2 Jaꞌ junoj yakꞌomal servil ey snaꞌbꞌal, ecꞌbꞌan yopiso yintaj junoj scꞌaal patrón tol cꞌam yopiso; ey yalon yet jun yakꞌomal servil tuꞌ yin yiꞌon smajul tzetyetal yu spatrón tuꞌ.

3 Jaꞌ chꞌen oro yetoj chꞌen plata, jaꞌ xol kꞌakꞌ chi akꞌle porobꞌal chꞌen ta watxꞌ chꞌen ma cꞌamaj; jal pax cu naꞌbꞌal jaon ánima jon tiꞌ xin, jaꞌ Jehová chi ilon ocoj tzet ey yin cu naꞌbꞌal.

4 Jaꞌ ebꞌ pena snaꞌbꞌal chi ẍaꞌ scꞌul ebꞌ yabꞌen pena kꞌane, yetoj pax ebꞌ lekꞌtiꞌ, chi ẍaꞌ scꞌul ebꞌ yalon pena kꞌane.

5 Ta tol chi cu bꞌuchwa yin ebꞌ mebꞌa, jaxca tol jaꞌ Jehová lalan cu bꞌuchoni, Naj jix cu waꞌneni. Ta tol chi cu tzala yet chi jul cuscꞌulal yibꞌan junoj mactxequel, sowalil queytuꞌ oj yun sjul pax syaꞌilal kibꞌan.

6 Jaꞌ ebꞌ icham winaj, caw tzalacꞌulal yet ebꞌ ta ey yitxiquin ebꞌ, yutol smey ebꞌ yeocoj, quey cꞌal pax tuꞌ chi yun smeynen sbꞌa ebꞌ uninale yu smam.

7 Jaꞌ mactxequel cꞌam snaꞌbꞌal, man smoo oj yalon skꞌaneal yet jelanil ebꞌ, quey pax tuꞌ ebꞌ yaaw, man smoo oj yalon lekꞌtiꞌal kꞌane ebꞌ.

8 Jaꞌ mactxequel chi bꞌeybꞌalne yakꞌon tumin yin ewantajil, chi snaꞌ tol watxꞌ chi eloc yu, yutol yal cꞌal bꞌey chi ecꞌ ebꞌ, chi yun cꞌal ebꞌ tzet chi yoche scꞌul.

9 Jaꞌ ebꞌ chi techa yakꞌon mimancꞌulal yet chi etnelei, chi yoche ebꞌ chi eecꞌal ecꞌ yin watxꞌcꞌulal yetoj yet animail; jal pax mac jacꞌalaꞌ yaloꞌtanen junoj kꞌane xin, chi el swatxꞌil ánima ebꞌ scꞌatan.

10 Jaꞌ jayebꞌoj bꞌelan kꞌane yet tenchebꞌal chi yal junoj ey snaꞌbꞌal, miman tzet chi waꞌxi can oc yin snaꞌbꞌal junoj mactxequel, yintaj pax tol chi oc junoj 100 chicote yin junoj pena snaꞌbꞌal.

11 Jaꞌ junoj pit chi yute sbꞌa, asan jowal chi seyaꞌ, jaxa sjul junoj mactxequel yin tol cꞌam cꞌal chi okꞌ scꞌul yin, yet watxꞌ chi qꞌueyle can eloj.

12 Yel xacꞌal mi watxꞌ chi cu chaꞌle cu bꞌa yetoj junoj noꞌ xutx oso xax iꞌle el yuneꞌ yintaj, yintaj pax yet chi cu chaꞌlen cu bꞌa yetoj junoj pena snaꞌbꞌal.

13 Ta tol pena chi kute cu pajtzen swatxꞌcꞌulal junoj mactxequel, cꞌam bꞌakꞌin oj el syaꞌilal yul cu na.

14 Jaxca junoj jaꞌ paam jaꞌ niẍtej yel sne, cꞌuancꞌulal chi malel masanil, queytuꞌ junoj jowal txenne chi yun yel yich. Yu jun tuꞌ, yel xacꞌal watxꞌ tol ey mimancꞌulal yet cꞌamto chi el yich junoj jowal.

15 Ta tol chi akꞌle mimancꞌulal yibꞌan mac ey spenail, ma chi xijle xacꞌal oc yibꞌan junoj mactxequel tol cꞌam spenail, jaꞌ caabꞌ naꞌbꞌale tuꞌ caw cꞌam chi ẍaꞌ scꞌul Jehová.

16 ¿Tzet yu, yuxan chi jul junoj pena snaꞌbꞌal iꞌbꞌil oc tumin yu yet chi yochen chi sman sjelanilal? ¿Tzet wal oj oc yu, yutol pena cꞌaltaꞌ snaꞌbꞌal?

17 Jaꞌ junoj cu watxꞌil ánima watxꞌ kakꞌon yetoj, ey cꞌal ecꞌ ketoj yet ey syaꞌilal chi jul kibꞌan, ecꞌbꞌan tet junoj kuẍtaj.

18 Jaꞌ mactxequel cꞌam snaꞌbꞌal, comon cꞌal chi yaoc sbꞌa yin fiadoral yin junojxa mactxequel, catuꞌ chi stakꞌen oc junoj tzetyetal yibꞌan.

19 Jaꞌ mactxequel tol chi ẍaꞌ scꞌul xꞌemwai, caw chi ẍaꞌ cꞌal pax scꞌul jowal. Jaꞌ mactxequel chi xꞌox xacꞌal el tzet ey tet, jacꞌal oc chi yiꞌtej yibꞌan.

20 Ta tol cꞌam swatxꞌil cu naꞌbꞌal, cꞌam bꞌakꞌin oj chaꞌlo swatxꞌilal ku; ta tol yin caabꞌ satil chi kute kꞌanabꞌ cu bꞌa, oj jul syaꞌilal kibꞌan.

21 Jaꞌ junoj pena snaꞌbꞌal, cꞌam cꞌal tzalacꞌulal chi yiꞌtej tet smam, jaꞌ junoj cꞌam snaꞌbꞌal asan cꞌal cuscꞌulal chi sloctej yibꞌan smam.

22 Jaꞌ tzalacꞌulal laan jaxca junoj ambꞌal; jal pax cuscꞌulal xin, tucꞌal chi yiꞌel kip.

23 Jaꞌ junoj penawom, chi ẍaꞌ tumin yin ewantajil, catuꞌ man watxꞌoj chi yun swaꞌnen yeoc junoj jowal.

24 Jaꞌ jelanil jaꞌton jun tuꞌ ujtebꞌil oc yu mactxequel tol ey snaꞌbꞌal, jal pax mactxequel tol pena snaꞌbꞌal xin, cam tzet ujtebꞌil oc yu.

25 Jaꞌ junoj uninale tol cꞌam snaꞌbꞌal asan cꞌal xꞌemontej sjowal scꞌul smam xutx, asan cꞌal yakꞌon cus cꞌul ebꞌ chi yunne.

26 Man watxꞌoj ta tol chi kꞌanle el chꞌen tumin yin smultaoj junoj mac cꞌam spenail. Man pax watxꞌoj ta comon cꞌal chi kiꞌel ebꞌ yaaw eyoc yin yopiso ta watxꞌ yilontoj yopiso tuꞌ.

27 Jaꞌ mactxequel txenne skꞌane chi yalaꞌ, caw ey snaꞌbꞌal, caw jelan jon ta tol chi cu mitxꞌoc tucan cu bꞌa.

28 Ta cꞌam cꞌal chi kꞌanabꞌ junoj mactxequel cꞌam snaꞌbꞌal, chi naꞌle oc yin tol ey snaꞌbꞌal.