2 Junjun cꞌal cꞌu oj wal watxꞌ kꞌane ey jaach, catuꞌ oj wiꞌon a can ja bꞌi.

3 Jaach jin Diosal, miman ton ja weloc apnoj, smoo ton yal-le watxꞌ kꞌane ey jaach. Jaꞌ ja mimanbꞌilal caw miman yeocoj, cꞌamxa chi naꞌcha el ku jantaj yeocoj.

4 Junjun ebꞌ mame, oj yal skꞌaneal ebꞌ tet yuninal yu jantaj tzet tol qꞌueyubꞌtaj tzet cha wunne; jaxa ebꞌ uninale oj yal ebꞌ tet yitxiquin yet bꞌakꞌin.

5 Oj yal skꞌaneal ja tzejejial ebꞌ tol caw miman yeocoj; jal jin jain tiꞌ xin, oj jin naoꞌtane masanil tzet qꞌueyubꞌtaj yili ocoj.

6 Oj al-le el skꞌaneal tzet qꞌueyubꞌtaj jix ja waꞌne, yutol caw ey smey yili ocoj. Jal jin jain tiꞌ oj walel ja kꞌaneal, yutol caw miman ja weloc apnoj.

7 Oj al-le el skꞌaneal ja watxꞌcꞌulal tol yel xacꞌal miman yeocoj, yin ipeal oj yun yal-le eloj tol watxꞌ jaach toni.

8 Jaach jin Diosal, watxꞌ ton ja naꞌbꞌal, caw chi okꞌ ja cꞌul kin. Man comonoj chi tit ja jowal, yutol ey ja camcꞌulal.

9 Jaach jin Diosal, yel xacꞌal watxꞌ jaach yibꞌan masanil, caw ey ja camcꞌulal yin masanil tzet jix ja waꞌne.

10 Jaach jin Diosal, masanil tzet waꞌnebꞌil ja wu, yal ojabꞌ watxꞌ kꞌane ey jaach. Yal ojabꞌ yu diosalil ebꞌ conobꞌ ey jaach.

11 Yal ojabꞌ masanil ebꞌ ánima tol watxꞌ chi yun ja wakꞌon yaawil. Yal ojabꞌ watxꞌ kꞌane ebꞌ yin masanil tzet jix ja waꞌne, yet cha txꞌoxon el ja wipalil.

12 Abꞌle ojabꞌ yu masanil ánima yu jantaj tzet qꞌueyubꞌtaj jix ja waꞌne yetoj ja wipal, cꞌal ja mimanbꞌilal yin ja wopiso.

13 Jaꞌ ja wopiso tuꞌ, ey cꞌal ecꞌ yin tobꞌalkꞌinal, yutol Yaaw jaach. Chi yun cꞌal bꞌey jix ja wakꞌcan ja tiꞌ, ey cꞌal ja camcꞌulal yibꞌan masanil tzet jix ja waꞌne.

14 Jaach jin Diosal, jaach cha waoc yip ebꞌ tuxa chi eyqꞌueyi, catuꞌ cha ketzon a ebꞌ cꞌamxa yip.

15 Masanil ánima chi yechbꞌane ja colwal ebꞌ, yutol jaach cha wakꞌ sloꞌbꞌe ebꞌ yin stiempoal.

16 Bꞌejan cꞌal yel masanil tzetyetal tet ebꞌ ja wu, catuꞌ cha wakꞌon sloꞌbꞌe masanil tzetyetal iquis.

17 Jaach Jehová jin Diosal, caw watxꞌ ton ja naꞌbꞌal, ey ja camcꞌulal yin jantaj tzet jix ja wunne.

18 Bꞌejan ja cꞌul ja colwa tet ebꞌ chi yal sbꞌa ey jaach yin masanil scꞌul.

19 Jaꞌ ebꞌ jijem chi yute sbꞌa ey jaach, cha wakꞌ jantaj tzet chi yoche ebꞌ, Jaꞌ yet chi skꞌanon ja colwal ebꞌ, eyman chach colwa yetoj ebꞌ.

20 Jaach chach colwa yin ebꞌ ey scamcꞌulal ja win. Jal ebꞌ penawom xin, oj ja qꞌueycan el ebꞌ.

21 Jaach Jehová jin Diosal, oj wal jin watxꞌ kꞌane ey jaach. Jaꞌ masanil tzet jix ja waꞌne, smoo chi yal watxꞌ kꞌane ey jaach, tinaniꞌ cꞌal yin tobꞌalkꞌinal.