cꞌal yet skꞌinibꞌalil. Jaꞌ yet tuꞌ oj lawoj wan tuꞌ, catuꞌ oj iꞌle el tzet man watxꞌoj ey bꞌey jun calubꞌal tol asan Dios ey yet, ẍi junxa ángel tuꞌ.
15 Yajbꞌan lalanto jin naꞌon yibꞌan jain Daniel jin tiꞌ, yu wan jix wil tuꞌ, jix naꞌcha xacꞌal el wu tzet chi yal yeloc apnoj. Jix wiloni, ey jun jaxca ánima jix xꞌoxa sbꞌa jin sattaj. 16 Jix wabꞌen yoc jun aw chi tit bꞌey jaꞌ snukꞌ jaꞌ chi yij sbꞌi Ulai, jaxca wal yul snukꞌ ánima jix yalon jaxca tiꞌ: Gabriel, kocꞌ alne el tet jun ánima tiꞌ yu tzet jix yilaꞌ, ẍi.
17 Jix lawi tuꞌ, jix jul Gabriel tuꞌ jin cꞌatan an, caw jix jin xiwa yu, catuꞌ jix jin ey noan sat txꞌotxꞌ sattaj yu xiwcꞌulal. Jix yalon ey jin: Otajne eloj tol jaꞌ tzet jix akꞌle ja wil tuꞌ, tol slawubꞌ cꞌual chi yalaꞌ, ẍi.
18 Jaꞌ yet lalan skꞌanabꞌ ey jin tuꞌ, jix jin eyqꞌuey sat txꞌotxꞌ, jix qꞌueyel jin cꞌul, catuꞌ jix oc mitxꞌan win, catuꞌ jix jin oc linanoj. 19 Jix yalon ey jin jaxca tiꞌ:
Oj wal ey jaach tzet oj eloc yet tuxa oj lawoj sjowal scꞌul Dios. Jaꞌ jun tzet jix ja wil tuꞌ, chi xꞌoxtej slawubꞌal cꞌual.
20 Jal noꞌ meꞌ ey caabꞌ yucꞌaꞌ jix ja wil tuꞌ, jaꞌton ebꞌ sreyal Media cꞌal Persia chi xꞌoxoꞌ. 21 Jal pax noꞌ icham chiw jix ja wil tuꞌ xin, jaꞌton sreyal Grecia chi xꞌoxoꞌ. Jaꞌ jun yucꞌaꞌ miman eyatej snan xol sbꞌakꞌ sat, jaꞌ jun bꞌabꞌel rey chi xꞌoxoꞌ. 22 Jaꞌ canebꞌ yucꞌaꞌ jix aol yet jix kꞌatoj jun bꞌabꞌel tuꞌ, jaꞌ wan tuꞌ chi yal yeloc apnoj tol jaꞌ jun nación tuꞌ oj poꞌochatoj yin canebꞌ conobꞌal, asan xin, man laan oj yip yetoj jun bꞌabꞌel tuꞌ.
23 Jaꞌ yet oj lawoj stiempoal yakꞌon yaawil wan nación tuꞌ, cꞌamxa chi alcha jantaj spenail ebꞌ oj oc sattaj Dios. Ey junxa rey oj yakꞌ yaawilal, yel xacꞌal chꞌaan, catuꞌ caw jelan yin tzet man watxꞌoj.
24 Yel xacꞌal oj yiꞌ yip sicꞌlebꞌil, manaj yetoj yipalil yul yet oj yuneni. Caw qꞌueyubꞌtaj oj yun sqꞌueyon el masanil tzetyetal, watxꞌ cꞌal oj eloc yin masanil tzet oj yunne. Oj eyqꞌuey ebꞌ ánima ey yipalil yu, catuꞌ oj eyqꞌuey ebꞌ sconobꞌ Dios yu.
25 Oj yetne ánima yetoj sjelanil, oj smeyne sbꞌa. Caw oj yiꞌa can sbꞌa sicꞌlebꞌil, caw cꞌam tzet naꞌan yu ebꞌ ánima, catuꞌ oj makꞌle cam ebꞌ yu. Oj stecꞌbꞌa sbꞌa sattaj Dios, jaꞌton Naj Syaawilal ebꞌ yaaw ey bꞌey satcan. Caxcꞌal jaxca tuꞌ oj yute sbꞌa, oj qꞌueyle eloj, man yu oj yipal ánima oj qꞌueyle eloj.
26 Jaꞌ tzet jix ja wil yin wan xaambꞌal chi akꞌle yet yeycꞌualil cꞌal yet skꞌinibꞌalil, tuxa jix al-le el ey jaach. Jaꞌ jun tuꞌ sowalil oj yunne. Can ojabꞌ cꞌal can yin ja naꞌbꞌal, cꞌam cꞌal bꞌey cha walaꞌ, yutol jaꞌ yet oj bꞌey cꞌaltoj ecꞌaloj abꞌil, catuꞌ oj yuneni, ẍi Gabriel ey jin.
27 Jain Daniel jin tiꞌ, caw jix el wip jix wabꞌe; jix jin yaꞌbꞌi ey jayebꞌ cꞌu. Jix lawi tuꞌ xin, jix waꞌxi el jin cꞌul, catuꞌ jix jin a waanoj, jix too wilon wopiso eyoc wibꞌan yu naj rey. Caw ey jin cꞌal oc yin bꞌiscꞌulal yu jun jix txꞌoxle wil yin weyicheal tuꞌ, yutol caw cꞌam chi naꞌcha el wu tzet chi yal yeloc apnoj, ẍi naj Daniel.