2 Jaꞌ ebꞌ ánima chi snaꞌ tol watxꞌ cꞌal tzet chi yun ebꞌ, jal pax Jehová xin, tꞌanan oc yin snaꞌbꞌal ebꞌ.

3 Bꞌeybꞌalnewej swatxꞌilal, cꞌal sjichanil; jaꞌ wan tuꞌ chi yoche Jehová yintaj xaambꞌal chi akꞌle tet.

4 Jaꞌ mactxequel chi smeyne sbꞌa tol txꞌoj xacꞌal yilwani, pena ton jun bꞌeybꞌale tuꞌ; yutol man watxꞌoj yeoc snaꞌbꞌal jun mactxequel tuꞌ.

5 Jaꞌ junoj tzetyetal tol chi cam snaꞌlei, watxꞌ chi yun yelocoj; jal pax junoj yin eymanil chi yun snaꞌle xin, cꞌam chi eloc yin watxꞌ.

6 Jaꞌ mactxequel chi yiꞌ sbꞌeomal yin lekꞌtiꞌal kꞌane, yin eymanil chi lawi eyoj, jaꞌ camich chi tit yibꞌan.

7 Jaꞌ ebꞌ penawom, jacꞌal jun spenail chi yun ebꞌ tuꞌ, jaꞌ chi akꞌon lawoj ey ebꞌ, yutol cꞌam chi yoche ebꞌ chi sbꞌeybꞌalne sjichanil.

8 Jaꞌ sbꞌeybꞌal ebꞌ penawom, man jichanoj, jal pax sbꞌeybꞌal ebꞌ ánima watxꞌ snaꞌbꞌal xin, caw jichan toni.

9 Yel xacꞌal watxꞌ jaꞌ yul junoj yaliẍ pat na caan jin ecꞌoj, yintaj pax tol jaꞌ bꞌey junoj miman na eyxa smey yili bꞌey ey jin ecꞌ yetoj junoj ix wistil jowal cꞌal chi wun yetoj.

10 Jaꞌ ebꞌ penawom, asan cꞌal spenail naꞌan yu ebꞌ yuneni; cꞌam bꞌey chi yakꞌ watxꞌcꞌulal ebꞌ tet yet animail.

11 Ta chi ale oc syaꞌilal yibꞌan junoj chi yiꞌa can sbꞌa, oj naꞌcha el yu ebꞌ cꞌamto snaꞌbꞌal, jal pax mac ey snaꞌbꞌal xin, asan cꞌal yet chi al-le tet, catuꞌ chi naꞌcha el yu.

12 Jaꞌ Dios caw jichan toni, chi cam wal yilon oc ebꞌ penawom, jaꞌ chi aon oc ebꞌ yul skꞌabꞌ syaꞌtajilal.

13 Jaꞌ mactxequel cꞌam chi ẍaꞌ yabꞌ tzet chi yal ebꞌ mebꞌa, jaꞌ yet oj yalon sbꞌa ebꞌ tet Dios, man oj yabꞌ pax Dios tzet oj yal ebꞌ.

14 Jaꞌ saꞌbꞌeal chi akꞌle yin ewantajil, chi oc tucan sjowal scꞌul ebꞌ yu.

15 Jaꞌ yet chi waꞌnele yeoc junoj kꞌane yin sjichanil, jaꞌ junoj mactxequel jichan snaꞌbꞌal caw chi tzala yetoj, jal pax ebꞌ pena snaꞌbꞌal xin, caw chi xiwa ebꞌ yu.

16 Jaꞌ mactxequel chi sbꞌejcan yunen swatxꞌilal, jaꞌ jun tuꞌ lalan stoo can xol ebꞌ camom.

17 Jaꞌ mactxequel chi ya xacꞌal oc sbꞌa yin tzet chi yoche, jaxca yin uqꞌue an, cꞌal yin loꞌbꞌe ey xacꞌal smey yili, jaꞌ jun tuꞌ, oj jul mebꞌail yibꞌan.

18 Jaꞌ ebꞌ ánima man watxꞌoj, caw wal oj yabꞌ syaꞌil ebꞌ sqꞌuexeloj ebꞌ jichan snaꞌbꞌal.

19 Yel xacꞌal mi watxꞌ tol chi cu caey ecꞌ bꞌey cusiltaj txꞌotxꞌ, yintaj pax tol chi cu caey ecꞌ yetoj junoj ix ix tol jowal cꞌal ey.

20 Jaꞌ bꞌey sna junoj ey snaꞌbꞌal, ey loꞌbꞌe cꞌal tumin cꞌuan ecꞌ yu, jal pax jun cꞌam snaꞌbꞌal xin, yin eymanil chi yakꞌ lawoj ey masanil tzetyetal chi yiꞌ.

21 Jaꞌ mactxequel jichan snaꞌbꞌal, cꞌal ebꞌ watxꞌ chi yute sbꞌa, ey cꞌal scawil ebꞌ, chi bꞌinale ecꞌ ebꞌ, watxꞌ cꞌal ebꞌ yul sat Dios.

22 Jaꞌ junoj mactxequel ey snaꞌbꞌal, chi skeꞌ yakꞌon jowal yin junoj conobꞌ tol teynebꞌil sicꞌlebꞌil, chi smakꞌon wejcha smuroal jun conobꞌ tuꞌ.

23 Jaꞌ mactxequel chi steyne sbꞌa yin tzetyetal chi yalaꞌ, chi scol sbꞌa xol syaꞌtajilal.

24 Jaꞌ mactxequel yaxkꞌainaj chi yute sbꞌa, ma chi ecꞌ xacꞌal yibꞌan smeynen sbꞌa; bꞌuchwawom smoo chi yijaꞌ.

25 Jaꞌ ebꞌ isa, caw chi yoche oc tzettaj yetal ebꞌ, cꞌam cꞌaltaꞌ chi ilcha yu ebꞌ, yutol cꞌam chi yal scꞌul ebꞌ chi mulnai.

26 Masanil cꞌal cꞌual chi yoche junoj tzetyetal ebꞌ; jal pax junoj jichan snaꞌbꞌal xin, bꞌejan cꞌal yel yu.

27 Cꞌam chi ẍaꞌ scꞌul Jehová yofrenda ebꞌ penawom, yutol man yetoj masanil scꞌul ebꞌ chi yakꞌa.

28 Jaꞌ mactxequel chi oc yin lekꞌtiꞌ testigoal, oj lawoj eyoj; jal pax mactxequel chi cam snaꞌon tzet chi yalaꞌ, jaꞌ jun tuꞌ chi chaꞌle tzet chi yalaꞌ.

29 Jaꞌ ebꞌ pena snaꞌbꞌal, chi stzꞌaj xꞌox eloj tol watxꞌ yeoc ebꞌ; jal pax mac watxꞌ snaꞌbꞌal xin, watxꞌ ton yeoc yin sbꞌeybꞌal.

30 Caxcꞌal mi ey mac jelan, ey snaꞌbꞌal, caxcꞌal mi caw miman tzet yotaj, jaꞌ jun tuꞌ, cꞌam cꞌaltaꞌ mac chi skeꞌ stenon oc tucan tzet chi yoche Jehová.

31 Jaꞌ ebꞌ soldado chi yakꞌ lista ẍe ebꞌ yet chi too ebꞌ yin jowal, asanne yetoj scolwal Jehová yuxan chi skeꞌ yakꞌon eyqꞌuey jowal ebꞌ.