Ey Smey Kaon Oc Cu Bꞌa Yin Fiadoral
6
Jaach jin cꞌaal, ta tol cha waoc ja bꞌa yin maan tuminalsqꞌuexeloj junoj ja watxꞌil ánima yul ja conobꞌ,
2 jaach cꞌal oc cha waꞌne ey ja yaal, oj tit ja wibꞌan yu bꞌey cha wakꞌcan ja tiꞌ tuꞌ.
3 Jaach jin cꞌaal, ta ey bꞌey queytuꞌ cha wute ja bꞌa, sowalil cha colel ja bꞌa yul skꞌabꞌ naj ey stumin tuꞌ. Asiꞌ, catuꞌ chi too ja wiꞌon ey ja bꞌa tet jun ánima tuꞌ, catuꞌ cha wakꞌon sowalil yakꞌon pax chꞌen smaan tumin jun bꞌey ey jaach oc yin fiadoral tuꞌ.
4 Cꞌam ojabꞌ chach wey syaꞌiloj, cꞌam ojabꞌ chach xew junoj txolan,
5 masantaꞌcꞌal chach el yalan bꞌey ey jaach oc yin fiadoral tuꞌ, jaxca chi yun scolon sbꞌa junoj noꞌ scꞌultajil che tet mac chi ujten ecꞌoj; queytuꞌ oj yun ja colcha can eloj, ma jaxca chi yun scolcha junoj noꞌ tzꞌiquin tet junoj yaal.
Tenchebꞌal Tet Ebꞌ Isa
6 Jex ánima isa, jex tol cꞌam chi yoche je cꞌul chex mulnai, asiꞌ ocanwej tꞌanan yin noꞌ sanic tinaniꞌ, chi cam je yoc tꞌanan yin noꞌ tzet chi yute mulna sbꞌa noꞌ, chi cam je cuywi yintaj noꞌ.
7 Caxcꞌal cꞌam mactxequel chi ijbꞌan noꞌ, tam wal ey mac chi alon tet noꞌ tzet mulnail chi yunne,
8 masanil noꞌ chi syambꞌa can oc sloꞌbꞌe yet stiempoal, jaꞌ yet tuꞌ chi syambꞌa can oc sloꞌbꞌe noꞌ.
9 Jex isa, kꞌojbꞌil xacꞌal je weyi, kꞌojbꞌil xacꞌal je yey telanoj.
10 Yajbꞌan chi tit numomoj je weyan, cꞌal swacxi a je jolom yu weyan, cꞌal je jeltzomnen oc je kꞌabꞌ xaam je cꞌul, caxcꞌal mi watxꞌ xacꞌal chi yun je weyi,
11 jaxa oj yunne, oj jul mebꞌail je yibꞌan, oj oc mebꞌail je yin jaxca chi yun yoc junoj elkꞌom iꞌbꞌil oc smitxꞌkꞌabꞌ yet jowal.
Jaꞌ Sbꞌeybꞌal Ebꞌ Penawom
12 Jaꞌ mactxequel tol pena snaꞌbꞌal asan cꞌal lekꞌtiꞌal chi ecꞌ yal xol-laj ánima;
13 chi smutzꞌ sat, chi yakꞌon yechel yetoj yajan, catuꞌ chi xꞌoxon yetoj yiximal skꞌabꞌ.
14 Junelne tol caw pena snaꞌbꞌal, asan cꞌal spenail chi snaꞌoꞌtane yuneni; jaꞌ bꞌey chi eqꞌui, asan jowal chi a yu.
15 Yu jun tuꞌ, yin eymanil oj jul syaꞌilal yibꞌan; yin junne mutzꞌsatil oj yun slawoj eyoj, cꞌamxa tzet watxꞌ oj yunne.
Wan Bꞌeybꞌale Tol Cꞌam Chi Yoche Jehová
16 Ey wajebꞌ tujan tzetyetal cꞌam chi yoche Jehová yin junelne, ey junxa yet sjuj, junelne tol cꞌam chi yoche:
17 Jaꞌton meynebꞌail, lekꞌtiꞌal, ebꞌ comon cꞌal chi smakꞌ cam yet animail tol man yu oj spenail,
18 naꞌo a kꞌane tzetyetal man watxꞌoj, comon cꞌal chi too yin spenail,
19 akꞌo lekꞌtiꞌal testigoal, ebꞌ comon cꞌal chi xꞌema jowal xol ebꞌ yuẍtaj.
Jaꞌ Tzet Chi Tit Can Yibꞌan Junoj Chi Too Yin Amulal
20 Jaach jin cꞌaal, cꞌubꞌa wan jin chejbꞌanil tiꞌ yin ja naꞌbꞌal, cꞌal cuybꞌanile chi yakꞌ naj ja mam cꞌal ix ja txutx ey jaach.
21 Cꞌubꞌa cꞌal oc yin ja naꞌbꞌal jaxca ojabꞌ tol txuan oc yin ja nukꞌ, cꞌam ojabꞌ chi too qꞌueycꞌulal ja wu.
22 Jaꞌ oj jaach ijbꞌan bꞌey oj jaach ecꞌoj, man oj jaach xiw yet chach weyi. Jaꞌ yet oj el ja weyan, naꞌan ojabꞌ cꞌal wan tiꞌ ja wu.
23 Yutol jaꞌ chejbꞌanile cꞌal cuybꞌanile tiꞌ, laan jaxca junoj tzejtebꞌal yeoc ey jaach. Jaꞌ tenchebꞌal, cꞌal naꞌbꞌale, jaꞌ chach ijbꞌan yul sbꞌeal kꞌinale.
24 Jaꞌ oj jaach colon el yul skꞌabꞌ ix ix pena snaꞌbꞌal, cꞌal tet ix mulwom ix tol comon xacꞌal chi kꞌanabꞌi.
25 Cꞌam ojabꞌ cha woche oc swatxꞌil yili oc ix; cꞌam ojabꞌ chi somcha a ja naꞌbꞌal yu tzet chach yute yilon ocoj.
26 Jaꞌ mac chi mulwi yetoj junoj ix amul ix, chi oc xacꞌal mebꞌail yin. Yetoj cꞌal pax mac chi mulwi yetoj junoj ix ey yichamil, chi skeꞌ chi cam xacꞌal yu spenail tuꞌ.
27 ¿Tumi taꞌ ey junoj mactxequel chi yiꞌtoj stzakꞌakꞌ xaamscꞌul, catuꞌ cꞌam chi tzꞌaꞌtoj spichil yu?
28 Yuxan jaꞌ mactxequel chi bꞌey yibꞌan stzakꞌakꞌ, chi tzꞌaꞌtoj yajan yu.
29 Yuxan jaꞌ mactxequel chi mulwi yetoj junoj ix ix ey yichamil, caw yel chi jul syaꞌtajilal yibꞌan.
30 Ta ey junoj mac chi elkꞌanwi, eyto mimancꞌulal yin, ta tol yu wail yuxan chi elkꞌanwi.
31 Caxcꞌal mi jaxca tuꞌ, ta chi michꞌchai, sowalil jujebꞌ tujan chi yun stoolanen tzet chi yelkꞌane tuꞌ, caxcꞌal mi cꞌamxa stzetyetal chi cancan bꞌey sna.
32 Jaꞌ junoj mactxequel chi mulwi yetoj junoj ix amul ix, yel xacꞌal cꞌam snaꞌbꞌal. Jaꞌ mactxequel chi yun jaxca tuꞌ, jacꞌal oc chi yiꞌtej syaꞌilal yibꞌan.
33 Catuꞌ oj ẍaꞌon syaꞌtajilal, cꞌal smakꞌlei; jaꞌ junoj mactxequel queytuꞌ chi yute sbꞌa, cꞌam bꞌakꞌin chi too qꞌueycꞌulal yu ebꞌ ánima yu jun qꞌuixwanil chi yun tuꞌ.
34 Jaꞌ naj winaj jix etnele yistil tuꞌ, caw wal jow naj jaxca xaj kꞌakꞌ, cꞌamxa chi yakꞌ mimancꞌulal yet chi apni oc stiempoal yaon ecꞌ spaj.
35 Cꞌam chi ẍaꞌ saꞌbꞌeal naj chi etnele yistil tuꞌ, tam wal chi sicbꞌi sjowal scꞌul yu mimanoj saꞌbꞌeal chi akꞌle tet.