2 Jaꞌ yet chi kꞌanabꞌ junoj ey snaꞌbꞌal, caw chi ẍaꞌ scꞌul ebꞌ ánima yabꞌeni, jal pax ebꞌ pena snaꞌbꞌal xin, jaꞌ kꞌane tol cꞌam yopiso chi yal ebꞌ.

3 Jaꞌ Jehová ey cꞌal ecꞌ bꞌey masanil yul yibꞌankꞌinal tiꞌ; tꞌanan cꞌal oc yin ebꞌ watxꞌ cꞌal yin ebꞌ pena.

4 Jaꞌ watxꞌ kꞌane chi yakꞌ smimanil cu cꞌul, jaxca tol chi cu pitzcꞌu a yu, jal pax bꞌuchwal kꞌane xin, caw chi yabꞌ syaꞌil cu pixan yu.

5 Jaꞌ ebꞌ cꞌam snaꞌbꞌal, cꞌam chi ẍaꞌ yabꞌ tenchebꞌal chi yakꞌ smam tet; jal pax mactxequel chi ẍaꞌ yabꞌ xin, lalan xꞌoxon eloj tol ey snaꞌbꞌal.

6 Jaꞌ bꞌey sna ebꞌ ánima watxꞌ snaꞌbꞌal, caw miman tzetyetal ey tet ebꞌ, jal pax bꞌey sna naj penawom xin, asan bꞌiscꞌulal chi jul yibꞌan ebꞌ, cꞌam chi yakꞌ snaꞌbꞌaloj ebꞌ yin swatxꞌilal.

7 Jaꞌ mactxequel tol jelan, chi yalel sjelanilal tuꞌ; jal pax mactxequel tol cꞌam snaꞌbꞌal xin, cꞌam yeloc apnoj tzet chi yalaꞌ.

8 Jaꞌ saꞌbꞌeal ebꞌ penawom cꞌam chi ẍaꞌ scꞌul Jehová, jal pax ebꞌ watxꞌ snaꞌbꞌal xin, watxꞌ chi yun ẍaꞌle xa ebꞌ yu.

9 Caw cꞌam chi ẍaꞌ scꞌul Jehová sbꞌeybꞌal ebꞌ penawom, jal pax yin ebꞌ watxꞌ sbꞌeybꞌal xin, caw ey scamcꞌulal.

10 Jaꞌ mactxequel chi sbꞌejcan watxꞌ bꞌeybꞌale, sowalil chi akꞌle cuenta. Jaꞌ mactxequel cꞌam chi yoche chi tenchanelei, oj camoj.

11 Jaꞌ Jehová yotaj bꞌey ey ebꞌ camom bꞌey cambꞌal. ¿Tumi cꞌam chi yil cu naꞌbꞌal che naꞌ?

12 Jaꞌ mactxequel chi bꞌuchwa yin yet animail, cꞌam chi yoche ta ey mac chi tenchaneni, tam wal chi skꞌanle snaꞌbꞌal tet ebꞌ jelan.

13 Jaꞌ mactxequel tol chi tzalai, chi tzeetzon sat; jal pax mactxequel chi cusi, chi tac scꞌul.

14 Jaꞌ mactxequel ey snaꞌbꞌal, chi seyecꞌ jelanil; jal pax ebꞌ pena snaꞌbꞌal xin, chi tzala ebꞌ yetoj cꞌam snaꞌbꞌal tuꞌ.

15 Jaꞌ mactxequel eyoc yin bꞌiscꞌulal, pena xacꞌal masanil junjun cꞌu yul sat; jal pax mactxequel chi tzala xin, kꞌin cꞌal yeoc ebꞌ junjun cꞌu.

16 Yel xacꞌal watxꞌ ket, ta tol ey yeloc apnoj Jehová yul cu sat, caxcꞌal mebꞌa jon, yintaj pax tol bꞌeom jon, ey jon cꞌal oc yin bꞌiscꞌulal.

17 Yel xacꞌal watxꞌ ta ey camcꞌulal yul cu na, caxcꞌal ita chi cu chiꞌ, yintaj pax tol chiꞌbꞌe cꞌal chi cu chiꞌ, ta asan cꞌal jowal ey snan cu xol.

18 Jaꞌ mactxequel cꞌuun stit sjowal, asan cꞌal jowal chi a yu ebꞌ; jal pax mactxequel ey smimancꞌulal xin, chi yakꞌ tan jowal.

19 Jaꞌ tet ebꞌ isa, jaxca wal tol eey qꞌuix yul sbꞌe ebꞌ; jal pax ebꞌ watxꞌ snaꞌbꞌal xin, jichan cꞌal sbꞌey ebꞌ, cꞌam cꞌal tzetyetal eey yul sbꞌe ebꞌ.

20 Jaꞌ ebꞌ uninale ey snaꞌbꞌal, chi yakꞌ tzalabꞌoj scꞌul smam ebꞌ; jal pax ebꞌ cꞌam snaꞌbꞌal xin, chi yintajne el xutx ebꞌ.

21 Jaꞌ mactxequel cꞌam snaꞌbꞌal, chi yakꞌ tzalabꞌoj scꞌul yetoj cꞌam snaꞌbꞌalil tuꞌ; jal pax mac ey snaꞌbꞌal xin, chi yil cꞌal tzet chi yute bꞌeytoj sbꞌa.

22 Ta cꞌam chi cam cu kꞌanle ecꞌoj, jaꞌ tzetyetal chi cu naꞌ, chi etex eloj; jal pax mac chi ẍaꞌ yabꞌ watxꞌ naꞌbꞌale xin, watxꞌ cꞌal chi elocoj.

23 Watxꞌ chi kabꞌe ta watxꞌ chi yun cu pajtzen junoj kꞌane; manxa swatxꞌiloj ta tol chi ẍaꞌle sbꞌa cu kꞌanabꞌi.

24 Jaꞌ sbꞌeal kꞌinale chi too bꞌey satcan, yet watxꞌ cꞌam chi toocan ebꞌ watxꞌ snaꞌbꞌal bꞌey cambꞌal.

25 Jaꞌ Jehová chi yuch lawoj tzet ey yul skꞌabꞌ mac chi smimanbꞌane sbꞌa, jal pax yetoj ebꞌ ix ix camnajxa yichamil xin, chi colwa yetoj ebꞌ.

26 Cꞌam chi ẍaꞌ scꞌul Jehová tzet chi snaꞌ ebꞌ penawom, jal pax yetoj ebꞌ watxꞌ, caw chi tzala yetoj ebꞌ.

27 Jaꞌ mactxequel miman cꞌal tzet chi yoche, caw miman cꞌal tzet chi sloctej yibꞌan yetoj ebꞌ caan yetoj yul sna, jaꞌ mactxequel cꞌam chi chaꞌon chꞌen montebꞌal tumin, caw oj naatbꞌoj skꞌinal.

28 Jaꞌ mactxequel jichan snaꞌbꞌal, chi cam snaꞌon tzet oj yute takꞌwoj sbꞌa; jal pax mactxequel pena snaꞌbꞌal xin, txololi xacꞌal yalon pena kꞌane.

29 Naat chi el Jehová scꞌatan ebꞌ penawom, jal pax ebꞌ jichan snaꞌbꞌal xin, chi abꞌle xa ebꞌ yu Naj.

30 Jaꞌ mactxequel chi tzeetzoni chi tzala cu cꞌul yu; jaꞌ junoj watxꞌ kꞌane caw chi cu iptzele yu chi kabꞌe.

31 Jaꞌ mactxequel chi ẍaꞌ yabꞌ tenchebꞌal watxꞌ chi elocoj, ey yalon yet yoc xol ebꞌ ey snaꞌbꞌal.

32 Jaꞌ mactxequel cꞌam chi ẍaꞌ yabꞌ tenchebꞌal, jacꞌal oc chi yintajne el sbꞌa; jal pax mac chi ẍaꞌ yabꞌ tenchebꞌal xin, tol chi yiꞌ sjelanil.

33 Jaꞌ mactxequel tol ey yeloc apnoj Jehová yul sat, chi chꞌibꞌ sjelanil; ta tol chi koche tol miman keloc apnoj, sowalil tol yeynajil chi kute cu bꞌa yin sbꞌabꞌelal.