2 Jaꞌ junoj ánima watxꞌ, jaꞌ swatxꞌilal oj ẍaꞌ tet Jehová, jal pax mactxequel pena snaꞌbꞌal xin, chi ale oc syaꞌilal yin yu Dios.

3 Jaꞌ ebꞌ ánima tol jaꞌ spenail eyoc yipoj scꞌul, laan ebꞌ jaxca junoj na waꞌnebꞌil a yibꞌan pooj; jal pax ebꞌ watxꞌ sbꞌeybꞌal xin, caw watxꞌ yeoc ebꞌ jaxca junoj teꞌ teꞌ caw ey yip xeꞌ.

4 Jaꞌ junoj ix ix tol watxꞌ cꞌal tzet chi yun yetoj snaꞌbꞌal, jaxca wal junoj rey queytuꞌ yeoc yichamil ix yul sat; jal pax junoj ix istile tol pena snaꞌbꞌal xin, caw wal chi yakꞌ lawoj ey yichamil ix tuꞌ.

5 Jaꞌ ebꞌ ánima watxꞌ snaꞌbꞌal, asan swatxꞌilal chi snaꞌ ebꞌ; jal pax ebꞌ pena snaꞌbꞌal xin, asan etne ánima chi snaꞌ ebꞌ.

6 Jaꞌ tzet chi yal ebꞌ ánima pena snaꞌbꞌal, chi cam ebꞌ ánima yu tzet chi yal ebꞌ tuꞌ, jal pax skꞌane ebꞌ watxꞌ snaꞌbꞌal xin, chi colcha ebꞌ ánima yu.

7 Jaꞌ yet chi eyqꞌuey ebꞌ penawom, chi lawi ey ebꞌ yin junelne, jal pax mactxequel watxꞌ snaꞌbꞌal xin, chi bꞌinale cꞌal ecꞌ ebꞌ yetoj yuninal.

8 Watxꞌ chi al-le yin ebꞌ ánima yu sjelanil, jal pax mactxequel cꞌam snaꞌbꞌal xin, chi intajnele el ebꞌ.

9 Watxꞌ yet mactxequel cꞌam yeloc apnoj xol yet animail, ey pax yakꞌomal servil ebꞌ eyocoj, yintaj pax mac mimejtaj chi yute sbꞌa, cꞌam pax tzet watxꞌ chi sloꞌ ebꞌ.

10 Jaꞌ mactxequel watxꞌ snaꞌbꞌal, chi steyne sjobꞌbꞌeal noꞌ ebꞌ, jal pax ebꞌ pena snaꞌbꞌal xin, caw chi yetne sjobꞌbꞌeal noꞌ ebꞌ.

11 Jaꞌ mactxequel chi mulna sat txꞌotxꞌ txꞌotxꞌ, ey sloꞌbꞌe ebꞌ; jal pax mactxequel cꞌam snaꞌbꞌal xin, asan yin tzetyetal tol cꞌam yopiso chi ecꞌ tiempo yu.

12 Jaꞌ ebꞌ cꞌam Dios yul sat, chi yoche ebꞌ chi oc bꞌeomal yin eymanil yin yunen spenail; jal pax ebꞌ watxꞌ snaꞌbꞌal, jaꞌ smulnail ebꞌ, jaꞌ chi akꞌon cꞌal tzet chi oc yopiso yu ebꞌ junjun cꞌu.

13 Jaꞌ ebꞌ penawom, jacꞌal oc spena kꞌane ebꞌ tuꞌ chi iꞌoncantej yibꞌan, jal pax mac watxꞌ snaꞌbꞌal xin, chi elcan xol syaꞌtajilal.

14 Junjun cꞌal mactxequel chi ẍaꞌ spaj tzetyetal chi yalaꞌ, catuꞌ chi ẍaꞌon cꞌal pax spajtzebꞌal yu tzettaj yetal chi el yuneni.

15 Jaꞌ mactxequel pena snaꞌbꞌal, chi snaꞌ tol watxꞌ cꞌal masanil tzettaj yetal chi yunne, jal mactxequel tol ey snaꞌbꞌal xin, chi ẍaꞌ yabꞌ watxꞌ naꞌbꞌale.

16 Jaꞌ mactxequel cꞌam snaꞌbꞌal, yin jun txolan chi xꞌoxel sjowal snaꞌbꞌal; jal pax mac ey snaꞌbꞌal xin, tucꞌal chi yabꞌ ebꞌ tzet chi al-le yin.

17 Jaꞌ junoj testigo tol watxꞌ cꞌaltaꞌ snaꞌbꞌal, yel tzet chi yalaꞌ; jal pax junoj testigo tucꞌaltaꞌ chi yetne yet animail, asan lekꞌtiꞌal chi yalaꞌ.

18 Jaꞌ ebꞌ comon cꞌal chi yute kꞌanabꞌ sbꞌa, chi yakꞌ cus cꞌul yet animail yu skꞌane ebꞌ chi yalaꞌ; jal pax mactxequel watxꞌ snaꞌbꞌal xin, caw chi mimancꞌulnele ebꞌ eyoc yin cuscꞌulal yu skꞌane ebꞌ chi yalaꞌ.

19 Jaꞌ mactxequel yel cꞌal tzet chi yalaꞌ, naatil chi ecꞌ ebꞌ; jal pax ebꞌ lekꞌtiꞌ xin, yin eymanil chi qꞌueyle el ebꞌ.

20 Jaꞌ ebꞌ pena snaꞌbꞌal, asan cꞌal yin spenail eyoc snaꞌbꞌal ebꞌ. Jal pax ebꞌ watxꞌ snaꞌbꞌal xin, tzalacꞌulal chi ilcha oc yu ebꞌ.

21 Jaꞌ mactxequel watxꞌ snaꞌbꞌal, cꞌam junoj spenail chi jul yibꞌan; jal pax ebꞌ penawom xin, caw oj cus scꞌul ebꞌ yabꞌen syaꞌilal.

22 Caw wal chi yaale el ebꞌ lekꞌtiꞌ yu Jehová; jal pax ebꞌ cꞌam chi yetne yet animail xin, caw chi tzala Naj yetoj ebꞌ.

23 Jaꞌ mactxequel ey snaꞌbꞌal, cꞌam chi smeyne sbꞌa yu tzetyetal yotaj tuꞌ; jal mactxequel cꞌam snaꞌbꞌal xin, chi xꞌox xacꞌal eloj tol cꞌam snaꞌbꞌal.

24 Jaꞌ mac chi mulnai, ey yakꞌomal servil ebꞌ; jal pax mac isa xin, chi chejle yu junojxa.

25 Jaꞌ bꞌiscꞌulal chi yakꞌ cusa cu cꞌul, jal pax junoj watxꞌ kꞌane xin, chi yakꞌ cu tzalacꞌulal.

26 Jaꞌ mactxequel watxꞌ snaꞌbꞌal ijbꞌawom yeoc yin swatxꞌil xol yet animail; jal pax mac pena snaꞌbꞌal xin, chi yijbꞌa yet animail yin spenail.

27 Jaꞌ junoj ujtem noꞌ tol isa, cꞌam chi michꞌcha noꞌ yu; jal pax mactxequel tol cꞌasan xin, chi yakꞌ snaꞌbꞌal yetoj tzet chi michꞌcha yu tuꞌ.

28 Jaꞌ sbꞌeybꞌal ebꞌ watxꞌ snaꞌbꞌal, kꞌinale chi yakꞌa; jaꞌ yin jun bꞌeybꞌale tuꞌ, cꞌam camich chi yiꞌtej yibꞌan.