2 Queyton tuꞌ oj yun snaꞌcha el ja wu, catuꞌ oj skeꞌ ja kꞌanabꞌ yetoj ja jelanil.

3 Jaꞌ junoj ix mulwom ix, watxꞌ xacꞌal skꞌanabꞌ ix, cꞌuununi xacꞌal yoc yul snukꞌ ix skꞌanabꞌi, yu jaach smonten yetoj skꞌane chi yalaꞌ.

4 Jaꞌ yin slawubꞌal xin, laan chi yun can a ix jaxca skꞌaꞌil junoj xaj teꞌ ambꞌal, ma jaxca chi yun cu lawi yu chꞌen espada caabꞌ yee.

5 Ta tol oj jaach ecꞌabꞌ yetoj jun ix tuꞌ, oj jaach yiꞌtoj ix bꞌey camich; jaꞌ jun bꞌe iꞌbꞌil oc yu ix, lalan stoo can bꞌey cambꞌal.

6 Jaꞌ ebꞌ ix ix queytuꞌ sbꞌeybꞌal, cꞌam yeloc apnoj sbꞌeal kꞌinale yul sat ebꞌ ix, cꞌam chi snaꞌ ta watxꞌ sbꞌeybꞌal ma pena.

7 Yu jun tuꞌ xin, jaach wuninal, abꞌ tzet oj walaꞌ. Cꞌam ojabꞌ cha wiꞌel ja naꞌbꞌal yin cuybꞌanile chi wakꞌ ey jaach tiꞌ.

8 Naat chach el scꞌatan ix ix pena snaꞌbꞌal tol ey yichamil, tam wal chach apni oc bꞌey stiꞌ spuertail sna ix.

9 Ta cꞌamaj, cꞌamxa bꞌey oj jaach bꞌina ecꞌ yetoj ja watxꞌ bꞌeybꞌal, yin eymanil oj jaach cam yul skꞌabꞌ junoj ebꞌ naj comon chi smakꞌ cam yet animail;

10 yet watxꞌ man txꞌoj oj mactxequel oj oc can bꞌeomal yu ja mulnail jix ja waꞌne yetoj ja wip.

11 Jaxa tala chi yunne, tuxa cꞌal oj jaach okꞌ can ecꞌoj, niẍtejal xacꞌal oj yun slawi ey ja mimanil.

12 Caxcꞌal mi oj ja wal jaxca tiꞌ: ¿Tzet wal yu, yuxan jix wintajne el tenchebꞌal? ¿Tzet wal yu, yuxan ma jin jije?

13 Ma yal jin cꞌul jix jin chaꞌ wabꞌ tzet jix yal ebꞌ jix jin cuyoni, ma waoc yin jin cꞌul tzet jix yal ebꞌ.

14 Caw niꞌanxane ma jin etex xacꞌal el sattaj masanil conobꞌ, ja chi xacꞌal mi.

15 Ucꞌ cꞌal jaꞌ jaꞌ bꞌey ja wucꞌbꞌal jaꞌ, jaꞌ tol ja wet cꞌaltaꞌ yeocoj, yet watxꞌ chi ecꞌ ja tajin tiꞌal. (Chi yal yeloc apnoj, tol asanne ojabꞌ yin ix ja wistil bꞌey eyoc ja naꞌbꞌal.)

16 ¿Cꞌam ojabꞌ ja wuninal chi ali yetoj ebꞌ ix ix chi ecꞌ yul-laj calle?

17 Jaꞌ ebꞌ ja wuninal yetoj ix ja wistil, ja wet ojabꞌ ebꞌ ja txꞌojli yetoj ix, cꞌam ojabꞌ junojxa comon winaj ey yet ja wetoj.

18 Al-le ojabꞌ watxꞌ kꞌane yin ix ja wistil, akꞌ tzalabꞌoj ja cꞌul yetoj ja wistil, ey ojabꞌ ja wuninal yetoj ix ja wistil tol jix jaach nupi yetoj yin ja wachꞌeal.

19 Watxꞌ ojabꞌ cꞌal yili ix yul ja sat, jaxca ojabꞌ wal yili junoj noꞌ scꞌultajil che; cꞌam ojabꞌ bꞌakꞌin chi lawi a ja tzalacꞌulal yin ix, ey ojabꞌ cꞌal ja tzalacꞌulal yu scamcꞌulal ix ja win.

20 Jaach jin cꞌaal, cꞌam ojabꞌ cha wakꞌ somcha el ja naꞌbꞌal yu junoj ix ix ey yichamil. ¿Tzet yu, yuxan oj ja waoc ja bꞌa yul skꞌabꞌ junoj ix ey yichamil?

21 Yutol jaꞌ Jehová tꞌanan oc yin cu bꞌeybꞌal junjun jon, chi yil Naj tzet chi el cu bꞌeybꞌalneni.

22 Jaꞌ ebꞌ penawom, jacꞌal oc spenail ebꞌ tuꞌ oj akꞌon eyqꞌueyoj; jacꞌal oc spenail ebꞌ tuꞌ chi kꞌalon ey ebꞌ jaxca junoj tzetyetal chi kꞌal-le ey yu lasu.

23 Yutol ma steyne sbꞌa ebꞌ, yuxan oj tojcan ebꞌ bꞌey camich; yu cꞌam snaꞌbꞌal ebꞌ tuꞌ, yuxan oj qꞌueyle can el ebꞌ.