Wan Kꞌane Jix Tzꞌibꞌele Oc Bꞌey Sat Xaan
5
Jaꞌ naj Belsasar, sreyal Babilonia, jix yaoc jun miman kꞌin, cꞌal jun miman loꞌo jix swaꞌne, Jix yawten jun mil ebꞌ miman yeloc apnoj yin yopiso bꞌey yul snación tuꞌ. Jix low ebꞌ cꞌal yucꞌwi an yetoj ebꞌ. 2-3 Lalanxa ya teꞌ an tuꞌ sjolom naj rey Belsasar tuꞌ, catuꞌ jix yalon naj tol chi iꞌletej wan scopa cꞌal secꞌ tol oro cꞌal eloj, wan yiꞌnajtej smam jaꞌton Nabucodonosor bꞌey yul stemplo Dios bꞌey Jerusalén. Jaꞌ yul wan copa cꞌal wan secꞌ jix bꞌet iꞌletej tuꞌ, jatuꞌ jix yucꞌ an yetoj ebꞌ ix yistil yetoj cꞌal wanxa ebꞌ ix scaabꞌ yistil naj, cꞌal yetoj masanil mac eyecꞌ yetoj bꞌey jun kꞌin tuꞌ. 4 Uqꞌuem an xacꞌal el ebꞌ masanil, catuꞌ jix yiꞌon a can sbꞌi sdiosal ebꞌ tol oro, plata, bronce, hierro, teꞌ cꞌal chꞌen chꞌen cꞌal eloj.5 Jaꞌ yet jun txolan tuꞌ, catuꞌ jix xꞌoxon a sbꞌa jun kꞌabꞌe bꞌey xol sajkꞌinal yu wan tzejtebꞌal eyocoj, catuꞌ jix cꞌoli stzꞌibꞌli oc bꞌey sat xaan bꞌey yul na tuꞌ. Jaꞌ yet jix yilon naj rey jun kꞌabꞌe chi tzꞌibꞌli tuꞌ, 6 saj xacꞌal jix yun yili sat naj yu xiwcꞌulal. Tuxa cꞌal jix bꞌeybꞌon a yajan jix pax xacꞌal yip. 7 Eyman jix el yaw naj, jix yawten ebꞌ jelan snaꞌbꞌal, ebꞌ chi naꞌcha el tzet utbꞌil yeoc weycan, cꞌal ebꞌ naꞌom el kꞌane. Jix yalon tet ebꞌ jaxca tiꞌ:
—Jaꞌ mac chi skeꞌ yawten a cꞌal yilon wan tzetyetal tzꞌibꞌebꞌil oc tuꞌ, catuꞌ chi yalon ey jin tzet chi yal yeloc apnoj, chi ale oc junoj pichile púrpura yin, catuꞌ chi ale cꞌal pax oc junoj cadena oro yin snukꞌ, catuꞌ chi oc yin yet yox yaawil bꞌey chi wakꞌ wopiso tiꞌ, ẍi.
8 Masanil ebꞌ chi yal sbꞌa jelanil, cꞌal ebꞌ eyoc yopiso yin yakꞌon naꞌbꞌale tet naj rey, jix octoj ebꞌ bꞌey yul jun cuarto tuꞌ, cꞌam cꞌal junoj ebꞌ jix skeꞌ snaꞌcha el yu tzet chi yal yeloc apnoj, cꞌal skocꞌ alnen el tet naj rey tuꞌ. 9 Catuꞌ jix xiw xacꞌal a naj rey Belsasar tuꞌ, saj xacꞌal jix yun yili sat. Jaꞌ masanil ebꞌ winaj eyecꞌ yetoj tituꞌ, cꞌamxa chi naꞌcha yu ebꞌ tzet chi yunne. 10 Jaꞌ ix reina, jaꞌton ix xutx naj rey tuꞌ, jix yabꞌ ix yel yaw naj rey tuꞌ, cꞌal yetoj ebꞌ awtebꞌil yin jun kꞌin tuꞌ, jix octoj ix bꞌey yul scuartoal bꞌey eyoc kꞌin tuꞌ, jix yalon jaxca tiꞌ:
—Jaach rey, ey ojabꞌ cꞌal ja wopiso. Cꞌam ojabꞌ chach oc il, cꞌam ojabꞌ chach sajbꞌi el yu xiwcꞌulal. 11 Yutol jaꞌ bꞌey ja nación bꞌey cha wakꞌ yaawil tiꞌ, ey jun winaj chi skeꞌ snaꞌcha el yu. Tol eyoc sjelanil Yespíritu Dios yin. Jaꞌ yul stiempoal naj ja mam, jaꞌ jun winaj tuꞌ jix xꞌox eloj tol ey jun snaꞌbꞌal caw watxꞌ, jelan, caw ey snaꞌbꞌal sicꞌlebꞌil jaxca junoj dios. Yu jun tuꞌ, yuxan jaꞌ naj rey Nabucodonosor, naj ja mam, jaꞌ jix aon oc jun winaj tuꞌ yin syaawiloj ebꞌ jelan, cꞌal ebꞌ naꞌom el kꞌane, cꞌal ebꞌ jelan snaꞌbꞌal bꞌey yul snación tiꞌ. 12 Jaꞌ jun winaj tuꞌ, Daniel yoc sbꞌi, jaꞌ ja mam tuꞌ jix qꞌuexon sbꞌi yin Beltsasar. Yel xacꞌal txꞌoj yel sjelanil yu jantaj tzet yotaj, yet chi skeꞌ snaꞌcha el junoj weyiche yu, catuꞌ chi skeꞌ snaꞌcha el yu tzet chi yal yeloc apnoj junoj kꞌane tol yaꞌtaj snaꞌcha eloj, cꞌal swaꞌnen yeoc junoj tzet yaꞌtaj yeocoj. Awtele ojabꞌ Daniel tuꞌ xin. Jaꞌ oj akꞌon ja wotajne eloj tzet chi yal yeloc apnoj wan jix tzꞌibꞌele oc bꞌey sat xaan tuꞌ, ẍi ix tet naj rey.
13 Jix awtele Daniel tuꞌ xin, jix iꞌletoj sattaj naj rey, catuꞌ jix skꞌanlen tet jaxca tiꞌ:
—¿Jaach mi tiꞌ cha wij Daniel, iꞌbꞌil jaachtej bꞌey Judá jaxca presowomal yu Nabucodonosor, naj jin mam? 14 Jix al-le ey jin tol abꞌ eyoc sjelanilal Yespíritu Dios ja win, tol abꞌ caw ey ja naꞌbꞌal, caw ey ja jelanil, 15 yuxan jix jaach wawte. Ilaꞌ jix wawte masanil ebꞌ chi yaloc sbꞌa jelanil, cꞌal ebꞌ atxum bꞌey yul nación tiꞌ, yet chi yalon ebꞌ yu wan kꞌane tzꞌibꞌebꞌil oc sat xaan tiꞌ, cꞌal yalon ebꞌ ey jin tzet chi yal yeloc apnoj. Cꞌam cꞌal junoj ebꞌ jix naꞌcha el niꞌoj yu. 16 Yuxan jix al-le ey jin, tol abꞌ chi skeꞌ snaꞌcha el ja wu jantaj kꞌane tol yaꞌtaj snaꞌcha eloj, yu jun tuꞌ xin, awte a wan kꞌane tiꞌ, catuꞌ cha walon ey jin tzet chi yal yeloc apnoj. Oj wakꞌ ale oc an pichile tol púrpura ja win, catuꞌ oj ale oc junoj cadena oro yin ja nukꞌ, catuꞌ oj jaach oc yin yet yox yaawilal bꞌey yul jin nación tiꞌ, ẍi naj rey tuꞌ.
17 Catuꞌ jix yalon Daniel jaxca tiꞌ:
—Can ojabꞌ can ja saꞌbꞌeal tuꞌ ja wetoj jaach rey, catuꞌ chi skeꞌ ja wakꞌon jun opiso tuꞌ tet junojxa, asan xin, oj wal cꞌaltaꞌ ey jaach tzet chi yal yeloc apnoj wan kꞌane tzꞌibꞌebꞌil oc bꞌey sat xaan tiꞌ.
18 Jaach rey, jaꞌ Dios, Naj tol Miman Yeloc Apnoj, jaꞌ jix akꞌon yopiso ja mam Nabucodonosor tuꞌ, yet watxꞌ miman yeloc apnoj sjelanil yet chi bꞌinale ecꞌoj. 19 Jaꞌ yu sjelanil yin yopiso jix akꞌle tuꞌ, yuxan jix xiw masanil ánima tet bꞌey junjun conobꞌ cꞌal junjun tiꞌeal, tol miman yeloc apnoj naj yul sat ebꞌ. Chi skeꞌ smakꞌon camoj ma chi yakꞌ can yin yiquisal jatacꞌalaꞌ bꞌey chi yoche scꞌul. Ey mac jix iꞌle a can yu, ey cꞌal pax mac tol yeynajil jix utele yu, jatacꞌalaꞌ bꞌey chi yoche scꞌul. 20 Jaꞌ yet jix smeynen sbꞌa yin yopiso tuꞌ, jix etex el sbꞌeybꞌal, jix iꞌle ecꞌ yopiso yin sreyal tuꞌ, cꞌal smimanbꞌilal. 21 Jix ujtele el xol ebꞌ yet animail, jix qꞌuexchatoj snaꞌbꞌal jaxca noꞌ noꞌ. Junne xacꞌal jix eecꞌ yetoj noꞌ xol-laj teꞌal bꞌuru. Jix sloꞌon cꞌultaj jaxca noꞌ wacax, jix eyqꞌuey yal akꞌbꞌal yibꞌan smimanil masantaꞌcꞌal jix naꞌcha el yu, tzet utbꞌil yeoc Dios, Naj Tol Miman Yeloc Apnoj, tol asan ey yopiso yibꞌan junjun conobꞌlaj, jaꞌ Naj chi aon oc ebꞌ ánima yin yaawilal, jatacꞌalaꞌ mac chi yoche scꞌul chi yaoc junoj yin yopiso. 22 Jal tinaniꞌ xin, jaach rey Belsasar, tol scꞌaal jaach naj tuꞌ, caxcꞌal ja wotaj tzet jix eloc naj, man yu oj tuꞌ, yeynajilal cha wute niꞌoj ja bꞌa. 23 Jaꞌ tzet jix ja wunne, tol yel xacꞌal jix ja meyne ja bꞌa sattaj Naj yaaw ey bꞌey satcan. Jix ja wakꞌon iꞌletej wan copa cꞌal wan secꞌ bꞌey stemplo Dios bꞌey sat ja meẍa. Jaꞌ yul wan tuꞌ, jix ja wucꞌ vino yetoj masanil ebꞌ awtebꞌil ja wu yin kꞌin jix ja waocoj, catuꞌ jix je yiꞌon a can wan dios tol oro, plata, hierro, teꞌ cꞌal chꞌen, jaꞌton wan dios tol cꞌam chi skeꞌ yiloni, cꞌam chi skeꞌ yabꞌeni, tam wal ey niꞌoj tzetyetal yotaj. Catuꞌ manaj tet Dios jix ja wal watxꞌ kꞌane, man ja wotaj oj, ta tol ja yul skꞌabꞌ Naj ey ja cawil, catuꞌ jacꞌal pax Naj chi naꞌon tzet oj ja wunne. 24 Yu jun tuꞌ, yuxan jaꞌ Dios jix aontej jun kꞌabꞌe jix tzꞌibꞌen wan kꞌane tiꞌ: 25 MENE, MENE, TEKEL, PARSIN. 26 Jaꞌ wan kꞌane tiꞌ, jaxca tiꞌ chi yal yeloc apnoj: MENE: Tuxa jix snaꞌ Dios, tol jayebꞌxane cꞌual catuꞌ oj jul slawubꞌal ja wopiso. 27 TEKEL: Tuxa jix jaach echele yul echbꞌal, catuꞌ manxa tzꞌajanoj ja walil. 28 PARSIN:a Jaꞌ ja conobꞌ eyoc yalan ja chejbꞌanil bꞌey cha wakꞌ yaawilal, tuxa jix iꞌle ecꞌ ey jaach, yin caabꞌ tujan oj yun spoꞌole ecꞌoj, catuꞌ oj oc can yul skꞌabꞌ ebꞌ a Medos yetoj ebꞌ Persa, ẍi Daniel.
29 Jix lawi tuꞌ xin, jix ẍejon naj rey Belsasar yale oc an pichile púrpura yin Daniel. Jix ale oc jun chꞌen cadena oro yin snukꞌ, jix yalon tet masanil ánima tol jaꞌ yet jun txolan tuꞌ jix oc can yin yet yox yaawilal, yet chi yilontoj jantaj conobꞌ eyoc yalan ẍejbꞌanil naj rey.