2 Jaꞌ cuybꞌanile watxꞌ chi wakꞌ ey jex, yuxan caw che yaꞌilne masanil tiempo.

3 Jaꞌ yet achꞌe unin jin to, yet ey jin to ecꞌ yul sna jin mam, caw chin camcꞌulnele yu jin txutx.

4 Caw jix jin cuyle yu jin mam jix yalon ey jin jaxca tiꞌ: Cꞌubꞌa wan kꞌane tiꞌ yin ja naꞌbꞌal; jije tzet chi wal ey jaach, yet watxꞌ ey cꞌal ja cawil.

5 Yelcꞌulal ojabꞌ cha wakꞌ ja wip yin ja jelanil, cꞌal ja naꞌbꞌal, cꞌam ojabꞌ chi too qꞌueycꞌulal wan jin kꞌane tiꞌ ja wu.

6 Caw cha camcꞌulne ja jelanil, cꞌam ojabꞌ cha wintajne eloj, yutol jaꞌ wan tuꞌ oj jaach colon eloj.

7 Akꞌ ja wip ja seyon ecꞌ ja jelanil, yutol yel xacꞌal miman yeloc apnoj. Caxcꞌal yaꞌtaj chi yun yilcha oc ja wu, yel xacꞌal watxꞌ tol jelan cha wute ja naꞌbꞌal.

8 Camcꞌulne ja jelanil, yet watxꞌ oj jaach iꞌle a can yu. Kꞌanbꞌalne ja jelanil tuꞌ, yet watxꞌ miman ja weloc apnoj yul sat ebꞌ ja wet animail.

9 Jaꞌ yu ja jelanilal tuꞌ, yuxan watxꞌ oj jaach elocoj, jaxca tol oj ale oc junoj corona yin ja jolom.

10 Jaach wuninal, chaꞌ ja wabꞌ wan jin kꞌane tiꞌ, yet watxꞌ oj naatbꞌoj ja kꞌinal.

11 Jain oj jaach wiꞌ bꞌey yin sbꞌeybꞌal ebꞌ jelan, jaꞌ yin watxꞌ bꞌeybꞌale oj jaach waocoj.

12 Jaꞌ yul jun bꞌe tuꞌ, cꞌam tzet oj jaach tenon oc tucanoj; caxcꞌal oj ja wakꞌ ani cꞌam bꞌey oj jaach telcꞌotoj.

13 Aoc ja naꞌbꞌal yin cuybꞌanile tiꞌ, cꞌam ojabꞌ cha wintajne eloj; yelcꞌulal tol cha bꞌeybꞌalne, yuxan ey cꞌal ja cawil.

14 Cꞌam ojabꞌ chach too yin sbꞌeybꞌal ebꞌ penawom, cꞌam ojabꞌ cha bꞌeybꞌalne pena bꞌeybꞌale.

15 Cꞌam ojabꞌ chach oc xol ebꞌ, akꞌ cꞌal ja wip ja too ja sattaj.

16 Jaꞌ ebꞌ penawom tuꞌ, cꞌam chi oc sweyan ebꞌ ta tol cꞌam chi yun spenail ebꞌ. Cꞌam chi tit sweyan ebꞌ, ta tol cꞌam chi yetne junoj mactxequel ebꞌ.

17 Asanne cꞌal spenail, cꞌal etne ánima chi yoche oc ebꞌ, jaxca xacꞌal tol sloꞌbꞌe ebꞌ cꞌal tzet chi yucꞌ ebꞌ yeocoj.

18 Jaꞌ ebꞌ watxꞌ sbꞌeybꞌal cꞌal ebꞌ watxꞌ snaꞌbꞌal, laan ebꞌ jaxca yet chi sajbꞌi eloj, masantaꞌcꞌal yet chi aol yajan cꞌu.

19 Jal pax sbꞌeybꞌal ebꞌ penawom xin, laan jaxca kꞌejkꞌinal yeocoj; man yotaj oj ebꞌ bꞌey chi telcꞌotoj.

20 Jaach wuninal, chaꞌ ja wabꞌ jin kꞌane, aoc ja naꞌbꞌal yin sicꞌlebꞌil.

21 Cꞌam ojabꞌ cha wiꞌel ja sat yin, tol ojabꞌ cha cꞌubꞌa yin ja naꞌbꞌal.

22 Yutol jaꞌ wan cuybꞌanile tiꞌ chi akꞌon cawile tet masanil mactxequel chi ilcha oc yu.

23 Caw cha teyne ja naꞌbꞌal yin masanil tzetyetal ey bꞌey yul yibꞌankꞌinal tiꞌ, yutol jaꞌ ja naꞌbꞌal tuꞌ oj jaach ijbꞌan yin tzet oj yun ja bꞌeytoj.

24 Cꞌam ojabꞌ cha naꞌa kꞌane yin ja wet animail, bꞌejcan masanil lekꞌtiꞌal.

25 Yelcꞌulal cha bꞌeybꞌalne swatxꞌilal, cꞌam ojabꞌ chach too tꞌanan yin spenail.

26 Chi cam ja naꞌon tzet cha bꞌeybꞌalne, man comonoj chach too xol spenail.

27 Cꞌam ojabꞌ chach elcan yul sbꞌeal sjichanil, cꞌam ojabꞌ chach too yin bꞌeybꞌale man watxꞌoj.