2 Jex wet Israelal, tzalajonwej yin Jehová, yutol jaꞌ Naj jix waꞌnen cu conobꞌwej tiꞌ. Jex a conobꞌ Sión, tzalaanwej yetoj Naj cu Reyal.

3 Tol ojabꞌ chi cu awej tꞌujna sattaj Jehová yet chi kalonwej cu watxꞌ kꞌane tet, cꞌal koc yin eyilal tet. Bꞌitnojonwej tet yetoj arpa cꞌal yetoj chꞌen pandereta.

4 Yutol jaꞌ Jehová chi yiꞌ stzalacꞌulal kin, jaon sconobꞌ jon xa tiꞌ. Oj yakꞌ cu tzalacꞌulal jaon yeynajil jon tiꞌ, yutol oj yakꞌ cu colbꞌanil.

5 Tzalajonwej jaon sconobꞌ jon xa Naj tiꞌ, yutol jix kꞌakꞌ eyqꞌuey jowal yetoj scolwal Dios; tol ojabꞌ chi cu bꞌitni yu tzalacꞌulal yet chi cu weycan aoj.

6 El ojabꞌ kaw cu bꞌitni tet Dios; yutol iꞌbꞌil a jun chꞌen espada caabꞌ yee yul cu kꞌabꞌ,

7 yet chi kaon ecꞌ spaj tet ebꞌ txꞌoj conobꞌal, catuꞌ chi kaon oc syaꞌilal yibꞌan wanxa nacionlaj,

8 yet chi cu kꞌalon oc chꞌen mimej cadena yin ebꞌ sreyal wan conobꞌ tuꞌ, cꞌal yin ebꞌ ánima ey yopiso xol ebꞌ;

9 yet chi oc can syaꞌilal yibꞌan ebꞌ, yutol queytuꞌ ye stzꞌibꞌelecan yibꞌan ebꞌ. Jaꞌ jun miman opiso tiꞌ, jix yakꞌ Dios tet masanil ebꞌ sconobꞌ tol jijem chi yute sbꞌa tet.

¡Al-le ojabꞌ watxꞌ kꞌane tet Jehová!