2 Jaꞌ mactxequel watxꞌ snaꞌbꞌal, jaꞌ swatxꞌilal chi ẍaꞌ spajtzebꞌaloj yu tzet chi yalaꞌ; jal pax ebꞌ chi yetne yet animail xin, jaꞌ syaꞌilal oj ẍaꞌ spajtzebꞌaloj ebꞌ.

3 Ta tol chi cu teyne cu bꞌa yetoj cu kꞌane chi kalaꞌ, jaon cꞌal oc chi cu teyne cu bꞌa; jal pax mac yel xacꞌal chi ecꞌbꞌan skꞌanabꞌ xin, jacꞌal oc chi yetne sbꞌa.

4 Jaꞌ ebꞌ isa, ey tzet chi yoche ebꞌ, cꞌam pax chi ilcha yu ebꞌ. Jal pax mac chi mulna xin, ey cꞌal masanil tzetyetal tet ebꞌ.

5 Jaꞌ mactxequel watxꞌ snaꞌbꞌal, cꞌam chi yoche chi yetne yet animail; jal pax mactxequel pena snaꞌbꞌal xin, caw yaabꞌetaj catuꞌ qꞌuixwiltaj chi yute sbꞌa.

6 Ta tol jichan cu bꞌeybꞌal, cꞌam tzet chi tit kibꞌan; ta cꞌam swatxꞌil cu bꞌeybꞌal xin, caw chi tit kibꞌan.

7 Ey mactxequel tol cꞌam niꞌoj tzetyetal ey tet, jaxca xacꞌal tol bꞌeom chi yute xꞌoxon el sbꞌa; ey pax mactxequel caw ey tzetyetal ey tet, mebꞌa xacꞌal chi yute pax sbꞌa.

8 Jaꞌ ebꞌ bꞌeom, chi skeꞌ smanon el sbꞌa ebꞌ yul skꞌabꞌ ebꞌ elkꞌom yetoj tumin, jal pax ebꞌ mebꞌa xin, cꞌam bꞌey chi elkꞌaneletoj ebꞌ.

9 Jaꞌ ebꞌ watxꞌ snaꞌbꞌal, laan ebꞌ jaxca junoj tzejtebꞌal tol chi tzejeji, jal pax ebꞌ pena snaꞌbꞌal xin, laan ebꞌ jaxca tzejtebꞌal tuxa chi tan skꞌakꞌal.

10 Jaꞌ mactxequel chi smeyne sbꞌa, asan jowal chi yunne; jal pax ebꞌ yeynajil chi yute sbꞌa, jaꞌ jelanil cꞌal naꞌbꞌale ey tet ebꞌ.

11 Jaꞌ chꞌen tumin, junne txolan chi yun syamcha chꞌen yin junoj spenail, junne pax txolan chi yun slawi ey chꞌen. Jal pax bꞌeomal chi yambꞌale yin cꞌuancꞌulal yin watxꞌ mulnail, cꞌam chi lawi eyoj.

12 Jaꞌ ebꞌ cꞌam chi eloc tzet chi yoche, caw cuscꞌulal chi yun can snaꞌbꞌal ebꞌ. Jal pax ebꞌ chi eloc tzet chi yoche xin, caw chi tzala ebꞌ.

13 Jaꞌ mactxequel cꞌam chi sjije junoj chejbꞌanile, oj tit yibꞌan; jal pax mactxequel ey yeloc apnoj junoj chejbꞌanile yul sat, watxꞌ chi elocoj.

14 Jaꞌ cuybꞌanile chi yal junoj tol jelan snaꞌbꞌal, chi cu yiꞌtoj yin kꞌinale, chi cu iꞌle el yul sbꞌeal camich yu.

15 Jaꞌ mactxequel ey snaꞌbꞌal, caw chi ochele yu ebꞌ ánima, jal pax mac chi yetne yet animail xin, yin eymanil chi qꞌueyle eloj.

16 Jaꞌ mactxequel tol ey snaꞌbꞌal, chi cam yilon tzet chi yunne; jal pax mactxequel tol pena snaꞌbꞌal xin, jaꞌ sbꞌeybꞌal chi txꞌoxon eloj yu tzet chi yunne.

17 Jaꞌ junoj chejabꞌwom cꞌam chi yal ẍejbꞌanil, asan cꞌal cajlebꞌail chi yiꞌtej. Jal pax junoj chejabꞌwom chi yal ẍejbꞌanil xin, watxꞌ chi eloc tzet chi yalaꞌ.

18 Ta cꞌam chi cu chaꞌ kabꞌ watxꞌ naꞌbꞌale chi al-le ey jon, asan cꞌal mebꞌail cꞌal qꞌuixwilal chi tit kibꞌan. Ta chi cu chaꞌ kabꞌ tenchebꞌal xin, caw wal chi cu iꞌle a can yu.

19 Jaꞌ yet chi ilcha oc ku tzet chi yoche cu cꞌul, caw chi cu tzalai; jal ebꞌ pena snaꞌbꞌal cꞌam chi yoche ebꞌ chi spoꞌoel sbꞌa yin spenail.

20 Watxꞌ tol junne cꞌal chach ecꞌ yetoj ebꞌ watxꞌ snaꞌbꞌal, yet watxꞌ cha wiꞌ ja jelanil; ta tol junne cꞌal chach ecꞌ yetoj ebꞌ pena snaꞌbꞌal xin, oj jaach lawoj xacꞌal ey yetoj ebꞌ.

21 Jaꞌ ebꞌ penawom tzajan cꞌal oc spenail yintaj ebꞌ; jal pax ebꞌ watxꞌ snaꞌbꞌal xin, jacꞌal swatxꞌilal chi ẍaꞌ ebꞌ.

22 Jaꞌ mactxequel watxꞌ snaꞌbꞌal, ey tzetyetal chi yakꞌ can ebꞌ tet yitxiquin; jal sbꞌeomal ebꞌ penawom xin, chi cancan tet ebꞌ watxꞌ snaꞌbꞌal.

23 Jaꞌ xꞌotxꞌ ebꞌ mebꞌa, caw miman awo chi skeꞌ yakꞌon sat; asan xin, caw txenne chi yiꞌ ebꞌ yutol ey mac chi iꞌon ecꞌ tet ebꞌ.

24 Jaꞌ mactxequel cꞌam scamcꞌulal yin yuninal, cꞌam chi yakꞌ cuenta; jal pax mac ey scamcꞌulal yin xin, chi yakꞌ cuenta yuninal.

25 Jaꞌ mactxequel watxꞌ snaꞌbꞌal, ey sloꞌbꞌe ebꞌ; jal pax mac pena snaꞌbꞌal xin, ey cꞌal swail masanil tiempo.