2 Jaꞌ mactxequel watxꞌ sbꞌeybꞌal, ey yeloc apnoj Jehová yul sat, jal pax mac pena sbꞌeybꞌal xin, cꞌam yeloc apnoj Dios yul sat.

3 Jaꞌ tzet chi yal junoj cꞌam snaꞌbꞌal catuꞌ ey meynebꞌail yin, chi tit syaꞌilal yibꞌan; jal pax skꞌane junoj ey snaꞌbꞌal xin, chi col-le el yu.

4 Ta cꞌam noꞌ wacax, cꞌam ixim tiriw yul cꞌunaꞌ, jaꞌton yu yipal noꞌ wacax tuꞌ, yuxan miman ixim tiriw chi yamchai.

5 Jaꞌ ebꞌ testigo watxꞌ, cꞌam chi yakꞌ lekꞌtiꞌal ebꞌ; jal pax ebꞌ pena testigo xin, asan cꞌal lekꞌtiꞌal chi yal ebꞌ.

6 Jaꞌ mactxequel chi smeyne sbꞌa, asan cꞌal jelanil chi seyaꞌ, cꞌam cꞌal pax chi ilcha pax oc yu; jal pax mactxequel jelan xin, caw subꞌo cꞌal chi yun yilcha oc yu.

7 Elan scꞌatan ebꞌ cꞌam snaꞌbꞌal, yutol jaꞌ yin tzet chi yal ebꞌ, cꞌam tzet cha wiꞌ yin.

8 Jaꞌ jelanilal chi akꞌon jelanbꞌoj snaꞌbꞌal ebꞌ jelan, jal pax mac pena snaꞌbꞌal xin, jacꞌal jun spena naꞌbꞌal tuꞌ chi etneni.

9 Jaꞌ ebꞌ pena snaꞌbꞌal, cꞌam tzet chi snaꞌ ebꞌ, caxcꞌal pena chi yun ebꞌ, jal pax ebꞌ ánima watxꞌ xin, man comonoj chi txꞌemwa ebꞌ xol ánima.

10 Junjun jon cꞌal kotaj yin cu naꞌbꞌal ta ey cu bꞌiscꞌulal, ma tol caw tzalacꞌulal ey jon; jaꞌ ebꞌ txꞌoj animail, man yotaj oj ebꞌ tzet chi cu naꞌ.

11 Jaꞌ masanil yicꞌaal ebꞌ penawom oj lawoj eyoj; jal pax yicꞌaal ebꞌ ánima watxꞌ snaꞌbꞌal, tol chi chꞌibꞌ sbꞌisil ebꞌ.

12 Ey wal bꞌeybꞌale tol watxꞌ cu naꞌoni; jaꞌ bꞌey camich chi cu yiꞌ pax cantoj.

13 Caxcꞌal ey bꞌey chi jul cu cuscꞌulal, ey pax bꞌey chi cu tzee yin slawubꞌal. Jaꞌ snan xol cu tzalacꞌulal, ey cꞌal pax bꞌey chi jul cu cuscꞌulal.

14 Jaꞌ mactxequel cꞌam snaꞌbꞌal chi sbꞌejcan watxꞌ bꞌeybꞌale, jaxa yin pena bꞌeybꞌale chi yakꞌ tzalabꞌoj scꞌul. Jal pax mac watxꞌ sbꞌeybꞌal xin, caw chi tzala yetoj watxꞌ bꞌeybꞌale tuꞌ.

15 Jaꞌ mactxequel cꞌam snaꞌbꞌal, chi ya cꞌal oc masanil yin scꞌul jantaj tzet chi al-le tet; jal pax mac ey snaꞌbꞌal xin, chi cam snaꞌon yet cꞌamto chi yun junoj tzetyetal.

16 Ta tol ey cu naꞌbꞌal, chi cu xiw tet tzetyetal pena, catuꞌ chi cu poꞌon el cu bꞌa xol; jal pax mactxequel pena snaꞌbꞌal xin, chi smeyne sbꞌa, yutol cꞌam yeloc apnoj yul sat.

17 Jaꞌ mactxequel cꞌuun stit sjowal, cꞌam snaꞌbꞌal ebꞌ, yutol comon cꞌal chi yute sbꞌa. Jaꞌ mactxequel pena cꞌal tzet chi snaꞌ yin yet animail, cꞌam chi tzala ebꞌ ánima yetoj.

18 Jaꞌ mactxequel cꞌam snaꞌbꞌal, pena cꞌal spajtzebꞌal chi ẍaꞌ; jal pax ebꞌ ey snaꞌbꞌal xin, ey cꞌal ecꞌ jelanilal yin snaꞌbꞌal ebꞌ.

19 Jaꞌ ebꞌ pena sbꞌeybꞌal, chi ey noan ebꞌ sattaj ebꞌ watxꞌ, chi ey noan ebꞌ bꞌey stiꞌ spuertail sna ebꞌ watxꞌ snaꞌbꞌal.

20 Jaꞌ ebꞌ mebꞌa, chi intajnele el ebꞌ yu yet animail; jal pax ebꞌ bꞌeom xin, caw ecꞌal swatxꞌil ánima ebꞌ.

21 Chi oc cu penail, ta chi kintajne el ebꞌ ket animail, ta tol chi okꞌ cu cꞌul yin ebꞌ mebꞌa, caw watxꞌ ket.

22 Jaꞌ mactxequel asan spenail chi sey yunne, qꞌueynajxa toj snaꞌbꞌal ebꞌ yin watxꞌ bꞌeybꞌale; jal pax mac tol watxꞌ tzet chi el yunen xin, jijem ebꞌ ánima tet, catuꞌ ey camcꞌulal snan xol ebꞌ.

23 Ey tzet chi kiꞌ yin yal cꞌal tzet mulnail chi cu waꞌne; jal ta kꞌane cꞌal chi kun xin, mebꞌail chi tit kibꞌan yu.

24 Jaꞌ mactxequel ey snaꞌbꞌal, chi bꞌinale ebꞌ yu sjelanil tuꞌ; jal pax ebꞌ pena snaꞌbꞌal xin, chi intajnele el ebꞌ yu spena naꞌbꞌal tuꞌ.

25 Jaꞌ junoj testigo yel chi yalaꞌ, chi scol can el yet animail, jal junoj lekꞌtiꞌ testigo xin, chi yetne yet animail.

26 Ta tol jijem chi kute cu bꞌa tet Jehová; caw watxꞌ ket chi yal tuꞌ, chi colwa cꞌal pax Dios yetoj ebꞌ kuninal.

27 Ta ey yeloc apnoj Jehová yul cu sat, ey cu kꞌinal yu, catuꞌ chi cu col-le el yul skꞌabꞌ camich.

28 Ta jaꞌ junoj rey eyoc yin yaawilal yibꞌan junoj miman conobꞌ, caw bꞌinabꞌil chi yal tuꞌ. Ta jaywanne ánima bꞌey eyoc yin reyal xin, chi lawi ey jun conobꞌ tuꞌ.

29 Ta ey cu mimancꞌulal, jaꞌ jun tuꞌ chi yal yeloc apnoj tol ey cu jelanil; ta cꞌuun stit cu jowal xin, chi yal yeloc apnoj tol cꞌam cu naꞌbꞌal.

30 Ta tzalacꞌulal cꞌal ey jon, watxꞌ cꞌal cu cꞌul, ta tol ey cu chichoncꞌulal xin, chi kꞌuxletoj cu bꞌajil yu.

31 Ta ey junoj mactxequel chi etnen ebꞌ mebꞌa, lalan yintajnen el Dios ebꞌ, ta tol chi okꞌ cu cꞌul yin ebꞌ xin, lalan cu txꞌoxon eloj tol ey yeloc apnoj Dios yul cu sat.

32 Jaꞌ ebꞌ penawom, jacꞌal oc spenail ebꞌ chi akꞌon jul yibꞌan; jal pax mactxequel watxꞌ snaꞌbꞌal xin, ey cꞌal oc Jehová yipoj scꞌul masantaꞌcꞌal chi cami.

33 Jaꞌ mactxequel caw wal jelan, cꞌam chi smeyne sbꞌa yetoj sjelanil tuꞌ; jal pax mac cꞌam snaꞌbꞌal xin, caw wal chi smeyne xacꞌal sbꞌa yalon el niꞌoj tzet yotaj.

34 Ta tol watxꞌ sbꞌeybꞌal junoj nación, caw yelcꞌulal chi chꞌibꞌ sbꞌisil, ta tol pena sbꞌeybꞌal xin, chi el sqꞌuixwil.

35 Jaꞌ junoj yakꞌomal servil tol ey snaꞌbꞌal, chi tzala naj rey yetoj; jal pax junoj yakꞌomal servil tol chi el sqꞌuixwil naj yu xin, chi tit sjowal scꞌul naj yin.