2 Man watxꞌoj ta cꞌam chi cam cu naꞌon yin sbꞌabꞌelal yet cꞌamto chi kun junoj tzetyetal tol man yin oj xolilal. Ey bꞌey chi cu waꞌne junoj tzetyetal yin eymanil, ey bꞌey man watxꞌoj chi yun yelocoj.

3 Ta cꞌam cu naꞌbꞌal, jaꞌ chi cu ijbꞌan qꞌueytoj; jaxa chi yunne, jaꞌ Jehová chi kakꞌ ijtzanoj.

4 Jaꞌ ebꞌ bꞌeom caw ecꞌal swatxꞌil ánima ebꞌ, jal pax ebꞌ mebꞌa xin, chi bꞌejlecan ebꞌ yu swatxꞌil ánima.

5 Jaꞌ mactxequel chi oc yin lekꞌtiꞌ testigoal, sowalil oj yabꞌ syaꞌil; jaꞌ junoj chi yakꞌ lekꞌtiꞌal, man oj colcha can eloj.

6 Jaꞌ ebꞌ yaaw yeocoj cꞌal mactxequel bꞌejan scꞌul saꞌon junoj tzetyetal, masanil ánima chi seyon ecꞌ ebꞌ, yu yoc ebꞌ swatxꞌil animaoj.

7 Jaꞌ ebꞌ mebꞌa, cꞌamxa chi ochele ebꞌ yu yuẍtaj; jajxa tam swatxꞌil ánima ebꞌ, chi el ebꞌ scꞌatan. Naꞌbꞌa xacꞌal chi el yaw ebꞌ yet chi awtele ebꞌ yu junelxa.

8 Jaꞌ mactxequel chi cuywi, catuꞌ chi sbꞌeybꞌalne tzetyetal chi scuy tuꞌ, jacꞌal oc chi scamcꞌulne sbꞌa, caw chi chꞌibꞌ snaꞌbꞌal.

9 Jaꞌ mactxequel chi oc yin lekꞌtiꞌ testigoal, sowalil oj yabꞌ syaꞌil; jaꞌ camich chi yechbꞌane ebꞌ lekꞌtiꞌ tuꞌ.

10 Jaꞌ mactxequel pena snaꞌbꞌal, man smoo oj tol chi yakꞌ tzalabꞌoj scꞌul yin swatxꞌil, quey pax tuꞌ ebꞌ eyoc yin yakꞌomaloj servilal, man pax smoo oj tol jaꞌ ebꞌ chi yakꞌ yaawil yibꞌan ebꞌ mimej winaj.

11 Ta tol chi cu mitxꞌoc tucan cu bꞌa yet chi tit cu jowal, ey cu naꞌbꞌal chi yal tuꞌ; catuꞌ chi cu al-le watxꞌil yu ebꞌ ket animail ta tol chi kakꞌ mimancꞌulal yin ebꞌ chi cu etneni.

12 Jaꞌ sjowal scꞌul junoj rey, caw ey smey, laan jaxca yet chi el yaw junoj noꞌ bꞌalam. Jal pax swatxꞌcꞌulal naj xin, chi yiꞌtej swatxꞌilal jaxca yal akꞌbꞌal chi ey yibꞌan an cꞌultaj.

13 Jaꞌ junoj uninale tol cꞌam snaꞌbꞌal, yaꞌ chi yabꞌ smam yu. Jaꞌ junoj ix ix jow cꞌal yin yichamil, laan ix jaxca junoj tzꞌu chi ey cꞌal tꞌulabꞌoj.

14 Jaon tiꞌ chi cu chaꞌ cu na cꞌal cu majul tzetyetal tet cu mam cu txutx; jal pax ix istile tol jelan snaꞌbꞌal xin, jaꞌ Jehová chi akꞌon ix ey jon.

15 Jaꞌ yu isail yuxan chi tit cu weyan. Ta tol cꞌam chi yal cu cꞌul chi cu mulnai, oj kabꞌ syaꞌil yu wail.

16 Jaꞌ mactxequel chi jijen chejbꞌanile, jaꞌ jun tuꞌ, jaxca tol lalan steynen skꞌinal. Jal pax mac cꞌam chi steyne sbꞌa yin sbꞌeybꞌal xin, jaꞌ camich oj tit yibꞌan.

17 Jaꞌ junoj chi colwa tet ebꞌ mebꞌa, jaxca tol jaꞌ tet Jehová chi yakꞌ maanil; jaꞌ Dios oj akꞌon meltzo jun maan tuꞌ.

18 Akꞌ cuenta ebꞌ ja wuninal yajbꞌan tol yaliẍ to ebꞌ; yet watxꞌ cꞌam chi too ebꞌ yul skꞌabꞌ camich, cꞌam ojabꞌ cha qꞌueycan el ebꞌ yu ja wakꞌon cuenta ebꞌ tuꞌ.

19 Jaꞌ mactxequel chi tit sjowal yin eymanil, ẍaꞌ ojabꞌ spaj jaxca smooalil; ta chi cu colel ebꞌ xol syaꞌtajilal tuꞌ, jacꞌalaꞌ cꞌal sbꞌeybꞌalnen sjowal scꞌul ebꞌ tuꞌ.

20 Watxꞌ tol cha chaꞌ ja wabꞌ naꞌbꞌale, catuꞌ cha chaꞌon ja wabꞌ tenchebꞌal; ta jaxca tuꞌ, oj jelanbꞌoj ja naꞌbꞌal.

21 Jaon ánima jon tiꞌ, caw miman tzet chi el cu naꞌoni, jaꞌ tzet chi cu naꞌ tuꞌ asanne Jehová chi aon oc yin xolilal.

22 Jaꞌ tzet chi koche yin junoj ánima, tol yel ojabꞌ tzet chi yalaꞌ; yel xacꞌal watxꞌ yet mactxequel chi yun tzet chi yalaꞌ, caxcꞌal mebꞌa, yintaj pax mactxequel tol tucꞌal chi yalaꞌ.

23 Ta tol ey yeloc apnoj Jehová yul cu sat, jaꞌton chi cu iꞌontoj bꞌey kꞌinale; caw tzalacꞌulal chi yun sbꞌeytoj tiempo ku, catuꞌ cꞌam cꞌal tzet chi kabꞌ syaꞌil.

24 Jaꞌ junoj isa chi yaeytoj skꞌabꞌ yul secꞌ, jaxa yet chi yaon octoj sloꞌbꞌe yul stiꞌ, caw yaꞌtaj chi yabꞌe.

25 Ta chi ale oc syaꞌilal yibꞌan junoj chꞌaan sjolom, jaxa junoj cꞌamto snaꞌbꞌal chi jelanbꞌi can snaꞌbꞌal yu. Jaꞌ mactxequel ey snaꞌbꞌal, jaꞌ yet chi tenchanelei, chi naꞌcha el yu.

26 Jaꞌ mactxequel chi yelkꞌane stzetyetal tet smam, cꞌal yujten el xutx, caw qꞌuixwiltaj tzet chi yun jun mactxequel tuꞌ.

27 Jex wuninal, ta tol man oj je chaꞌ je yabꞌ tenchebꞌal tiꞌ, naat oj je yiꞌcan el je bꞌa yin cuybꞌanile tol yel.

28 Jaꞌ junoj testigo pena snaꞌbꞌal, cꞌam yeloc apnoj sjichanil yul sat, yutol caw chi tzala yetoj spenailal tuꞌ.

29 Watxꞌ xa ye syaꞌilal oj jul yibꞌan ebꞌ yaxkꞌainaj chi yute sbꞌa, catuꞌ oj makꞌle oc teꞌ kꞌaaxteꞌ yin ebꞌ cꞌam snaꞌbꞌal.