2 Jaꞌ ebꞌ chi yiꞌ sbꞌeomal yin spenail, cꞌam chi oc swatxꞌiloj ebꞌ, jal pax ebꞌ watxꞌ sbꞌeybꞌal xin, chi col-le el ebꞌ yul skꞌabꞌ camich.

3 Jaꞌ Jehová, cꞌam chi ẍaꞌ jul wail yibꞌan ebꞌ watxꞌ sbꞌeybꞌal, jal ebꞌ penawom xin, chi ale xacꞌal oc wail yibꞌan ebꞌ.

4 Jaꞌ yu isail yuxan oj jaach oc mebꞌail. Ta yelcꞌulal chach mulna xin, oj jaach oc bꞌeomal.

5 Jaꞌ junoj cꞌaale ey snaꞌbꞌal, chi syambꞌa sat yawo yet stiempoal. Jal pax junoj weyan cꞌal chi yun yet ey mulnail yet chi yambꞌale a sat awo, chi yakꞌ sqꞌuixwiloj smam.

6 Caw watxꞌ yet ebꞌ ánima tol watxꞌ snaꞌbꞌal; jal pax ebꞌ pena snaꞌbꞌal xin, jaꞌ yu spenail chi yun ebꞌ tuꞌ, yuxan chi tit can syaꞌilal yibꞌan ebꞌ.

7 Jaꞌ mactxequel watxꞌ snaꞌbꞌal, chi naꞌletej ebꞌ yu yet animail yu syaaxilal Dios ey tet; jal pax junoj pena snaꞌbꞌal, cꞌamxa mac chi naꞌontej ebꞌ.

8 Jaꞌ mactxequel ey snaꞌbꞌal, chi ẍaꞌ yabꞌ cuybꞌanile, jal mactxequel asan cꞌal comon kꞌane chi yal xin, oj lawoj xacꞌal eyoj.

9 Jaꞌ mactxequel watxꞌ sbꞌeybꞌal, cꞌam cꞌal bꞌey chi xiwi; jal pax mactxequel pena chi yute sbꞌa xin, oj tit syaꞌilal yibꞌan.

10 Jaꞌ mactxequel tol chi mutzꞌmon sat yin snaꞌon spenail, caw chi tit mimej syaꞌilal yibꞌan; yetoj cꞌal mactxequel asan comon kꞌane chi yalaꞌ, oj qꞌueyle el ebꞌ.

11 Jaꞌ skꞌane junoj watxꞌ snaꞌbꞌal, jaꞌ chi akꞌon swatxꞌilal xol ánima, jal pax skꞌane junoj penawom xin, jaꞌ yu spenail ebꞌ tuꞌ, yuxan oj qꞌueyle can el ebꞌ yin junelne.

12 Jaꞌ mactxequel ey ẍichoncꞌulal, chi sey tzet chi yun ya jowal, jal mactxequel ey scamcꞌulal xin, ey cꞌal smimancꞌulal.

13 Jaꞌ ebꞌ ey snaꞌbꞌal, chi seyle ecꞌ ebꞌ yu swatxꞌil snaꞌbꞌal tuꞌ, jal pax mac cꞌam snaꞌbꞌal xin, chi makꞌle oc kꞌaaxteꞌ yin yichin ebꞌ.

14 Jaꞌ ebꞌ jelan, cꞌam chi smeyne sbꞌa ebꞌ yetoj sjelanil tuꞌ; jal mac cꞌam snaꞌbꞌal xin, eyxa smey wan kꞌane chi yal ebꞌ.

15 Jaꞌ bꞌeomal chi colon el ebꞌ bꞌeom; jaꞌ mebꞌail chi akꞌon lawoj ey ebꞌ mebꞌa.

16 Jaꞌ kꞌinale jaꞌ eyoc spajtzebꞌaloj tet junoj watxꞌ sbꞌeybꞌal, jal pax tzetyetal chi yiꞌ ebꞌ penawom, jaꞌton syaꞌilal cꞌal cuscꞌulal.

17 Jaꞌ mactxequel chi ẍaꞌ yabꞌ tenchebꞌal, jaꞌ jun tuꞌ lalan stoo yul sbꞌeal kꞌinale; jal pax mactxequel tol cꞌam chi ẍaꞌ yabꞌ xin, chi qꞌueyle can eloj.

18 Jaꞌ ebꞌ lekꞌtiꞌ, chi yewbꞌa el ẍichoncꞌulal ebꞌ; jaꞌ ebꞌ chi alwi kꞌumale, cꞌam snaꞌbꞌal ebꞌ.

19 Jaꞌ mactxequel miman skꞌane chi yalaꞌ, chi oc spenail xol skꞌane chi yalaꞌ; jal pax mactxequel cꞌam wal tzet chi yal xin, caw ey snaꞌbꞌal ebꞌ.

20 Jaꞌ skꞌane junoj watxꞌ snaꞌbꞌal, caw miman yeloc apnoj, laan jaxca chꞌen plata caw wal watxꞌ. Jal pax snaꞌbꞌal junoj penawom xin, cꞌam niꞌoj yeloc apnoj.

21 Jaꞌ yu skꞌane junoj watxꞌ snaꞌbꞌal caw ecꞌal mactxequel chi cuycha can el snaꞌbꞌal yu; jal pax mactxequel pena snaꞌbꞌal xin, chi cam ebꞌ yu spena snaꞌbꞌal tuꞌ.

22 Asanne yu swatxꞌcꞌulal Jehová, yuxan chi cu oc bꞌeomal, man yu oj tol caw chi ketne cu bꞌa yin mulnail.

23 Jaꞌ ebꞌ pena snaꞌbꞌal, caw chi tzala ebꞌ yet chi yunen spenail ebꞌ; jal pax mactxequel ey snaꞌbꞌal xin, chi yakꞌ tzalabꞌoj scꞌul yu sjelanil tuꞌ.

24 Jaꞌ ebꞌ pena sbꞌeybꞌal, jaꞌ bꞌey chi xiw ebꞌ, jaꞌ jun tuꞌ chi tit yibꞌan ebꞌ; jal pax mactxequel watxꞌ snaꞌbꞌal xin, chi cꞌal eloc tzet chi snaꞌ ebꞌ.

25 Jaꞌ yet chi ecꞌ sjowal junoj cajxuchum kaꞌeꞌ, tucꞌal chi qꞌueycan a ebꞌ penawom yu; jal pax ebꞌ watxꞌ snaꞌbꞌal xin, ey cꞌal ecꞌ ebꞌ.

26 Jaꞌ yet chi chejle junoj isa, pena chi yabꞌe, laan wal jaxca spail vinagre chi yabꞌe, ma jaxca yet chi too mucꞌ yul cu sat, yutol cꞌam chi yiꞌ sbꞌa jun chejbꞌanile tuꞌ yu.

27 Jaꞌ mactxequel tol ey yeloc apnoj Jehová yul sat, oj naatbꞌoj skꞌinal, jal pax ebꞌ penawom xin, chi kꞌuple el skꞌinal ebꞌ.

28 Jaꞌ tzet lalan stit sattaj mactxequel tol watxꞌ snaꞌbꞌal, jaꞌton tzalacꞌulal; jal pax ebꞌ penawom xin, cꞌam cꞌaltaꞌ bꞌakꞌin oj ẍaꞌ swatxꞌilal ebꞌ, caxcꞌal mi chi yechbꞌane ebꞌ.

29 Jaꞌ Jehová chi teynen ebꞌ watxꞌ tzet chi el yuneni, jal pax mactxequel pena chi yute sbꞌa xin, chi qꞌueyle el ebꞌ yu Naj.

30 Jaꞌ mactxequel jichan snaꞌbꞌal, oj naatbꞌoj cꞌal skꞌinal; jal mactxequel pena chi yute sbꞌeybꞌal xin, man naatiloj eecꞌ ebꞌ sat txꞌotxꞌ tiꞌ.

31 Jaꞌ mac watxꞌ snaꞌbꞌal, jaꞌ jelanil chi yalaꞌ, jaꞌ mactxequel pena cꞌal skꞌanabꞌ xin, oj akꞌle tzꞌini eyoj.

32 Jaꞌ mactxequel watxꞌ snaꞌbꞌal, asanne watxꞌ kꞌane chi yalaꞌ; jal pax mactxequel pena snaꞌbꞌal xin, asan cꞌal pena kꞌane chi yalaꞌ.