Syaxkꞌainajil Snaꞌbꞌal Cꞌal Yecꞌnajilal Naj Rey Nabucodonosor
4
Jix yatoj kꞌane naj rey Nabucodonosor, bꞌey masanil conobꞌlaj eyoc yalan ẍejbꞌanil, jix yalon jaxca tiꞌ:Jain rey Nabucodonosor jin tiꞌ, chi wakꞌ scawil je cꞌul je masanil jex conobꞌ, cꞌal nación yal cꞌal tzet tiꞌeal che yalaꞌ, jaꞌton masanil jex tol caan jex bꞌey sat txꞌotxꞌ txꞌotxꞌ tiꞌ. 2 Chi yoche jin cꞌul tol che yotajne el je masanil tzettaj yetal tol qꞌueyubꞌtaj xacꞌal tzet jix yun Dios win an, Naj Tol Miman Yeloc Apnoj. 3 Yel xacꞌal qꞌueyubꞌtaj yeoc jantaj tzet chi yunne, manxa jantajoj yipalil. Yaaw ton Naj, cꞌam bꞌakꞌin chi lawi ey yopiso yin yakꞌon yaawil xol ebꞌ ánima.
4 Jain Nabucodonosor jin tiꞌ, jix jin eecꞌ yin tzalacꞌulal bꞌey jin palacio, caw ey jin bꞌeomal. 5 Jaꞌ yet jun akꞌbꞌal, yet lalan jin weyi, jix oc jun jin weyich. Jaꞌ tzet jix wil tuꞌ, caw jix jul xiwcꞌulal win yu. 6 Yu jun tuꞌ, jix wawten masanil ebꞌ chi naꞌon el junoj kꞌane ey bꞌey Babilonia tiꞌ, yu yalon ebꞌ ey jin tzet chi yal yeloc apnoj jin weyich tuꞌ. 7 Jix jin yambꞌa oc masanil ebꞌ jelan, ebꞌ atxum, ebꞌ chi naꞌcha el tzet utbꞌil yeoc weycan, cꞌal ebꞌ naꞌom el kꞌane, jix walon jin weyich tuꞌ tet ebꞌ, cꞌam cꞌal junoj ebꞌ jix skeꞌ yalon el ey jin tzet chi yal yeloc apnoj jin weyich tuꞌ. 8 Yin xa slawubꞌal xin, catuꞌ jix jul Daniel, jaꞌton chi yij cꞌal pax Beltsasar, jaxca yoc sbꞌi jin diosal, tol eyoc sjelanil Dios yin, catuꞌ jix walon jin weyich tuꞌ tet jaxca tiꞌ: 9 Jaach Beltsasar, tol syaawil jaach ebꞌ chi skeꞌ snaꞌcha el junoj kꞌane yu, wotaj tol eyoc sjelanil Yespíritu Dios ja win, catuꞌ chi naꞌcha el masanil tzetyetal tol qꞌueyubꞌtaj yoc ja wu. Yuxan chi wal jin weyich ey jaach, cꞌal jantaj tzetyetal jix wilaꞌ, catuꞌ oj ja walon ey jin tzet chi yal yeloc apnoj. 10 Jaꞌ yet telan jin ey jin weyi, jix wiloni:
Jaꞌ bꞌey snan sat txꞌotxꞌ txꞌotxꞌ tiꞌ, jix wil jun teꞌ teꞌ caw miman steel.
11 Jix chꞌibꞌ cꞌal a jun teꞌ teꞌ tuꞌ, caw yel xacꞌal miman jix yun yin. Jaꞌ ẍumuc teꞌ jix a tacꞌal apnoj bꞌey satcan, chi skeꞌ yil-le teꞌ bꞌey slawubꞌal txꞌotxꞌ txꞌotxꞌ tiꞌ.
12 Caw watxꞌ yili xaj, caw ecꞌal sat eyocoj, kꞌuxan mi chi yabꞌ sat tuꞌ sloꞌon masanil ánima. Jaꞌ masanil noꞌ noꞌ, chi oc noꞌ yewbꞌa sbꞌa bꞌey yenel teꞌ. Jaꞌ bꞌey yinlaj skꞌabꞌ teꞌ chi swaꞌne oc sweyubꞌ noꞌ tzꞌiquin, kꞌuxan chi yabꞌ sat teꞌ sloꞌbꞌeoj masanil tzet iquis bꞌey yul yibꞌankꞌinal tiꞌ.
13 Yajbꞌan telan jin ey weyoj, jix wilon yeytej jun ángel bꞌey satcan, tol chi steyne jun yul yibꞌankꞌinal tiꞌ. 14 Jix a yaw yin ipeal, jix yalon jaxca tiꞌ:
Kꞌajwej ey teꞌ teꞌ tuꞌ, tzokꞌwej el skꞌabꞌlaj teꞌ, catuꞌ che yiꞌon el xaj, che sajlemnen ecꞌ sat teꞌ tuꞌ masanil. Catuꞌ chi sajlem cantoj masanil noꞌ noꞌ eyoc yalan yenel teꞌ, cꞌal masanil noꞌ tzꞌiquin eyoc sweyubꞌ yinlaj skꞌabꞌ teꞌ.
15 Asanxane skꞌoal yetoj xeꞌ che yakꞌ can bꞌey txꞌotxꞌ txꞌotxꞌ tuꞌ, catuꞌ che kꞌalon ey yetoj chꞌen cadena tol hierro cꞌal bronce cꞌal eloj. Can ojabꞌ can xol cꞌultaj tituꞌ, ey ojabꞌ yal akꞌbꞌal yibꞌan jun winaj tuꞌ, jaꞌ ojabꞌ an cꞌultaj oj sloꞌ jaxca noꞌ xol-laj teꞌal noꞌ,
16 catuꞌ oj etex el snaꞌbꞌal. Laan xa oj yuntoj snaꞌbꞌal jaxca snaꞌbꞌal noꞌ noꞌ. Jaꞌ jun syaꞌilal oj oc yibꞌan tuꞌ, jujebꞌ abꞌil oj yakꞌa.
17 Jaon ángel jon tiꞌ, oj cu teyne yul yibꞌankꞌinal tiꞌ, jaon jix cu naꞌ tol chi jul jun syaꞌilal tiꞌ yibꞌan, yet watxꞌ chi yotajne el masanil ebꞌ ánima tol jaꞌ Dios, Miman Yeloc Apnoj, ey yopiso yibꞌan nacionlaj. Jaꞌ chi aon oc yopiso junoj mactxequel chi yoche, catuꞌ chi skeꞌ yaon oc yin syaawil bꞌey junoj nación junoj mactxequel tol yeynajil yeoc xol ebꞌ ánima, ẍi jun ángel tuꞌ.
18 Jaꞌton jin weyich tuꞌ jix wilaꞌ. Jaꞌ tinaniꞌ xin, jaach Beltsasar, al ey jin tzet chi yal yeloc apnoj, yutol caw cꞌam junoj ebꞌ jelan bꞌey yul jin conobꞌ bꞌey chi wakꞌ yaawil tiꞌ, chi skeꞌ snaꞌcha el jun tiꞌ yu. Yutol asanne jaach chi skeꞌ snaꞌcha el ja wu, yutol eyoc sjelanil Yespíritu Dios ja win, jin chi tet Daniel.
19 Jix lawi tuꞌ, jix yalon Daniel jaxca tiꞌ: Jaꞌton chi yij cꞌal pax Beltsasar, jix oc can tucan junoj txolan, catuꞌ jix somcha a snaꞌbꞌal. Jix walon tet jaxca tiꞌ: Jaach Beltsasar, cꞌam ojabꞌ chach oc il yu jun jin weyich tuꞌ, cꞌal yu tzet chi yal yeloc apnoj, jin chi tet. Catuꞌ jix yalon Beltsasar ey jin: ¡Ay, jaach rey, toloj wal jaꞌ yibꞌan ebꞌ chi jowi oc ja win chi eyqꞌuey jun tzet chi yal yeloc apnoj jun ja weyich tuꞌ! 20 Jaach rey, jaꞌ jun teꞌ teꞌ jix ja wil tuꞌ, tol caw miman jix yun steel, tol jix a tacꞌal apnoj bꞌey satcan, catuꞌ chi skeꞌ yil-le cꞌal teꞌ bꞌey masanil sat txꞌotxꞌ txꞌotxꞌ tiꞌ. 21 Caw watxꞌ yili xaj tuꞌ, caw ecꞌal sat eyocoj, kꞌuxan mi chi yabꞌ sat teꞌ sloꞌbꞌeoj masanil tzet iquis, catuꞌ chi yewbꞌa oc sbꞌa masanil noꞌ noꞌ bꞌey yalan yenel skꞌabꞌ teꞌ. Jix swaꞌne cꞌal pax oc sweyubꞌ noꞌ tzꞌiquin xol-laj skꞌabꞌlaj teꞌ. 22 Jaꞌ chi yal yeloc apnoj jun teꞌ tuꞌ, tol jaach ton jaach rey, tol jix ja mimanbꞌane ja bꞌa, masantaꞌcꞌal jix aapnoj ja bꞌinabꞌil bꞌey satcan. Jix majcha el masanil txꞌotxꞌ tiꞌ yu ja wopiso. 23 Catuꞌ jix ja wilon cꞌal pax yeytej jun ángel bꞌey satcan, jun steynemal yul yibꞌankꞌinal tiꞌ, yet jix yalon jaxca tiꞌ: Kꞌajwej ey teꞌ miman teꞌ tuꞌ, catuꞌ chi lawi eyoj, asanxane xeꞌ yetoj skꞌoal che yakꞌcanoj. Catuꞌ chi kꞌal-le can ey skꞌoal yetoj chꞌen cadena tol hierro cꞌal bronce. Chi cancan bꞌey xol-laj cꞌultaj, eyqꞌuey ojabꞌ yal akꞌbꞌal yibꞌan jun winaj tiꞌ, junne oj eecꞌ yetoj noꞌ noꞌ yin jujebꞌ abꞌil. 24 Jaꞌ tzet chi yal yeloc apnoj jun tiꞌ, jaꞌton jun Dios tol miman yeloc apnoj, jaꞌ chi alon ja wibꞌan, jaach rey, 25 tol oj jaach ujtele el xol ebꞌ ánima tiꞌ, catuꞌ oj jaach tojcan xol noꞌ noꞌ. Jaxa an cꞌultaj oj ja loꞌ jaxca noꞌ wacax, catuꞌ oj eyqꞌuey yal akꞌbꞌal ja wibꞌan. Jaxca tuꞌ oj yun ja wecꞌabꞌtoj yin jujebꞌ abꞌil, jaach rey, masantaꞌcꞌal oj naꞌcha el ja wu, jantaj yeoc yipalil jun Dios Tol Miman Yeloc Apnoj, tol miman yeoc yopiso yibꞌan ebꞌ ánima eyoc yin yopiso, catuꞌ jaꞌ chi aon oc junoj mactxequel yin reyal, jatacꞌalaꞌ bꞌey chi yoche scꞌul chi yaoc yin yaawil. 26 Jaꞌ jun kꞌane jix al-le tol chi cancan xeꞌ teꞌ teꞌ yetoj skꞌoal tuꞌ, chi yal yeloc apnoj tol oj jaach meltzo pax yin ja wopiso tiꞌ junelxa, yet oj naꞌcha el ja wu, tol jaꞌ Dios Yaaw yeoc bꞌey yul yibꞌankꞌinal tiꞌ. 27 Yu jun tuꞌ xin jaach rey, aoc masanil wan kꞌane chi wal tiꞌ yin ja cꞌul. Jichan ojabꞌ cꞌal cha wute ja bꞌa, cꞌam ojabꞌ cha wun spenail. Toloj wal cha bꞌejcan ja wunen spenail, catuꞌ chach colwa tet ebꞌ chi etexi. Ta jaxca tuꞌ, oj jaach eecꞌ yin tzalacꞌulal, cꞌal ya can masanil tzetyetal ey, ey jaach, ẍi Daniel tet naj rey Nabucodonosor.
28 Jix yun masanil wan kꞌane jix al-le tet naj rey Nabucodonosor tuꞌ. 29 Junxa wal abꞌil tuꞌ, catuꞌ jix atoj naj rey yet chi ecꞌabꞌ bꞌey spananil yibꞌan spalacio, bꞌey Babilonia, 30 jix yalon jaxca tiꞌ: Ilaꞌ wal yili miman conobꞌ Babilonia tiꞌ. Jain caw, yetoj wipalil, yu wopiso yuxan jix jin waꞌne a yili jun conobꞌ tiꞌ, yu xeclo eloj tol miman weloc apnoj, ẍi naj.
31 Lalantocꞌal yalon naj rey wan kꞌane tuꞌ, catuꞌ jix yabꞌen yoc jun kꞌane bꞌey satcan, jix yalon jaxca tiꞌ: Jaach rey Nabucodonosor, chi cam ja wabꞌen wan kꞌane tiꞌ, tol jaꞌ ja wopiso tuxa jix iꞌle ecꞌ ey jaach. 32 Oj jaach ujtele el xol ebꞌ ánima, catuꞌ oj jaach tojcan xol-laj noꞌ noꞌ. Jaꞌ an cꞌultaj oj ja loꞌ jaxca noꞌ noꞌ yin jujebꞌ abꞌil, masantaꞌcꞌal oj naꞌcha el ja wu tol jaꞌ Dios, tol Miman Yeloc Apnoj, ey yopiso yibꞌan masanil ánima, cꞌal yibꞌan masanil nacionlaj bꞌey sat txꞌotxꞌ txꞌotxꞌ tiꞌ. Jaꞌ chi aon oc junoj mactxequel yin yaawil, jatacꞌalaꞌ mac chi yoche scꞌul Dios, ẍi jun kꞌane tuꞌ.
33 Jaꞌ yet jun txolan tuꞌ, catuꞌ jix yunen tzet albꞌil xacꞌaltaꞌ el yibꞌan naj rey Nabucodonosor tuꞌ, jix ujtele can el xol ebꞌ ánima. Jaꞌ an cꞌultaj jix sloꞌ jaxca noꞌ wacax, catuꞌ jix eyqꞌuey yal akꞌbꞌal yibꞌan smimanil. Jix chꞌibꞌ xil cꞌal yiskꞌaj, laan jaxca yet noꞌ chii.
Jix Waꞌxi Oc Snaꞌbꞌal Naj Rey
34 Jix yalon cꞌal naj rey Nabucodonosor jaxca tiꞌ:
Yet jix lawi stiempoal syaꞌilal eyoc wibꞌan, jain Nabucodonosor jin tiꞌ, jix jin a tꞌanan bꞌey satcan, catuꞌ jix waꞌxi oc jin naꞌbꞌal. Jix walon watxꞌ kꞌane yin jun Dios tol Miman Yeloc Apnoj, jix wiꞌon a can sbꞌi jun Dios tol ey cꞌal ecꞌoj:
Yaaw ton Yin tobꞌalkꞌinal. Ey Cꞌal Yopiso yibꞌan junjun tujan icꞌaaleal ebꞌ ánima.
35 Cu masanil jaon ánima jon bꞌey sat txꞌotxꞌ txꞌotxꞌ tiꞌ, caw cꞌam niꞌoj keloc apnoj. Jal Dios xin, chi yun cꞌal tzet chi yoche scꞌul xol ebꞌ ey bꞌey satcan, cꞌal xol ebꞌ caan sat txꞌotxꞌ tiꞌ. Cꞌam mac chi skeꞌ smitxꞌon oc tucan skꞌabꞌ Dios, catuꞌ chi yalon tet, ¿tzet yuxan queytuꞌ cha wunne? man ẍi oj.
36 Jaꞌ yet jun txolan tuꞌ, jix meltzo jin naꞌbꞌal jix wabꞌe, jix jin oc can yin wopiso jix wabꞌe, cꞌal wiꞌon jin jelanil cꞌal jin mimanbꞌilal. Jaꞌ ebꞌ jin chejabꞌ yetoj ebꞌ miman yeoc yopiso bꞌey jin despacho, jix jin seyle ecꞌ yu ebꞌ. Jix jin oc pax yin yaawilal junelxa bꞌey jin nación, jix yiꞌon yip wopiso. Yel xacꞌal miman jix yun jin bꞌinabꞌil yintaj yet yalantoj.
37 Jaꞌ tinaniꞌ xin, jain caw chi wiꞌa can sbꞌi Naj Sreyal satcan, yutol jaꞌ masanil tzet chi yunne, watxꞌ cꞌal eloj, jichan cꞌal yin masanil, catuꞌ chi skeꞌ yiꞌon ey mac chi yaloc sbꞌa tol miman yeloc apnoj, ẍi naj rey Nabucodonosor.