2 Jaꞌ meynebꞌail, asan cꞌal qꞌuixwilal chi yiꞌtej; jal ebꞌ yeynajil chi yute sbꞌa xin, caw jelan chi eloc ebꞌ.

3 Jaꞌ mactxequel jichan snaꞌbꞌal, jaꞌton jun sjichanil tuꞌ chi ijbꞌani; jal pax mac chi yetne yet animail xin, oj qꞌueyle el ebꞌ yu scaabꞌ satil tuꞌ.

4 Jaꞌ yet jun cꞌual oj naꞌle oc kin, cꞌamxa yopiso cu bꞌeomal tuꞌ, ta jichan pax cu bꞌeybꞌal xin, oj cu col-le el yul skꞌabꞌ camich.

5 Jaꞌ sjichanilal, jaꞌ chi waꞌnen oc cu bꞌeybꞌal yin swatxꞌilal, ta tol pena chi kute cu naꞌbꞌal xin, oj tit kibꞌan yu cu pena naꞌbꞌal tuꞌ.

6 Jaꞌ sjichanil chi colon el ebꞌ ánima watxꞌ snaꞌbꞌal, jal pax mactxequel tol chi yoche cꞌal oc tzettaj yetal xin, jaꞌ chi akꞌon low yibꞌan ebꞌ.

7 Jaꞌ yet chi cam ebꞌ penawom, chi lawi ey tzetyetal eyoc yipoj scꞌul ebꞌ tuꞌ yetoj. Cꞌamxa chi yiꞌ sbꞌa tzetyetal naꞌan yu ebꞌ swaꞌneni.

8 Jaꞌ mac watxꞌ sbꞌeybꞌal, chi col-le el ebꞌ xol syaꞌilal yu Dios, jal pax junoj penawom xin, chi jul syaꞌilal yibꞌan.

9 Jaꞌ yetoj skꞌane junoj penawom chi yetne yet animail; jal pax jun watxꞌ snaꞌbꞌal xin, chi colcha yu sjelanil tuꞌ.

10 Jaꞌ yet chi chꞌibꞌ sbꞌisil ebꞌ watxꞌ snaꞌbꞌal, caw chi tzala ebꞌ conobꞌ; chi tzala cꞌal pax ebꞌ yet chi cam ebꞌ penawom.

11 Jaꞌ yu watxꞌ kꞌane chi yal ebꞌ watxꞌ sbꞌeybꞌal, yuxan chi waꞌxi a yili junoj conobꞌ, jal pax skꞌane ebꞌ penawom xin, tucꞌal chi yakꞌ lawoj eyoj.

12 Jaꞌ mactxequel cꞌam snaꞌbꞌal, pena cꞌal tzet chi yal yin yet animail, jal pax mac ey snaꞌbꞌal xin, cꞌam cꞌal tzet chi yalaꞌ.

13 Jaꞌ ebꞌ alom kꞌumale chi yalel tzet jix al-le tet yin ewantajil, jal pax mac watxꞌ snaꞌbꞌal xin, tucꞌal chi scꞌubꞌa yin snaꞌbꞌal.

14 Ta cꞌam snaꞌbꞌal mac chi ijbꞌan junoj conobꞌ, chi lawi eyoj; ta tol ecꞌal ebꞌ chi akꞌwi naꞌbꞌale, watxꞌ chi elocoj.

15 Ta chi kaoc cu bꞌa yin fiadoral yin junoj ket animail, caw man watxꞌoj chi cu elocoj; jaꞌ mactxequel cꞌam chi yaoc sbꞌa yin junoj mactxequel, cꞌam cꞌal tzet chi snaꞌ.

16 Jaꞌ junoj ix ix watxꞌ snaꞌbꞌal caw chi bꞌinale ecꞌoj, jaꞌ junoj winaj comon cꞌal chi yaoc sbꞌa yin junoj wa kꞌane, asan bꞌeomal oj yiꞌocoj, asan xin, chi intajnele eloj.

17 Jaꞌ mactxequel tol ey scamcꞌulal, jacꞌal oc chi chaꞌon swatxꞌilal, jal pax mac pena chi yute sbꞌa xol yet animail, chi tit can yibꞌan yu spenail tuꞌ.

18 Jaꞌ ebꞌ pena sbꞌeybꞌal, watxꞌ spajtzebꞌal oj ẍaꞌ ebꞌ yaloni, cꞌamaj pax oj; jaꞌ mactxequel watxꞌ tzet chi yun xin, jaꞌton wal swatxꞌilal oj ẍaꞌ spajtzebꞌaloj ebꞌ.

19 Ta tol chi cu bꞌeybꞌalne sjichanil, lalan cu too yintaj kꞌinale chi yal tuꞌ; ta jaꞌ spenail cꞌal chi cu bꞌeybꞌalne xin, lalan wal cu too yul sbꞌeal camich.

20 Jaꞌ ebꞌ man watxꞌoj snaꞌbꞌal, chi intajnele el ebꞌ yu Jehová; jal pax ebꞌ watxꞌ sbꞌeybꞌal xin caw chi tzala yetoj ebꞌ.

21 Caw yel, jaꞌ mactxequel ey spenail sowalil oj tit yibꞌan, jal mactxequel jichan snaꞌbꞌal xin, cꞌam cꞌal tzet oj ionoj.

22 Jaꞌ junoj ix ix watxꞌ yili, ta cꞌam pax snaꞌbꞌal, laan cꞌal ix jaxca junoj noꞌ txitam eyoc chꞌen oro slocxomaloj yin xaam.

23 Jaꞌ swatxꞌilal, jaꞌ chi yoche ebꞌ watxꞌ snaꞌbꞌal; jaꞌ tzet oj jul yibꞌan ebꞌ penawom, asan sjowal scꞌul Dios.

24 Jaꞌ ebꞌ ánima bꞌejan scꞌul spoꞌon ecꞌ stzetyetal, jaꞌ ebꞌ tuꞌ yel xacꞌal miman tzet oj ẍaꞌ spaj oj; jal pax ebꞌ tol bꞌas chi yute sbꞌa xin, chi tit xacꞌal can mebꞌail yibꞌan ebꞌ.

25 Jaꞌ mactxequel tol chi el yin scꞌul yakꞌoni, caw wal chi a can sbꞌisil swatxꞌilal tet; jaꞌ mac chi colwai, oj col-le cꞌal pax oj.

26 Jaꞌ mactxequel tucꞌal chi syambꞌa oc mimanoj ixim tiriw, yet watxꞌ chi a stool, caw pena chi yal ánima yin ebꞌ, jal pax mactxequel tol chi txonon ixim xin, watxꞌ chi al-le yin ebꞌ.

27 Jaꞌ mactxequel chi yun swatxꞌil, jaꞌ swatxꞌcꞌulal ánima chi chaꞌlo yu, jal pax mactxequel tol jaꞌ spenail chi seyaꞌ, oj michꞌcha ebꞌ yu spenail tuꞌ.

28 Jaꞌ mactxequel chi yaoc sbꞌeomal yipoj scꞌul, oj eyqꞌuey jaxca chi yun yeyqꞌuey tajin xaj teꞌ; jal pax ebꞌ watxꞌ sbꞌeybꞌal xin, oj yiꞌ yip ebꞌ jaxca chi yun syaaxbꞌi skꞌabꞌlaj teꞌ teꞌ.

29 Jaꞌ ebꞌ pena chi yute sbꞌa tet smam xutx cꞌal tet ebꞌ yuẍtaj, cꞌam smajul tzetyetal ebꞌ oj akꞌle oj; jaꞌ ebꞌ cꞌam snaꞌbꞌal oj oc ebꞌ ẍejabꞌoj ebꞌ jelan snaꞌbꞌal.

30 Jaꞌ tzet chi yun junoj jichan sbꞌeybꞌal, jaꞌ chi akꞌon skꞌinal ebꞌ. Jaꞌ ebꞌ jelan snaꞌbꞌal, caw chi moncha ánima yu ebꞌ.

31 Ta tol chi ẍaꞌ spajtzebꞌal ebꞌ watxꞌ snaꞌbꞌal bꞌey sat txꞌotxꞌ tiꞌ, jajxa tam wal ebꞌ cꞌam yeloc apnoj Dios yul sat, cꞌal ebꞌ amul, ¿tzet mi wal oj yun yeloc ebꞌ?