Jix Kꞌojle Eytoj Daniel Yul Jun Jolan Bꞌey Eecꞌ Noꞌ Bꞌalam
6
Jaꞌ naj rey Darío, jix yaoc 120 ebꞌ gobernador yet chi yilontoj ebꞌ jantaj wan conobꞌ eyoc yalan ẍejbꞌanil naj. 2 Jix yaon oc oxwanxa yel miman yopiso yibꞌan ebꞌ gobernador tuꞌ, yu yilon ebꞌ cꞌal steynen masanil tzetyetal ebꞌ, yet watxꞌ tzꞌajan chi yun yakꞌle chꞌen toolabꞌal tet naj rey tuꞌ. Jaꞌ xol ebꞌ miman yeloc apnoj yin yopiso tuꞌ, eyoc naj Daniel. 3 Jix txeclo el Daniel xol ebꞌ yet yaawilal tuꞌ, yutol watxꞌ cꞌal jix yute sbꞌa. Yu jun tuꞌ, yuxan jix snaꞌ naj rey yin yaon oc yin sat yaawilal bꞌey yul snación tuꞌ. 4 Jal wanxa ebꞌ yet yaawilal naj Daniel tuꞌ xin, jix sey ebꞌ tzet chi yun yakꞌon eyqꞌuey Daniel ebꞌ yin yopiso tuꞌ. Jaꞌ Daniel tuꞌ, caw jijem, watxꞌ snaꞌbꞌal, cꞌam cꞌal elkꞌan chi yunne, caw eyoc snaꞌbꞌal yin yopiso. Yu jun tuꞌ, yuxan cꞌam junoj tzetyetal jix skeꞌ yalon a ebꞌ yin, 5 yuxan jix oc cꞌal ian ebꞌ snaꞌoni, catuꞌ jix yalon ebꞌ jaxca tiꞌ: Cꞌam junoj tzet chi skeꞌ kalon a yin Daniel tiꞌ, jaꞌ yu scuybꞌanil chi cu naꞌon a junoj kꞌane yin, ẍi ebꞌ.6 Yu jun tuꞌ, yuxan jix slatiꞌne sbꞌa ebꞌ yaaw tuꞌ, yet chi too yalon ebꞌ tet naj rey Darío. Jaꞌ yet eyecꞌ ebꞌ sattaj naj tuꞌ, jix yalon ebꞌ jaxca tiꞌ:
—Jaach rey Darío, ey ojabꞌ cꞌal ja wopiso. 7 Jix cu yambꞌa oc cu bꞌa cu masanil jaon yaaw keoc bꞌey yul nación tiꞌ. Jix cu naꞌoni tol cha waꞌne junoj sleyalil, catuꞌ chi al-le xol masanil ánima bꞌey junjun conobꞌ eyoc yalan ja chejbꞌanil tiꞌ, tol cꞌam junoj mactxequel chi yiꞌey sbꞌa tet sdiosal tam wal skꞌanon tzet chi yoche tet junoj yet animail yin junoj xꞌaaw, tol asanne ojabꞌ ey jaach, jaach rey, chi yal sbꞌa ebꞌ. Jaꞌ mactxequel cꞌam chi sjije jun ley tuꞌ, tol ojabꞌ tꞌinan cꞌal skꞌojle eytoj yul jolan bꞌey ey noꞌ bꞌalam. 8 Yu jun tuꞌ xin, jaach rey, akꞌ firmar jun ley tiꞌ, yet watxꞌ cꞌam mac chi skeꞌ sqꞌuexoni, jatacꞌalaꞌ tzet chi yal cu leyal jaon Medos cꞌal Persas jon tiꞌ, tol cꞌam chi skeꞌ sqꞌuexcha tzet chi yalaꞌ, ẍi ebꞌ.
9 Yu jun tuꞌ xin, jix yakꞌon firmar jun ley tuꞌ naj rey. 10 Jaꞌ yet jix yabꞌen Daniel jun tuꞌ, tol tuxa jix al-le el jun ley tuꞌ, jix too bꞌey sna catuꞌ jix atoj bꞌey yul jun scuarto naat eyaoj, catuꞌ jix sjajon swentanail jacantoj bꞌey yetcꞌulaltoj Jerusalén, jix ey kaanoj, jix txali tet Dios. Oxel jix txali yet jun cꞌual tuꞌ, jaxca chi yun cꞌaltaꞌa. 11 Jal wan winaj tuꞌ xin, jix syambꞌa oc sbꞌa ebꞌ, jix yilon ebꞌ tol lalan xali Daniel yu yalon sbꞌa tet Dios. 12 Jix too ebꞌ scꞌatan naj rey tuꞌ. Jix bꞌet yalon ebꞌ yu jun ley tuxa jix al-le el tuꞌ, jix yalon ebꞌ jaxca tiꞌ:
—Tuxa jix ja wakꞌ al-le el jun ley bꞌey chi yal jaxca tiꞌ: Yal cꞌal mactxequel chi yal sbꞌa tet sdiosal, ma tet junojxa txꞌoj animail yin jun xꞌaaw, catuꞌ manaj tet naj rey chi skꞌan tzet chi yoche, sowalil tol chi kꞌojle eytoj bꞌey jolan bꞌey eyecꞌ noꞌ bꞌalam, ẍi. ¿Man mi yeloj jaxca tuꞌ? ẍi ebꞌ.
—Jaxca ton tuꞌ jix yunne. Jaꞌ jun ley tuꞌ sowalil chi jijelei, jatacꞌalaꞌ cu leyal jaon Medos cꞌal Persas jon tiꞌ, tol cꞌam chi skeꞌ sqꞌuexle tzet chi yalaꞌ, ẍi naj rey.
13 Catuꞌ jix oc cꞌal ian ebꞌ yalon tet naj rey jaxca tiꞌ:
—Jaꞌ Daniel, naj jix iꞌletej bꞌey Judá, cꞌam chi sjije. Cꞌam chi xiw niꞌoj ey jaach, jaach rey, cꞌam niꞌoj yeloc apnoj jun ley tuꞌ yul sat. Tuxa jix kilaꞌ tol oxel chi txali tet sDiosal yin junjun cꞌu, ẍi ebꞌ.
14 Jaꞌ yet jix yabꞌen naj rey jaxca tuꞌ, caw jix oc yin cuscꞌulal masanil jun cꞌual tuꞌ, jix snaꞌ tzet chi yun scol-le el Daniel yu. 15 Jaꞌ yet lalanxa stoo cꞌu, jix syambꞌa pax oc sbꞌa wan winaj tuꞌ sattaj naj rey, jix yalon ebꞌ jaxca tiꞌ:
—Jaach rey, ja wotaj, tol jatacꞌalaꞌ cu ley jaon Medos cꞌal Persas jon tiꞌ, ta ey junoj kꞌane ma junoj ley tol chi yal naj rey, cꞌamxa chi skeꞌ yecꞌtoj, ẍi ebꞌ.
16 Jaꞌ yet cꞌamto chi kꞌojle eytoj Daniel xol noꞌ bꞌalam, jix yalon naj rey tol chi iꞌletej Daniel, jix yalon tet jaxca tiꞌ:
—Toloj wal oj jaach col-le el yu ja Diosal tol cha wakꞌ servil tuꞌ, ẍi naj rey. Catuꞌ jix kꞌojle eytoj Daniel yul jun jolan bꞌey eeytoj noꞌ bꞌalam.
17 Yin eymanil jix kꞌojle eytoj Daniel bꞌey xol noꞌ bꞌalam tuꞌ yu ebꞌ, catuꞌ jix yiꞌontej jun chꞌen chꞌen jix smajchen canoj, jix yaon can oc sello naj rey yin chꞌen, jun chi skꞌan yin yopiso, cꞌal sello ebꞌ mimej yaaw eyoc yin yopiso yetoj, yet watxꞌ cꞌam mac chi tenon ecꞌ tzet jix al-le yin Daniel tuꞌ. 18 Jix lawi tuꞌ, jix too naj rey bꞌey spalacio. Ma xa lowoj, ma xa yakꞌ iꞌletej ebꞌ sonlom yet chi bꞌitni ebꞌ sattaj yet chi tzala scꞌul. Jix too weyoj, junelne ma oc sweyan yet jun akꞌbꞌal tuꞌ. 19 Jix pet a waanoj, catuꞌ jix too lemna stiꞌ jolan bꞌey eyecꞌ Daniel xol noꞌ bꞌalam tuꞌ. 20 Jaꞌ yet jix apni oc naj rey bꞌey scawilal tuꞌ, catuꞌ jix awi tet Daniel. Yin cusiltaj xacꞌal jix yute awoj sbꞌa, jix yaloni:
—Daniel, jaach ẍejabꞌ Dios iquis, ¿jix mi skeꞌ yu ja Diosal tol cha wakꞌ servil tuꞌ jaach scolon el tet noꞌ bꞌalam tuꞌ? ẍi naj.
21 Jix takꞌwi Daniel jaxca tiꞌ:
—Jaach rey, ey ojabꞌ cꞌal ja wopiso. 22 Jaꞌ jin Diosal jix ẍejtej yángel, jaꞌ jix majchen stiꞌ noꞌ bꞌalam tiꞌ, yuxan cꞌam cꞌal niꞌoj tzet jix jin yute noꞌ, yotaj Dios tol cꞌam niꞌoj jin penail. Catuꞌ cꞌam cꞌal tzetyetal pena jix wun ey jaach, jaach rey, ẍi Daniel.
23 Yu jun tuꞌ, caw jix tzala a naj rey tuꞌ sicꞌlebꞌil, catuꞌ jix ẍejon naj rey yiꞌle atej naj Daniel bꞌey xol noꞌ bꞌalam tuꞌ. Jaꞌ yet jix iꞌle atej naj tuꞌ xin, jix yilon ebꞌ tol cꞌam cꞌal niꞌoj bꞌey yasinajtoj niꞌoj smimanil naj, yutol asanne sDiosal eyoc yipoj scꞌul. 24 Jix lawi tuꞌ xin, catuꞌ jix yalon naj rey tol chi too tit ebꞌ jix alon a kꞌane yin Daniel tuꞌ, catuꞌ jix kꞌojletoj ebꞌ yetoj yistil cꞌal yetoj yuninal ebꞌ bꞌey xol noꞌ bꞌalam tuꞌ. Cꞌam tocꞌal chi eyqꞌuey ebꞌ xol noꞌ, catuꞌ jix tit jucna noꞌ yin ebꞌ, kocꞌ xacꞌal jix yuntoj sbꞌajil ebꞌ yu noꞌ.
25 Jix lawi tuꞌ, jix stzꞌibꞌentoj kꞌane naj rey Darío tet masanil ebꞌ ánima cꞌal yin junjun tiꞌeal bꞌey wan conobꞌ eyoc yalan ẍejbꞌanil tuꞌ, jix yalontoj: Chi watoj scawil je cꞌul, ey ojabꞌ watxꞌcꞌulal snan je xol je masanil. 26 Chi walon ey jex je masanil bꞌey chi lawi apnoj wakꞌon yaawil tiꞌ, tol miman ojabꞌ yeloc apnoj sDiosal Daniel yul je sat.
Yutol Dios iquis toni, catuꞌ ey cꞌal ecꞌ yin tobꞌalkꞌinal. Cꞌam bꞌakꞌin chi ecꞌ el yopiso, cꞌam cꞌal slawubꞌal sjelanil.
27 Jaꞌ sDiosal Daniel tiꞌ, asanne Naj Colwawom, ja chi colon el junoj mactxequel eyoc yul skꞌabꞌ camich. Jaꞌ chi txꞌoxon junoj tzetyetal tol qꞌueyubꞌtaj yoc bꞌey satcan cꞌal bꞌey sat txꞌotxꞌ tiꞌ. Jaꞌ jix colon el Daniel tet noꞌ bꞌalam, ẍi toj naj rey.
28 Catuꞌ jix oc cꞌal Daniel tuꞌ yin yopiso yet eyoc naj Darío yin reyal, yetoj cꞌal pax yet eyoc naj Ciro a Persia yin reyal.