Noꞌ Cancꞌon Noꞌ Jix Yil Naj Daniel Yin Weyicheal
7
Jaꞌ yet jun akꞌbꞌal yet bꞌabꞌel abꞌil yoc naj Belsasar yin reyal bꞌey Babilonia, ey wan tzetyetal jix yil Daniel yin sweyich. Jaꞌ yet jix a waanoj, catuꞌ jix stzꞌibꞌen wan tzet caw miman yeloc apnoj jix yil yin sweyich tuꞌ. Jaꞌton wan tiꞌ jix stzꞌibꞌe:2 Jix wilaꞌ tol jaꞌ scanpaqꞌuil bꞌey chi tit kaꞌeꞌ, catuꞌ jix xuontej yibꞌan jaꞌ mar, caw jix bꞌilwi a sat jaꞌ smakꞌon jun kaꞌeꞌ tuꞌ. 3 Jix lawi tuꞌ, jix txeclo a cancꞌon noꞌ mimej noꞌ tuꞌ yul jaꞌ mar, txꞌoj txꞌoj cꞌal yili junjun noꞌ. 4 Jaꞌ jun bꞌabꞌel jix aoloj, laan yili jaxca noꞌ bꞌalam, asan tol ey xicꞌ jaxca noꞌ chii. Yajbꞌan lalan wilon jaxca tuꞌ, catuꞌ jix nicꞌle el xicꞌ, jix iꞌle a linan bꞌey sat txꞌotxꞌ tuꞌ. Laan xacꞌal yeoc linan jaxca ánima. Jix qꞌuexcha snaꞌbꞌal, laan jix yun snaꞌbꞌal jaxca ánima.
5 Jaꞌ noꞌ yet scaabꞌ, laan yili jaxca noꞌ oso, tzꞌeyan a jun pacꞌ smimanil yintaj jun pacꞌxa. Jaꞌ yul stiꞌ noꞌ, nacꞌbꞌil a oxebꞌ sbꞌajil mootxe. Jix wabꞌen yal-le tet jaxca tiꞌ: Asiꞌ, catuꞌ cha chiꞌon jantaj chiꞌbꞌe chi yoche ja cꞌul, ẍi tet.
6 Jaꞌ noꞌ yet yox, laan yili jaxca noꞌ tzꞌibꞌin bꞌalam. Ey canebꞌ xicꞌ bꞌey snan yichin, catuꞌ jix wilon cꞌal pax oj tol ey canebꞌ sjolom, catuꞌ jix akꞌle yipalil yakꞌon yaawil.
7 Jaꞌ noꞌ yet scan jix wil yin jin weyich tuꞌ, caw pena xacꞌal yili. Eyxa smey yili ocoj, yel xacꞌal ey yipalil. Caw mimej yee, hierro chꞌen cꞌal eloj. Kocꞌ xacꞌal chi yutetoj tzetyetal, catuꞌ chi stukꞌon eytoj, catuꞌ chi stecꞌon ey jantaj to chi can yu. Yel xacꞌal txꞌoj yili jun noꞌ tuꞌ yintaj cꞌal wanxa noꞌ jix wil yin sbꞌabꞌelal. Ey laonebꞌ yucꞌaꞌ.
8 Yajbꞌan tꞌanan jin oc yin wan yucꞌaꞌ tuꞌ, jix wiloni tol jix aol junxa yaliẍ yucꞌaꞌ bꞌey snan xol wan tuꞌ, jaꞌ yet jix aol junxa yucꞌaꞌ tuꞌ, jix ecꞌ yijatej oxebꞌ yucꞌaꞌ tuꞌ, jaxa cꞌal jun tuꞌ jix can sqꞌuexeloj wan tuꞌ. Jaꞌ jun yucꞌaꞌ tuꞌ, ey sbꞌakꞌ sat cꞌal stiꞌ jaxca yet ánima, caw chi smeyne sbꞌa yu tzet chi yalaꞌ.
Jaꞌ Tzet Chi Yun Snaꞌon Oc Dios
9 Jaꞌ yet lalan wilon wan tuꞌ, catuꞌ jix ale ey wan trono, jaꞌ Dios jaꞌton Naj Ey cꞌaltaꞌ Ecꞌoj, jix ey chotan yibꞌan junoj wan ẍila tuꞌ. Sajin xacꞌal yili spichil jaxca yili chꞌen sajbꞌacom. Jaꞌ xil sjolom, sajin xacꞌal yili jaxca saj lana. Jaꞌ strono tuꞌ yetoj cꞌal yajan tol xoyan yeocoj, catuꞌ chi chaw skꞌakꞌal.
10 Ey jun kꞌakꞌ chi eltej sattaj jaxca sbꞌey junoj jaꞌ. Jaꞌ ebꞌ chi akꞌon servil, yin xa smilal ey sbꞌisil ebꞌ, yin xa smillonal ey ebꞌ linan oc sattaj Naj. Jix el yich snaꞌon oc yin junjun mactxequel, catuꞌ jix sjajon wan an libro.
11 Jix jin oc cꞌal tꞌanan yin jun noꞌ chi yal wan kꞌane yet meynebꞌail lalan yalon jun yaliẍ yucꞌaꞌ tuꞌ. Yajbꞌan lalan wilon an xin, catuꞌ jix makꞌle cam jun noꞌ tuꞌ, kocꞌ xacꞌal jix yun cantoj, yin eymanil jix kꞌojletoj xol kꞌakꞌ, catuꞌ jix tzꞌaꞌtoj. 12 Yetoj cꞌal pax wanxa noꞌ noꞌ tuꞌ, jix iꞌle ecꞌ yopiso noꞌ, asan xin, jix iquisbꞌi tocꞌal ecꞌ niꞌojxa noꞌ.
13 Catuꞌ jix wilon cꞌal yin jin weyich yet jun akꞌbꞌal tuꞌ.
Jix wilaꞌ tol ey jun mac chi tit bꞌey xol asun, laan yili jaxca ánima.a Catuꞌ jix too bꞌey eyecꞌ Naj Akꞌbꞌil yopiso xol ebꞌ yet animail yu Dios, jix sjitz xacꞌal oc sbꞌa scꞌatan.
14 Catuꞌ jix akꞌle yopiso cꞌal smimanbꞌilal yin reyal. Masanil nacionlaj cꞌal junjun tiꞌeal chi akꞌon servil. Jaꞌ yipalil ey cꞌaltaꞌ ecꞌoj, cꞌam bꞌakꞌin chi lawi ey yopiso.
15 Jix xiwa jin cꞌul yet jix wilon wan tuꞌ, catuꞌ jix jin oc xacꞌal il yu. 16 Jix jin jitzontoj jin bꞌa scꞌatan junoj ebꞌ linan oc tituꞌ, catuꞌ jix jin kꞌanlen tet tzet chi yal yeloc apnoj wan tuꞌ, jix yalon ey jin jaxca tiꞌ: 17 Jaꞌ cancꞌon noꞌ jix ja wil tuꞌ, jaꞌ canwan rey bꞌey canebꞌ nación bꞌey yul yibꞌankꞌinal tiꞌ, chi xꞌoxtej. 18 Jaꞌ yet oj lawoj yakꞌon yaawil ebꞌ tuꞌ, catuꞌ oj ale oc masanil yul skꞌabꞌ ebꞌ sconobꞌ Dios, Naj tol miman Yeloc Apnoj, junelne tol yet xacꞌal jun conobꞌ tuꞌ, ẍi.
19 Jix lawi tuꞌ, jix jin kꞌanle tet junelxa, tzet utbꞌil yeoc noꞌ yet scan tuꞌ, yutol txꞌoj yili noꞌ yintaj wanxa noꞌ tuꞌ, yutol eyxa smey yili oc noꞌ. Tol chꞌen hierro xacꞌal el yee, jaꞌ yiskꞌaj bronce chꞌen xacꞌal eloj. Kocꞌ xacꞌal chi yutetoj masanil tzetyetal, catuꞌ chi stukꞌon eytoj, catuꞌ chi stecꞌontoj jantaj to chi cani. 20 Yajbꞌan tꞌanan jin oc yin yucꞌaꞌ jun noꞌ tuꞌ, jix jin kꞌanle tzet chi yal yeloc apnoj laonebꞌ yucꞌaꞌ tuꞌ, cꞌal yetoj junxa yucꞌaꞌ tzajan jix yun yaol tuꞌ, tol ey sbꞌakꞌ sat cꞌal stiꞌ, chi yalon pena kꞌane yet meynebꞌail. Catuꞌ yel xacꞌal miman yeloc apnoj yintaj wanxa yucꞌaꞌ tuꞌ, yutol oxebꞌ yucꞌaꞌ jix eyqꞌuey kꞌotna sattaj jun tuꞌ. 21 Jix wiloni tol jaꞌ jun yucꞌaꞌ tuꞌ chi yakꞌ jowal yin ebꞌ sconobꞌ Dios, catuꞌ jix eyqꞌuey ebꞌ yu, 22 masantaꞌcꞌal jix apni oc Dios, Naj tol ey cꞌaltaꞌ ecꞌoj, catuꞌ jix swaꞌnen el kꞌane yibꞌan ebꞌ sconobꞌ, yutol jix aapnoj scꞌual ẍaꞌon yopiso ebꞌ. 23 Jix yalon ey jin jaxca tiꞌ:
Jaꞌ jun yet scan noꞌ tuꞌ, jaꞌton jun yet scan nación oj eyecꞌ bꞌey sat txꞌotxꞌ txꞌotxꞌ tiꞌ. Qꞌuexan yel yintaj wanxa nación. Oj smajbꞌa oc sbꞌa bꞌey masanil txꞌotxꞌ txꞌotxꞌ tiꞌ, oj yakꞌon yaawil yibꞌan masanil, cꞌamxa cꞌal niꞌoj smimancꞌulal.
24 Jaꞌ wan laonebꞌ yucꞌaꞌ tuꞌ, jaꞌton laonwan ebꞌ rey. Jaꞌ ebꞌ oj yakꞌ yaawil yin jun nación tuꞌ. Jaꞌ yintaj wan tuꞌ, oj a waan junxa rey, tol yel xacꞌal txꞌoj yel yintaj wan yet sbꞌabꞌelal tuꞌ, oj qꞌueyle el oxwan ebꞌ rey tuꞌ yu.
25 Caw yel xacꞌal pena oj yal yin Dios, Naj tol miman yeloc apnoj, caw oj etnele ebꞌ sconobꞌ Dios yu, oj yakꞌle sqꞌuexon el sleyalil, cꞌal bꞌeybꞌale, cꞌal tiempolaj albꞌilcan yu Dios. Oj cancan ebꞌ sconobꞌ Dios yalan yopiso yin nan scan abꞌil.
26 Jaꞌ yet oj jul scꞌual snaꞌle oc yin tuꞌ, catuꞌ oj iꞌle el yopiso tuꞌ, oj akꞌle lawoj ey yin junelne.
27 Jaꞌ yopiso, yetoj sbꞌinabꞌilal masanil conobꞌ bꞌey yul yibꞌankꞌinal tiꞌ, oj akꞌle can oc yul skꞌabꞌ ebꞌ sconobꞌ jun Dios, tol asanxane miman yeloc apnoj. Jaꞌ yopiso tuꞌ ey cꞌal yin tobꞌalkꞌinal. Masanil ebꞌ eyoc yin yaawilal bꞌey yul yibꞌankꞌinal tiꞌ oj akꞌon servil Naj, cꞌal sjijen ebꞌ tzet chi yalaꞌ, ẍi ey jin.
28 Jaꞌton slawubꞌal wan tzet jix al-le ey jin, jain Daniel jin tiꞌ. Caw jix somcha jin naꞌbꞌal. Jix pax jin chiqꞌuil yu bꞌiscꞌulal, cꞌam cꞌal junoj bꞌey jix walel wan kꞌane tiꞌ, ẍi naj Daniel.