Jun Slawubꞌal Tiempo
12
Jaꞌ yet tuꞌ, oj colwa naj yángel Dios chi yij Miguel, yaaw cꞌal steynemal ja conobꞌ Israel yeocoj.Jaꞌ yet jun tiempoal tuꞌ, caw mimej syaꞌilal oj juloj. Cꞌamto juneloj yunnaj xa yet tax cꞌal jix el yich spitzcꞌu wan nacionlaj. Jaꞌ yet tuꞌ, oj colcha el masanil ebꞌ ja wet conobꞌ, chi yal yeloc apnoj, jaꞌton mactxequel tzꞌibꞌebꞌil sbꞌi yul an libro.
2 Ecꞌal ebꞌ camnajxa oj pitzcꞌu aoj. Ey wan ebꞌ oj ẍaꞌ kꞌinale tol ey cꞌal yin tobꞌalkꞌinal. Ey pax wanxa ebꞌ xin, caw qꞌuixwiltaj oj yun stoo can ebꞌ xol syaꞌilal yin junelne.
3 Jaꞌ ebꞌ caw jelan snaꞌbꞌal, ebꞌ tol jix yijbꞌan ecꞌaloj ánima yin sjichanil, oj kopopoj xacꞌal yili ebꞌ jaxca skopopial weycan.
4 Jal jaach tiꞌ, jaach Daniel, majche can ey jun libro tiꞌ, catuꞌ cha cꞌubꞌan cantoj, masantaꞌcꞌal yet oj apnoj slawubꞌal. Yutol caw ecꞌal ebꞌ ánima oj a bꞌulna yecꞌ titiꞌ, catuꞌ oj toj pax bꞌulna ebꞌ tituꞌ, yutol caw chi a can yotajne el jelanil ebꞌ, ẍi jun ángel tuꞌ ey jin.
5 Jix wilon cawanxa winaj linan ocoj, junjun cꞌal bꞌey junjun spaqꞌuil stiꞌ jaꞌ miman jaꞌ Tigris. 6 Jaꞌ junoj ebꞌ jix kꞌanlen tet jun winaj eyoc pichile lino tuꞌ yu, jun linan oc bꞌey yibꞌan stiꞌ jaꞌ, jix yalon jaxca tiꞌ: ¿Bꞌakꞌin wal oj lawoj wan tzetyetal caw qꞌueyubꞌtaj xacꞌal yili tiꞌ? ẍi. 7 Jaꞌ jun winaj eyoc pichile lino yu tuꞌ, jix yiꞌon a skꞌabꞌ jix yakꞌon stiꞌ sattaj Dios tol ey yipal, jix yaloni: Jaꞌ yet oj lawoj nan scan abꞌil tuꞌ, yet oj lawoj yetneletoj yipalil sconobꞌ Dios, catuꞌ oj lawoj masanil wan tzetyetal tiꞌ, ẍi.
8 Jix wabꞌ tzet jix yalaꞌ, ma cꞌal naꞌcha el niꞌoj wu tzet chi yal yeloc apnoj. Yuxan jix jin kꞌanle tet jaxca tiꞌ: Jaach Waawil, ¿tzet wal oj yun slawoj ecꞌ masanil wan tiꞌ? jin chi. 9 Jix yalon ey jin jaxca tiꞌ: Cꞌam tocꞌal cha naꞌ yin wan tiꞌ jaach Daniel, yutol jaꞌ masanil wan tzetyetal tiꞌ, tucꞌal cꞌuan can eloj masantaꞌcꞌal yet slawubꞌal. 10 Yu wan syaꞌilal tuꞌ, yuxan ecꞌal ánima oj iꞌle can el spenail, cꞌal sjichlo can el snaꞌbꞌal ebꞌ. Jal ebꞌ penawom xin, tol oj a cꞌal can yunen spenail ebꞌ. Man cꞌal oj naꞌcha el yu ebꞌ tzetyetal lalan yecꞌtoj. Jal ebꞌ ánima ey snaꞌbꞌal xin, oj naꞌcha el yu ebꞌ. 11 Jaꞌ yet oj oc tucan yakꞌle xaambꞌal yet junjun cꞌu, catuꞌ oj ale octoj tzetyetal yaabꞌil el yu Dios yul templo yu yetnen eloj, catuꞌ oj el yich 1,290 cꞌual. 12 Caw tzalacꞌulal yet mactxequel chi techa yechbꞌanen yecꞌtoj 1,335 cꞌual tuꞌ. 13 Jal jaach Daniel tiꞌ xin, tecꞌan cꞌal cha wute ja bꞌa masantaꞌcꞌal yet slawubꞌal, catuꞌ oj jaach xewoj. Jato cꞌal yet slawubꞌ cꞌual tuꞌ, catuꞌ oj jaach a waanoj, jaxa ja chaꞌon ja pajtzebꞌal tuꞌ, ẍi naj ey jin, ẍi Daniel.