2 Jaon ánima jon tiꞌ, chi cu naꞌ tol watxꞌ cꞌal tzet chi kunne, jal pax Jehová xin, jaꞌ tꞌanan oc yin masanil jantaj tzet chi cu naꞌ.

3 Yuxan jaꞌ masanil tzet cha naꞌ, aoc yul skꞌabꞌ Jehová, yet watxꞌ chi yiꞌ sbꞌa jun tzet cha naꞌ tuꞌ.

4 Jaꞌ Jehová jix waꞌnen masanil tzetyetal, jix eloc jantaj tzet naꞌbꞌil yu; jix snaꞌon pax canoj, tol jaꞌ ebꞌ penawom oj tojcan ebꞌ xol syaꞌtajilal.

5 Cꞌam chi ẍaꞌ scꞌul Jehová tol chi cu meyne cu bꞌa; yutol man kotajoj bꞌakꞌin oj jul syaꞌilal kibꞌan.

6 Ta tol chi cu camcꞌulne ebꞌ ket animail, ta jijem chi kute cu bꞌa chi akꞌle mimancꞌulal yin cu penail, ta miman yeloc apnoj Jehová yul cu sat, catuꞌ chi cu poꞌon el cu bꞌa xol spenail.

7 Ta tol chi tzala Jehová yetoj cu bꞌeybꞌal, ta jaxca tuꞌ, chi oc cꞌal pax watxꞌcꞌulal snan cu xol yetoj ebꞌ chi jowi oc kin.

8 Yel xacꞌal watxꞌ, caxcꞌal txenne tzet chi kiꞌ yin swatxꞌil, yintaj pax tol miman tzet chi kiꞌ yin tzet man watxꞌoj.

9 Jaon tiꞌ chi cam cu naꞌon tzet chi cu waꞌne, jaꞌ Jehová chi cu ijbꞌan yin tzet chi cu naꞌ cu waꞌneni.

10 Jaꞌ ebꞌ rey ẍejabꞌ Dios yeoc ebꞌ, yuxan sowalil watxꞌ chi yute swaꞌnen yeoc junoj tzetyetal ebꞌ yin sjichanil.

11 Jaꞌ masanil echbꞌal tol tzꞌajan, watxꞌ jun tuꞌ yul sat Jehová; yutol jaꞌ Naj jix naꞌbꞌalne eloj, yuxan ey echbꞌal.

12 Jaꞌ ebꞌ rey, man smoo oj chi yun tzetyetal man watxꞌoj ebꞌ, yutol jaꞌ sjichanil, jaꞌ eyoc yipoj yopiso ebꞌ.

13 Jaꞌ ebꞌ rey caw chi tzala ebꞌ yetoj mactxequel tol yel tzet chi yalaꞌ.

14 Ta tol chi tit sjowal naj rey, ey smey chi oc camich, jal pax junoj ey snaꞌbꞌal xin, chi snaꞌ tzet chi yun sictanen ey junoj jowal.

15 Ta tol chi tzeetzon sat naj rey, cꞌam xiwcꞌulalil camich kin, jaꞌ swatxꞌcꞌulal naj laan jaxca yasunal bꞌabꞌel nabꞌ.

16 Yel xacꞌal watxꞌ ta chi kiꞌ cu jelanil, yintaj chꞌen oro; yel xacꞌal watxꞌ tol ey cu naꞌbꞌal yintaj mimanoj chꞌen plata.

17 Jaꞌ snaꞌbꞌal ebꞌ jichan sbꞌeybꞌal, tol chi spoꞌoel sbꞌa ebꞌ xol spenail; ta tol chi cu teyne cu bꞌeybꞌal, lalan cu teynen cu bꞌa chi yal tuꞌ.

18 Jaꞌ meynebꞌail, chi yiꞌtej qꞌueybꞌanilal kibꞌan; ta tol chi yiꞌa can sbꞌa junoj mactxequel, jaxa pax yin slawubꞌal chi eyqꞌueyi.

19 Watxꞌ tol yeynajil chi kute cu bꞌa yetoj ebꞌ mebꞌa, yintaj pax tol chi cu poꞌoecꞌ tzet chi kiꞌ yetoj ebꞌ chi smeyne sbꞌa.

20 Ta tol chi cu chaꞌ kabꞌ cuybꞌanile, watxꞌ cꞌal oj yun cu bꞌeytoj; yel xacꞌal tzalacꞌulal yet mac tol jaꞌ Jehová chi yaoc yipoj scꞌul.

21 Jaꞌ mactxequel jelan, oj al-le yin tol chi naꞌcha el yu; jaꞌ kꞌane tol watxꞌ yoqui, chi moncha ebꞌ chi abꞌeni.

22 Jaꞌ mactxequel chi naꞌcha el yu, chi iꞌle a can; jal pax mac pena snaꞌbꞌal xin, asan syaꞌilal chi tit yibꞌan yu spena snaꞌbꞌal tuꞌ.

23 Jaꞌ mactxequel jelan, chi snaꞌ tzet chi yute kꞌanabꞌ sbꞌa, yuxan ey mac chi moncha yu skꞌane chi yalaꞌ.

24 Jaꞌ watxꞌ kꞌane, laan ẍiꞌal jaxca yaal awcabꞌ; chi tzala xacꞌal a cu naꞌbꞌal yu, catuꞌ chi yiꞌon yip cu naꞌbꞌal.

25 Ey bꞌeybꞌale tol caw watxꞌ cu naꞌoni; jaꞌ bꞌey camich chi cu yiꞌ pax cantoj.

26 Jaꞌ yet ey cu wail, jaꞌ jun wail tuꞌ chi cu chejon mulna sicꞌlebꞌil.

27 Jaꞌ junoj penawom, asanne cꞌal spenail chi snaꞌoꞌtane, masanil skꞌane chi yalaꞌ, laan jaxca xaj kꞌakꞌ.

28 Jaꞌ junoj qꞌueynajtoj snaꞌbꞌal tucꞌal chi a sjowal; jaꞌ yu skꞌane chi yalaꞌ, yuxan chi scajatne a sbꞌa yetoj ebꞌ swatxꞌil ánima.

29 Jaꞌ junoj comon cꞌal chi makꞌwa yin yet animail chi yetne swatxꞌil ánima, catuꞌ chi ijbꞌaletoj ebꞌ yu yin bꞌeybꞌale man watxꞌoj.

30 Jaꞌ mactxequel lalan yecꞌ yin snaꞌbꞌal yunen junoj spenail, chi smutzꞌ sat, jaꞌ yet tuxa chi yun junoj spenail tuꞌ, caw chi skꞌuxey yee.

31 Jaꞌ mactxequel sajxa xil sjolom, jaxca wal tol scorona yeocoj, yutol watxꞌ sbꞌeybꞌal jun mactxequel tuꞌ, yuxan queytuꞌ yili.

32 Yel xacꞌal watxꞌ tol ey cu mimancꞌulal, yintaj pax tol jelan kakꞌon jowal; yel xacꞌal watxꞌ tol jaon chi cu mitxꞌey cu bꞌa, yintaj pax tol chi kakꞌ eyqꞌuey junoj conobꞌ.

33 Caxcꞌal mi ey bꞌey chi cu naꞌbꞌalne el cu waꞌnen yeoc junoj tzetyetal, asanne cꞌal pax Jehová chi aon oc yin xolilal masanil.