Jaꞌ Skꞌane Dios Jix Stzꞌibꞌe
DANIEL
Yichbꞌanil Skꞌaneal Naj Daniel
1
Jaꞌ yet yox abꞌil xa yoc naj Joaquim yin reyal bꞌey Judá, jix apni Nabucodonosor sreyal Babilonia bꞌey Jerusalén, catuꞌ jix sjoymone oc sbꞌa yetoj ebꞌ soldado yin conobꞌ tuꞌ. 2 Jaꞌ Dios jix aon oc naj rey Joaquim tuꞌ yul skꞌabꞌ ebꞌ. Queytuꞌ jix yun yeyqꞌuey yul skꞌabꞌ Nabucodonosor tuꞌ; jaꞌ jantaj mitxꞌkꞌabꞌe yet stemplo Dios jix iꞌletoj bꞌey Babilonia yu ebꞌ, catuꞌ jix yaon octoj jantaj wan mitxꞌkꞌabꞌe tuꞌ ebꞌ bꞌey yul stemplo sdiosal Nabucodonosor bꞌey Babilonia tuꞌ. Jix iꞌle cꞌal pax toj ebꞌ ánima a Judá yu ebꞌ. 3 Catuꞌ jix yalon naj rey Nabucodonosor tet naj Aspenaz, yaaw yeoc yu yilon bꞌey spalacio, tol chi sicꞌle el xol ebꞌ Israel jantaj ebꞌ achꞌe xol yicꞌaal ebꞌ rey, cꞌal xol yicꞌaal ebꞌ mimej yopiso jix iꞌletej tuꞌ. 4 Jaxca ebꞌ achꞌe tol watxꞌ yili, cꞌam niꞌoj stacnajil smimanil ebꞌ, ebꞌ caw jelan, ebꞌ caw ey snaꞌbꞌal, jaꞌton ebꞌ smoo yakꞌwi servil bꞌey sdespacho. Jaꞌton ebꞌ tuꞌ chi cuyle yin stiꞌ, cꞌal yin tzet chi yun stzꞌibꞌli ebꞌ Caldeo. 5 Jix yalon naj rey Nabucodonosor tet Aspenaz tuꞌ, tol jaꞌ sloꞌbꞌe naj chi sloꞌ cꞌal svino naj chi yuqꞌueꞌ, jaꞌ chi akꞌle tet ebꞌ naj achꞌe tuꞌ, catuꞌ chi cuyle ebꞌ naj yin oxebꞌoj abꞌil. Chi lawi tuꞌ xin, catuꞌ chi oc ebꞌ yin yakꞌon servil naj.Naj Daniel Yetoj Oxwan Ebꞌ Yet Achꞌeal Jaꞌjun Yetoj
6 Jaꞌ xol wan ebꞌ achꞌe sicꞌbꞌil el yu naj Aspenaz tuꞌ, jatuꞌ eyoc Daniel, Ananías, Misael cꞌal Azarías. Jaꞌton ebꞌ tiꞌ, jix tit yin yicꞌaal Judá. 7 Jix qꞌuexle sbꞌi ebꞌ yu naj Aspenaz tuꞌ. Jaꞌ Daniel, jix akꞌle yij Beltsasar; jal Ananías, jix akꞌle yij Sadrac. Jal Misael, jix akꞌle yij Mesac; jal Azarías xin, jix akꞌle yij Abed-negó. 8 Jaꞌ naj Daniel tuꞌ, jix snaꞌ tol pena chi can sattaj Dios yu sloꞌbꞌe cꞌal tzet chi yucꞌ naj rey tuꞌ, yuxan jix yal tet naj Aspenaz tuꞌ, tol cꞌam chi akꞌle pural yet chi sloꞌon wan loꞌbꞌe tuꞌ. 9 Jaꞌ Dios jix colwa yetoj Daniel, yuxan caw watxꞌ naj yul sat naj Aspenaz tuꞌ. 10 Yu jun tuꞌ, jix yalon tet jaxca tiꞌ:
—Chin xiw tet naj waawil, yutol jaꞌcaw naj jix alon tzet oj cu loꞌ cꞌal tzet oj kucꞌwej. Ta jaꞌ yet oj yilon naj tol tzꞌontaj xacꞌal je yili xol wanxa ebꞌ naj je yet achꞌeal tuꞌ, je yu jaex tiꞌ, catuꞌ chin akꞌle cam yu naj rey tuꞌ, ẍi naj.
11 Jix yaoc naj Aspenaz tuꞌ jun yilomal Daniel, Ananías, Misael cꞌal Azarías, yuxan jix yal Daniel tet jun yilomal tuꞌ jaxca tiꞌ:
12 —Chin kꞌan ey jaach an, tol chon ja wakꞌ porobꞌal yin laonebꞌoj cꞌual, tol asan cꞌal sat awo cha wakꞌ cu loꞌ, asan cꞌal jaꞌ cha wakꞌ kuqꞌueꞌ, catuꞌ cꞌam chiꞌbꞌe cha wakꞌ cu chiꞌ. 13 Jaꞌ yet chi lawi ecꞌ laonebꞌ cꞌual tuꞌ xin, catuꞌ chon ja laanbꞌanen yetoj wanxa ebꞌ ket achꞌeal chi loꞌon wan loꞌbꞌe jaxca yet naj rey tuꞌ. Ta jaxca tuꞌ xin, chi skeꞌ ja wakꞌon ey jon tzet oj cu loꞌ jatacꞌalaꞌ tzet utbꞌil kili ocoj ja wilaꞌ, ẍi Daniel tuꞌ.
14 Jix ẍaꞌon scꞌul jun yilomal ebꞌ tuꞌ, jix yakꞌon tzet jix skꞌan ebꞌ tuꞌ yin laonebꞌ cꞌual, yu yakꞌle porobꞌal ebꞌ. 15 Jaꞌ yet jix ecꞌtoj laonebꞌ cꞌual tuꞌ xin, catuꞌ jix il-le ocoj tol yel xacꞌal watxꞌ yili ebꞌ, caw ey yip ebꞌ yintaj wanxa ebꞌ naj yet achꞌeal ebꞌ chi loꞌon wan loꞌbꞌe jaxca yet naj rey. 16 Yu jun tuꞌ xin, jaꞌ naj yilomal ebꞌ tuꞌ jix yiꞌel tzet tꞌinan chi sloꞌ ebꞌ cꞌal vino tꞌinan chi yucꞌ ebꞌ, asan xacꞌal sat awo jix akꞌle tet ebꞌ.
17 Jaꞌ ebꞌ canwan achꞌe tuꞌ xin, jix akꞌle snaꞌbꞌal cꞌal sjelanilal ebꞌ yu Dios, yet watxꞌ chi naꞌcha el masanil cuyo tuꞌ yu ebꞌ, cꞌal ẍꞌibꞌ snaꞌbꞌal ebꞌ. Jaꞌ naj Daniel tuꞌ, ey sjelanil yin snaꞌon el weyiche cꞌal yin tzet chi akꞌle yilaꞌ. 18 Jaꞌ yet jix aapnoj stiempoal jantaj tzet albꞌil yu naj rey, catuꞌ jix iꞌletoj masanil ebꞌ achꞌe cuywom tuꞌ yu naj Aspenaz bꞌey sattaj naj rey Nabucodonosor bꞌey spalacio. 19-20 Jaꞌ yet jix apni ebꞌ sattaj naj, jix kꞌanabꞌ yetoj ebꞌ, yuxan jaꞌ xol masanil ebꞌ naj achꞌe tuꞌ, cꞌam junojxa laan sjelanil jaxca sjelanil Daniel, Ananías, Misael cꞌal Azarías. Jix skꞌanle naj rey tet ebꞌ yin masanil tzettaj yetal sowalil chi oc yopiso yu, jaxca jelanilal cꞌal naꞌbꞌale. Jix naꞌcha el yu naj tol ecꞌbꞌan sjelanil ebꞌ canwan tuꞌ yintaj masanil ebꞌ atxum, ebꞌ naꞌom el kꞌane ey bꞌey yul snación naj rey tuꞌ. Yu jun tuꞌ, yuxan jaꞌ ebꞌ tuꞌ jix cancan yin yakꞌon servil naj rey. 21 Queytuꞌ jix yun scancan Daniel yin yopiso tuꞌ, masantaꞌcꞌal yet bꞌabꞌel abꞌil yoc naj Ciro yin reyal.