2 Je masanil jex ángel cꞌal jex soldado ey bꞌey satcan, alwej watxꞌ kꞌane tet Naj.

3 Iꞌle ojabꞌ a can sbꞌi Jehová yu cꞌu, cꞌal yu xꞌaaw. Iꞌle ojabꞌ cꞌal a can sbꞌi Naj yu masanil weycan.

4 Iꞌle ojabꞌ a can sbꞌi Jehová yu satcan naat eyatoj, yetoj cꞌal pax yu jaꞌ jaꞌ eyatoj yibꞌan satcan.

5 ¡Al-le ojabꞌ watxꞌ kꞌane tet Jehová, yutol jaꞌ Naj jix aloni, catuꞌ jix waꞌxi masanil!

6 Jaꞌ Naj jix waꞌnen can oc masanil wan tuꞌ bꞌey eyecꞌoj, yet watxꞌ ey cꞌal ecꞌoj, catuꞌ jix yalon can Naj tol cꞌam bꞌakꞌin chi qꞌuexlei.

7 Yetoj masanil tzet ey sat txꞌotxꞌ tiꞌ, yal ojabꞌ watxꞌ kꞌane tet Jehová, noꞌ mimej noꞌ ey yul-laj jaꞌ mar, cꞌal noꞌ naat eeytoj yich jaꞌ,

8 yetoj letzꞌlom, sajbꞌat, sajbꞌacom, kꞌejin asun, cajxuchum, tol jijem ojabꞌ chi yute sbꞌa masanil,

9 yetoj txꞌotxꞌ mimej wonan, txꞌotxꞌ tzalquiltaj, cꞌal teꞌ teꞌ chi yakꞌ sat, cꞌal teꞌ kꞌuteꞌ,

10 yetoj noꞌ xol-laj teꞌal noꞌ, noꞌ jobꞌbꞌeal noꞌ, noꞌ chi sjutx sbꞌa sat txꞌotxꞌ, noꞌ tzꞌiquin, masanil wan tuꞌ, yal ojabꞌ watxꞌ kꞌane tet Jehová.

11 Jex sreyal yul yibꞌankꞌinal tiꞌ, cꞌal jex conobꞌlaj, cꞌal je masanil jex yaaw, jex juez yul junjun conobꞌ, alwej je watxꞌ kꞌane tet Jehová,

12 jex winaj, cꞌal jex ix, jex icham ánima, cꞌal jex unin.

13 Alwej watxꞌ kꞌane tet Jehová je masanil, yutol asanne Naj yel xacꞌal mimanbꞌil. Jaꞌ yopiso eyatoj masantaꞌcꞌal yibꞌantoj satcan, cꞌal sat txꞌotxꞌ txꞌotxꞌ tiꞌ.

14 Jaꞌ Naj jix akꞌon jun cu reyal tol miman yeoc yipalil.

¡Yuxan smoo chi kalwej cu watxꞌ kꞌane tet Naj jaon Israel jon tiꞌ, yutol sconobꞌ jon, jix cu yiꞌoc scawilal!

¡Al-le ojabꞌ watxꞌ kꞌane tet Jehová!