2 Jaꞌ jix waꞌnen pax a Jerusalén junelxa, yet watxꞌ chi yamcha oc ebꞌ ket Israelal sajleminaj ye cantoj.

3 Jaꞌ Dios chi akꞌon smimanil scꞌul ebꞌ jaxca tol yasinajtoj spixan, jaꞌ Naj chi mimancꞌulnen ebꞌ eyoc xol syaꞌtajilal.

4 Jaꞌ Naj chi bꞌison jantaj weycan bꞌey satcan, catuꞌ chi yaon oc sbꞌi junjun.

5 Yel xacꞌal ton miman yeloc apnoj sbꞌi Naj cu Diosal, caw miman yipal catuꞌ cꞌam slawubꞌal sjelanil.

6 Jaꞌ Naj chi iꞌon a waan ebꞌ yeynajil ánima, jal pax ebꞌ chi unen spenail xin, chi intajnele can el ebꞌ yu.

7 Bꞌitnojonwej tet Jehová yin kalon yu diosalil tet, cu bꞌitnewej sbꞌi cu Diosal yetoj arpa.

8 Jaꞌ Naj chi akꞌon noel satcan yu asun, catuꞌ chi yakꞌon nabꞌ yibꞌan txꞌotxꞌ txꞌotxꞌ tiꞌ. Jaꞌ Naj chi akꞌon chꞌibꞌ an cꞌultaj bꞌey txꞌotxꞌ tzalquiltaj.

9 Jaꞌ Naj chi akꞌon low noꞌ noꞌ, cꞌal noꞌ yuneꞌ joo yet chi el yaw noꞌ yu wail.

10 Jaꞌ Jehová, cꞌam chi tzala yetoj yipal noꞌ che, tam wal yu yipal junoj ánima;

11 asanne yetoj ebꞌ tol miman yeloc apnoj Naj yul sat ebꞌ, jaꞌton ebꞌ chi yaoc scamcꞌulal Dios yipoj scꞌul, caw chi tzala Naj yetoj ebꞌ tuꞌ.

12 Jex a Jerusalén, kalwej watxꞌ kꞌane tet Jehová, jex a Sión bꞌitnewej sbꞌi cu Diosal.

13 Jaꞌ Naj chi aon oc yip yul spuertail cu conobꞌ, catuꞌ chi yakꞌon syaaxilal yibꞌan ebꞌ kuninal bꞌey yul cu conobꞌ tiꞌ.

14 Yu Naj, yuxan cꞌamxa jowal yul cu conobꞌ, catuꞌ chi yakꞌon no cu cꞌul yu ixim tiriw caw watxꞌ.

15 Jaꞌ Dios chi aontej skꞌane bꞌey sat txꞌotxꞌ txꞌotxꞌ tiꞌ, yuxan yin eymanil chi yun sbꞌey stoo skꞌane bꞌey yul yibꞌankꞌinal tiꞌ.

16 Yu yipal Dios, yuxan chi majcha el sat txꞌotxꞌ txꞌotxꞌ tiꞌ yu chꞌen sajbꞌacom, jaxca wal yili noꞌ sajin lana, catuꞌ chi sajlemnen cantoj chꞌen cheew, jaxca chꞌen stikꞌakꞌil taan.

17 Jaꞌ Dios chi aontej chꞌen sajbꞌat jaxca chꞌen kꞌachꞌen, jaꞌ siical chꞌen, cꞌam mac chi techa yu.

18 Jaꞌ Naj chi aloni, catuꞌ chi uli pax toj chꞌen cheew. Chi jul kaꞌeꞌ catuꞌ chi bꞌeytoj jaꞌ jaꞌ tuꞌ.

19 Jaꞌ Dios chi akꞌon kotajne el skꞌane, cꞌal sley jaon Israel jon tiꞌ, yicꞌaal jon Jacob.

20 Jal wanxa conobꞌ xin, man quey oj tuꞌ jix yute Naj; cꞌam cꞌal bꞌey jix otajnele el skꞌane Naj yu ebꞌ.

¡Al-le ojabꞌ watxꞌ kꞌane tet Jehová!