Eyilal Tet Jun Echele Tol Oro Cꞌal Eloj
3
Jaꞌ naj rey Nabucodonosor, jix yakꞌ waꞌnele jun echele tol oro cꞌal eloj, ey 30 metro steel, oxebꞌ metro spimal. Jix yalon naj tol jatuꞌ chi waꞌxi ey bꞌey jun acꞌal chi yij Dura, yul yet Babilonia. 2-3 Jaꞌ yet jix lawi swaꞌxi ey jun echele tuꞌ, catuꞌ jix yawte masanil ebꞌ eyoc yin yaawilal bꞌey masanil yul snación tuꞌ, ebꞌ syaawilal ebꞌ soldado, ebꞌ gobernador, yetoj cꞌal ebꞌ eyoc yin yaawilal bꞌey yul-laj conobꞌlaj, ebꞌ chi cꞌubꞌan tumin, ebꞌ juez, yetoj cꞌal wanxa ebꞌ eyoc yin yaawilal, yet chi oc skꞌinal jun miman echele jix waꞌxi tuꞌ. Yuxan jix syambꞌa oc masanil ebꞌ mimej yaaw tuꞌ sattaj jun echele tuꞌ, catuꞌ jix chaꞌle skꞌinal jun echele jix yakꞌ waꞌxoj naj rey tuꞌ. 4 Jaꞌ jun mactxequel eyoc yibꞌan yijbꞌan yet chi ẍaꞌon el yich kꞌane xol jun miman yambꞌabꞌail tuꞌ, ip jix yun yalon jaxca tiꞌ: Jex conobꞌ, abꞌwej je masanil, jantaj jex jix jex tit bꞌey masanil conobꞌlaj, cꞌal nacionlaj, cꞌal junjun tujan tiꞌeal. 5 Jaꞌ yet oj je yabꞌen yet oj el yaw masanil son, jaxca flauta, waabꞌ, arpa, salterio, trompeta cꞌal zampoña, cꞌal masanil wan mitxꞌkꞌabꞌe chi kꞌanbꞌalnele yin sonal, jaꞌ yet tuꞌ chex ey kaan je masanil sattaj jun miman echele jix yakꞌ waꞌxoj naj rey Nabucodonosor tiꞌ. 6 Masanil mactxequel tol man oj ey kaanoj cꞌal yoc yin eyilal tet jun echele tiꞌ, yin eymanil oj kꞌojletoj yul jun jorna tol chi chaw skꞌakꞌal, ẍi.7 Yu jun tuꞌ xin, jaꞌ masanil ebꞌ ánima yaman ecꞌ tituꞌ, jaꞌ yet jix yabꞌen ebꞌ yel yaw masanil son, catuꞌ jix ey kaan masanil ebꞌ, jix yiꞌon ey sbꞌa ebꞌ tet jun echele tol oro cꞌal el tuꞌ.
8 Jaꞌ yet tuꞌ ey wan ebꞌ Caldeo jix jul alon tet naj rey Nabucodonosor, yu wan ebꞌ a Judá eyoc xol ebꞌ tuꞌ. 9 Jix yalon ebꞌ jaxca tiꞌ:
—Jaach rey, ey ojabꞌ ja wopiso. 10 Tol jaach jix ja walaꞌ tol jaꞌ yet oj a yaw masanil son, catuꞌ chi ey kaan masanil ánima yin eyilal sattaj jun miman echele tiꞌ. 11 Jaꞌ mactxequel tol cꞌam chi sjije yey kaan tet, sowalil chi kꞌojle cantoj bꞌey yul jorna tol chi chaw skꞌakꞌal. 12 Yu jun tuꞌ xin, ey wan ebꞌ a Judá, jaꞌton Sadrac, Mesac yetoj Abed-negó, jaꞌton ebꞌ jix ja wakꞌ mimej opiso yibꞌan yul yet Babilonia tiꞌ, cꞌam niꞌoj yeloc apnoj yul sat ebꞌ. Cꞌam chi oc ebꞌ yin eyilal tet wan ja diosal tiꞌ, tam wal chi ey kaan ebꞌ tet jun miman yechel ja diosal jix ja wakꞌ waꞌnele tiꞌ, ẍi ebꞌ Caldeo tuꞌ.
13 Jaꞌ yet jix yabꞌen naj rey Nabucodonosor jun tuꞌ, caw jix tit sjowal naj, catuꞌ jix yaloni tol chi iꞌletej ebꞌ oxwan tuꞌ sattaj. Jaꞌ yet jix apni oc Sadrac, Mesac cꞌal Abed-negó sattaj naj, 14 catuꞌ jix skꞌanlen el naj rey tet ebꞌ jaxca tiꞌ:
—¿Tumi yel jaex tiꞌ ma jex oc yin eyilal tet wan jin diosal, cꞌal tet yechel jin diosal jix wakꞌ waꞌnele aoj? 15 Jaꞌ tinaniꞌ xin, ta bꞌejan je cꞌul, jaꞌ yet oj je yabꞌen yel yaw son tuꞌ junelxa, catuꞌ oj jex oc yin eyilal sattaj jun echele jix wakꞌ waꞌnele a tuꞌ, cꞌam tzet oj jex ionoj. Ta cꞌam che jije je yey kaan yin eyilal tet xin, jaꞌ yet jun txolan tuꞌ, oj jex kꞌojle atoj bꞌey yul jun jorna tol chi chaw skꞌakꞌal, jaxca tuꞌ oj jex wute. ¿Tzet to wal diosal, oj skeꞌ jex scolon el yul jin kꞌabꞌ? ẍi naj.
16 Jix takꞌwi Sadrac, Mesac cꞌal Abed-negó tet naj rey, jix yalon ebꞌ jaxca tiꞌ:
—Jaach rey, cꞌamxa tzet watxꞌ kalon ja wetoj yin jun tiꞌ. 17 Jaꞌ cu Diosal jon, bꞌey chi cu oc cꞌaltaꞌ yin eyilal, chi skeꞌ yu cu scolon el bꞌey xol kꞌakꞌ bꞌey yul jorna tiꞌ, cꞌal bꞌey masanil tzet chi yoche ja cꞌul cha waoc kibꞌan jon, jaꞌ oj cu colon el yul ja kꞌabꞌ. 18 Caxcꞌal man oj jon col-le el yu jon xin, chi kakꞌ xacꞌal ja wotajne el jaach rey, tol man oj cu ey cꞌaltaꞌ kaan tet wan ja diosal tuꞌ, tam wal tet jun yechel ja diosal tol oro jix ja waꞌne a tuꞌ, ẍi ebꞌ.
Ebꞌ Oxwan Achꞌe Jix Colcha El Xol Kꞌakꞌ Yul Jorna
19 Jaꞌ yet jix yabꞌen naj rey Nabucodonosor wan skꞌane ebꞌ naj achꞌe tuꞌ, caw jix cajbꞌi xacꞌal el sat naj yu stit sjowal, catuꞌ jix yalon naj tol chi akꞌle kajbꞌoj skꞌakꞌal jun jorna tuꞌ jujelojxa, ecꞌbꞌan jaxca cꞌaltaꞌ chi yun yatoj skꞌakꞌal. 20 Catuꞌ jix chejle wan ebꞌ soldado caw ey yip, yet chi kꞌal-le ey Sadrac, Mesac cꞌal Abed-negó, catuꞌ chi kꞌojle atoj ebꞌ bꞌey xol xaj kꞌakꞌ bꞌey yul jorna tuꞌ. 21 Jaꞌ ebꞌ oxwan achꞌe tuꞌ eyoc spichil ebꞌ chi skꞌan yin yopiso bꞌey eyocoj, catuꞌ jix kꞌal-le ey ebꞌ, jix kꞌojle atoj ebꞌ bꞌey xol xaj kꞌakꞌ yul jorna tuꞌ. 22 Yutol jaꞌ naj rey jix alon jun ley tuꞌ, yet xacꞌal jun txolan tuꞌ jix jijele tzet jix yal naj. Caw jow xa skꞌakꞌal jun jorna tuꞌ, yuxan jaꞌ yet jix kꞌojle atoj ebꞌ naj achꞌe tuꞌ yu ebꞌ soldado tuꞌ, jix elol chulna xaj kꞌakꞌ yin ebꞌ soldado tuꞌ, catuꞌ jix cam ebꞌ yu kꞌakꞌ tuꞌ. 23 Jal pax ebꞌ oxwan achꞌe tuꞌ xin, kꞌalbꞌil cꞌal ey ebꞌ jix eyqꞌuey ebꞌ xol kꞌakꞌ bꞌey yul jorna tuꞌ.
24 Yin xacꞌal eymanil jix a jucna naj rey Nabucodonosor, jix xiwa naj, jix yalon tet ebꞌ yaaw eyecꞌ tituꞌ jaxca tiꞌ:
—¿Tumi man oxwanne oj ebꞌ achꞌe jix je yakꞌ kꞌal-leoj, catuꞌ jix je kꞌojon atoj ebꞌ bꞌey xol kꞌakꞌ tuꞌ? ẍi naj.
—Jaxca ton tuꞌ, jaach rey, ẍi ebꞌ.
25 —Jaꞌ chi yun wilon atoj jain tiꞌ, ey canwan ebꞌ chi wilaꞌ, tol jajbꞌil el ebꞌ, catuꞌ chi ecꞌabꞌ ebꞌ bꞌey snan xol kꞌakꞌ tuꞌ chi wilaꞌ, cꞌam tzet chi iꞌon niꞌoj ebꞌ. Jaꞌ jun yet scan tuꞌ, laan yili jaxca junoj scꞌaal Dios, ẍi naj.
26 Jix lawi yalon naj Nabucodonosor jun tuꞌ, jix sjitzontoj sbꞌa bꞌey scawilal stiꞌ jun jorna tuꞌ, jix yalon jaxca tiꞌ:
—Sadrac, Mesac cꞌal Abed-negó, ẍejabꞌ jex Dios, Naj Tol Miman Yeloc Apnoj, elanwejtej, titanwej titiꞌ, ẍi naj.
Jix eltej ebꞌ yoxwanil xol xaj kꞌakꞌ tuꞌ. 27 Jix lawi tuꞌ, jix oc bꞌulna masanil ebꞌ yaaw yul jun nación tuꞌ cꞌal ebꞌ chi aon oc snaꞌbꞌal naj rey, yet chi yilon ebꞌ oxwan achꞌe tuꞌ, tol ma cꞌal tzꞌaꞌtoj niꞌoj smimanil ebꞌ naj yu xaj kꞌakꞌ tuꞌ. Jix cam yilon ebꞌ, tol cam cꞌal niꞌoj xil sjolom ebꞌ naj jix tzꞌaꞌtoj, tam wal niꞌoj spichil ebꞌ jix tzꞌaꞌi, cꞌam cꞌal niꞌoj sabꞌ kꞌakꞌ jix can yin ebꞌ.
28 Jaꞌ yet jun txolan tuꞌ, jix yalon naj rey Nabucodonosor jaxca tiꞌ: Al-le ojabꞌ watxꞌ kꞌane tet sDiosal Sadrac, Mesac cꞌal Abed-negó, tol jaꞌton jix ẍejtej yángel yet chi col-le el ebꞌ ẍejabꞌ chi yaoc scꞌul yin tiꞌ, ebꞌ tol ma sjije jin chejbꞌanil jain rey jin tiꞌ, tol bꞌejan scꞌul ebꞌ scami yintaj pax tol chi ey kaan ebꞌ tet comon dios tol man sdiosaloj ebꞌ. 29 Jaꞌ tinaniꞌ xin, jain chi walaꞌ: Yal cꞌal junoj mactxequel chi alon pena kꞌane yin sDiosal wan achꞌe tiꞌ, tol kocꞌ tzokꞌ wal oj yun scami. Jaꞌ sna ebꞌ oj uchle can eyoj, yal cꞌal tzet conobꞌal, tzet nacional, ma tzet tiꞌeal chi yalaꞌ, yutol cꞌam junojxa dios chi skeꞌ scolwa jaxca sDiosal ebꞌ tiꞌ, ẍi naj rey.
30 Jix lawi tuꞌ, jix akꞌlei jun yel xacꞌal miman yopiso ebꞌ naj oxwan achꞌe tuꞌ yu naj rey, yet chi yakꞌon yaawil ebꞌ bꞌey Babilonia tuꞌ.