2 Jaꞌ mactxequel pena snaꞌbꞌal, cꞌam chi yoche chi cuylei; asan cꞌal chi yoche chi kꞌanabꞌi.

3 Ta jaꞌ spenail chi kunne, catuꞌ ta chi cu meyne cu bꞌa chi kakꞌ cu qꞌuixwiloj, chi cu intajnele eloj, catuꞌ chi cu bꞌuchle cꞌal pax oj.

4 Jaꞌ skꞌane junoj mactxequel ey snaꞌbꞌal, miman jelanil chi skeꞌ kiꞌon can yin. Jaꞌ tzet chi yal ebꞌ, laan jaxca junoj jaꞌ jaꞌ naat yich, ma jaxca jaꞌ jaꞌ tol chi aol snukꞌ.

5 Caw man watxꞌoj, ta tol jaꞌ ebꞌ ey spenail chi yakꞌ mimancꞌulal ebꞌ juez yin ebꞌ, jal ebꞌ cꞌam spenail cꞌam chi chaꞌle tzet chi yal ebꞌ.

6 Jaꞌ yu skꞌane junoj cꞌam snaꞌbꞌal, yuxan chi a jowal; jaꞌ yu skꞌane ebꞌ tuꞌ yuxan chi jul syaꞌilal yibꞌan ebꞌ.

7 Jaꞌ yu tzet chi yal junoj pena snaꞌbꞌal, yuxan chi tit camich yibꞌan; jaꞌ yu skꞌane ebꞌ chi yalaꞌ, jaxca tol chi sutꞌle oc lasu yin snukꞌ ebꞌ, yet chi sutꞌle camoj.

8 Jaꞌ skꞌane ebꞌ alom kꞌumale, laan jaxca junoj tzetyetal watxꞌ xacꞌal sloꞌi, chi apni xacꞌal oc ẍiꞌal yin spixan ebꞌ chi abꞌeni.

9 Jaꞌ ebꞌ isa cꞌal ebꞌ chi etnentoj junoj tzetyetal, jaxca tol yuẍtaj sbꞌa ebꞌ.

10 Jaꞌ Jehová, laan jaxca junoj cuartel caw watxꞌ scawxi, jaꞌ yin chi scol sbꞌa ebꞌ jichan snaꞌbꞌal.

11 Jaꞌ ebꞌ bꞌeom, chi snaꞌ ebꞌ tol jaꞌ sbꞌeomal ebꞌ tuꞌ, laan jaxca smuroal junoj conobꞌ joyan oc yinlaj yet chi scolon sbꞌa yetoj.

12 Ta chi cu meyne cu bꞌa chi cu intajnele can eloj; jal yeynajil xin, tol chi cu iꞌle a can yu.

13 Caw qꞌuixwiltaj ta tol comon cꞌal chi cu takꞌwi yet cꞌamto chi cam kabꞌen oc junoj kꞌane, ta comon cꞌal chi cu takꞌwitoj xol junoj kꞌane, lalan cu txꞌoxon eloj tol cꞌam cu naꞌbꞌal.

14 Ta tecꞌan cꞌal yeoc cu naꞌbꞌal, chi kakꞌ techa yet chi jul syaꞌilal kibꞌan; ta cꞌam chi kakꞌ techa xin, chi yal yeloc apnoj, tol cꞌam stecꞌanil cu naꞌbꞌal.

15 Ta tol jelan cu naꞌbꞌal, chi ilcha oc jelanil ku, yutol chi kaoc yin cu cꞌul cu cuyoni.

16 Yu junoj cu saꞌbꞌeal chi kakꞌ tet junoj mactxequel, chi cu chaꞌle cꞌal yu junojxa mactxequel, catuꞌ chi cu chaꞌle yu ebꞌ miman yeloc apnoj yin yopiso.

17 Jaꞌ mactxequel bꞌabꞌel chi yal sbꞌa tet ebꞌ yaaw, jaxca tol chi scol sbꞌa ebꞌ snaꞌoni; jaꞌ yet chi apni pax oc scajat ebꞌ tuꞌ xin, chi txeclo eloj tzet yeoc jun jowal tuꞌ.

18 Jaꞌ yet chi xꞌoxon scolwal Dios yin junoj jowal, chi lawi ey jun jowal tuꞌ, catuꞌ chi poꞌole snan ebꞌ chi yakꞌ jowal tuꞌ.

19 Ta chi cu txꞌem cus junoj kuẍtaj, yaꞌtaj xa chi yun koc yin watxꞌcꞌulal yetoj, yintaj pax tol chi kakꞌ eyqꞌuey junoj conobꞌ eyoc smuroal yinlaj, ta ey junoj pena kꞌane snan cu xol yetoj junoj cu watxꞌil ánima, laan wal jaxca junoj miman puerta eyoc snan cu xol yetoj ebꞌ.

20 Jaꞌ tzet chi kalaꞌ chi skeꞌ yiꞌontej syaꞌtajilal ma tzalacꞌulal kibꞌan.

21 Jaꞌ cu kꞌane chi kalaꞌ, chi skeꞌ yiꞌontej camich ma kꞌinale kibꞌan. Yu jun tuꞌ, yuxan watxꞌ chi cam cu naꞌon tzet chi kalaꞌ, yet watxꞌ, watxꞌ chi cu elocoj.

22 Jaꞌ yet chi oc yistil naj winaj, caw chi ilcha swatxꞌilal yu; jaxca tol chi ẍaꞌ swatxꞌcꞌulal Jehová.

23 Jaꞌ ebꞌ mebꞌa, caw yeynajil chi yun yalon sbꞌa ebꞌ; jal pax ebꞌ bꞌeom, mimejtaj cꞌal chi yute takꞌwoj sbꞌa ebꞌ.

24 Ey mactxequel caw ecꞌal swatxꞌil ánima yaloni; jaxa yet chi jul syaꞌtajilal yibꞌan, cꞌamxa mac chi colwa yin ebꞌ; ey pax mactxequel ey chꞌan junoj swatxꞌil ánima, yel xacꞌal ecꞌbꞌan swatxꞌilal yintaj junoj yuẍtaj.