2 Jaꞌ junoj rey tol jow sjolom, laan jaxca junoj noꞌ bꞌalam chi el yaw yu sjowal; jaꞌ mactxequel chi stecꞌbꞌa sbꞌa xꞌemoni ey smey chi cami.

3 Caw watxꞌ yet mactxequel chi stenchane oc tucan jowal. Jal pax mac pena snaꞌbꞌal xin, jowal cꞌal chi yoche chi yunne.

4 Jaꞌ mactxequel isa, cꞌam chi mulna yet stiempoal yoc awo, yuxan jaꞌ yet chi aapnoj stiempoal syambꞌale oc sat awo, cꞌam tzet chi syambꞌa ocoj.

5 Jaꞌ tzetyetal ewantaj yeoc yin cu naꞌbꞌal, laan jaxca jaꞌ jaꞌ ey yul junoj jolan naat yich; jal pax mactxequel ey snaꞌbꞌal xin, chi skeꞌ yotajnen eloj.

6 Ecꞌal mactxequel chi aloni tol ey scamcꞌulal kin, jaywanne pax mac chi skeꞌ kaon oc yipoj cu cꞌul.

7 Jaꞌ mactxequel caw jichan snaꞌbꞌal, catuꞌ cꞌam cꞌal niꞌoj tzet chi sloctej yibꞌan, caw tzalacꞌulal chi caey ecꞌ yuninal ebꞌ yetoj.

8 Jaꞌ yet chi ey chotan junoj naj rey bꞌey sdespacho yet chi swaꞌnen yeoc junoj jowal, asan cꞌal yet chi oc tꞌanan yin, catuꞌ chi waꞌxi oc jun kꞌane tuꞌ yu yin eymanil.

9 Cꞌam mactxequel chi skeꞌ yaloni tol watxꞌ snaꞌbꞌal, ma cꞌam niꞌoj spenail ey yin spixan.

10 Jaꞌ echbꞌal man tzꞌajanoj, yetoj xꞌanil mulnail tol ecꞌbꞌan, jaꞌ caabꞌ tujan echbꞌal tuꞌ, caw cꞌam chi ẍaꞌ scꞌul Dios.

11 Jaꞌ yu sbꞌeybꞌal ebꞌ achꞌe chi txeclo eloj ta tol watxꞌ sbꞌeybꞌal ebꞌ, queyton tuꞌ chi yun xeclo eloj ta tol watxꞌ snaꞌbꞌal ebꞌ.

12 Jaꞌ Jehová jix waꞌnen cu txiquin yu kabꞌeni, cꞌal sbꞌakꞌ cu sat yu kiloni.

13 Man ojabꞌ weyanoj cꞌal cha wunne, ta cꞌamaj oj jul mebꞌail ja wibꞌan; akꞌ ja wip yin ja mulnail, yet watxꞌ oj yakꞌ sobra ja loꞌbꞌe.

14 Jaꞌ ebꞌ chi manwi, chi yal ebꞌ jaxca tiꞌ: Caw cꞌam swatxꞌil tzet che txon tinaniꞌ, ẍi ebꞌ; jaxa yet xax manwi ebꞌ xin, chi yalon ebꞌ tol caw jelan smanwi ebꞌ.

15 Jaꞌ chꞌen oro, cꞌal chꞌen chꞌen watxꞌ yili bꞌey yul yibꞌankꞌinal tiꞌ, chi ilcha cꞌal oc chꞌen, jal pax skꞌane ebꞌ jelan xin, man comonoj chi ilcha ocoj.

16 Ta ey mactxequel chi yaoc sbꞌa yin fiadoral yin junoj txꞌoj animail, tol ojabꞌ cha wiꞌ can ecꞌ spichil jun mactxequel tuꞌ, catuꞌ cha wiꞌon can oc yin smaanbꞌanil tuꞌ.

17 Jaꞌ niꞌoj sloꞌbꞌe junoj mactxequel chi yiꞌ yin elkꞌan, caw watxꞌ xacꞌal sloꞌi chi yabꞌe; jal yin slawubꞌal xin, jaxca tol kajtxꞌotxꞌ eyoctoj yul stiꞌ chi yabꞌe.

18 Jaꞌ junoj tzetyetal chi cam snaꞌle yoc yin xolilal, watxꞌ chi elocoj, ta tol watxꞌ chi yun snaꞌlei; chi skeꞌ yeyqꞌuey junoj jowal, ta man watxꞌoj chi yun snaꞌle yibꞌan xin, manche jex too yin jowal ta tol man eyoj oc yin xolilal.

19 Jaꞌ junoj alom kꞌumale, cꞌam chi smajche ey junoj tzetyetal tol ewantaj yeocoj, yu jun tuꞌ, yuxan cꞌam chi skeꞌ junne chach ecꞌ yetoj ebꞌ alom kꞌumale.

20 Jaꞌ mactxequel chi bꞌawa yin smam cꞌal yin xutx, eyman chi lawi ey skꞌinal jaxca junoj tzejtebꞌal chi tan skꞌakꞌal.

21 Jaꞌ bꞌeomal tol chi iꞌle yin subꞌoal yet sbꞌabꞌelal, jaxa yin slawubꞌal xin, cꞌamxa tzet chi kilontej.

22 Cꞌam ojabꞌ cha walaꞌ: Oj waecꞌ spaj. Asan tol cha waoc Jehová yipoj ja cꞌul, jaꞌ Naj oj jaach colon eloj, cꞌal jantaj tzet cha naꞌ.

23 Jaꞌ echbꞌal man tzꞌajanoj, caw yaabꞌetaj yili yul sat Jehová.

24 Jaon tiꞌ man kotajoj tzet chi yun cu bꞌeytoj cu sattaj, yuxan asanne ojabꞌ Jehová chi kaoc yipoj cu cꞌul, yet watxꞌ jaꞌ Naj chi cu iꞌon bꞌeyoj.

25 Ey smey ta yin eymanil chi kakꞌ cu tiꞌ tet Dios, chi lawi tuꞌ, catuꞌ chi cu naꞌon pax cu bꞌa bꞌey jix kakꞌ can cu tiꞌ tuꞌ.

26 Jaꞌ junoj rey tol ey snaꞌbꞌal, chi yujte el ebꞌ penawom sattaj, catuꞌ chi can ebꞌ yalan yu.

27 Jaꞌ jun espíritu akꞌbꞌil ey jon yu Dios, ja chi txꞌoxon eloj tzet ey yin cu naꞌbꞌal.

28 Caw watxꞌ yet junoj rey tol watxꞌ chi yun yilontoj yopiso, yutol chi sbꞌeybꞌalne camcꞌulal cꞌal sjichanil.

29 Jaꞌ yip ebꞌ achꞌe jaꞌ eyoc smeynebꞌailoj ebꞌ; jal pax smeynebꞌail ebꞌ icham winaj xin, jaꞌton yu sajxa xil sjolom ebꞌ.

30 Jaꞌ mactxequel pena sbꞌeybꞌal, jaꞌ syaꞌilal chi akꞌon jul snaꞌbꞌal ebꞌ, yetoj cꞌal yet chi tenchanele yin tzet man watxꞌoj, jaꞌ chi akꞌon waꞌxoj oc spena naꞌbꞌal tuꞌ.