2 Jaxca tol jin nachꞌen yeoc Naj, jaxca tol jin cuartel yeocoj, yutol jin Colomal. Jaꞌ Naj chin cꞌubꞌani. Jaꞌ Naj eyoc weneloj. Jaꞌ Naj chi aon oc ebꞌ conobꞌlaj yalan wopiso.

3 Jaach jin Diosal, ¿tzet wal keloc apnoj jaon ánima jon tiꞌ yul ja sat, yuxan chon ja naꞌtej? ¿Tzet wal keloc apnoj jon, yuxan chon ja yaꞌilne?

4 Jaon ánima jon tiꞌ, laan jon jaxca yet chi kiꞌon juneloj cu kaꞌeꞌ; jaꞌ cu kꞌinal jon, laan jaxca chi yun yecꞌtoj yenel junoj tzetyetal.

5 Jaach Jehová jin Diosal, jaj spuertail satcan catuꞌ chach eyoloj; chach eyol sjolomlaj txꞌotxꞌ mimej wonan, catuꞌ chi a smucꞌal txꞌotxꞌ yetoj ja wipal.

6 Jultej ja julbꞌal, jaꞌton letzꞌlom, catuꞌ cha wujten el ebꞌ chi jowi oc ja win.

7 Jata cꞌal bꞌey satcan tuꞌ cha waeytej ja kꞌabꞌ, catuꞌ chin ja colon el tet jaꞌ miman mar, chi yal yeloc apnoj tol jaꞌton ebꞌ txꞌoj conobꞌal.

8 Col jin el tet ebꞌ lekꞌtiꞌ, ebꞌ chi yakꞌ stiꞌ yin tzetyetal man yeloj.

9 Jaach jin Diosal, oj jin bꞌitne jun acꞌ bꞌit ey jaach; jaꞌton jun bꞌit chin bꞌitne yetoj jin salterio ey jaach.

10 Jaach cha wakꞌ sjelanil ebꞌ rey, yuxan chi skeꞌ yakꞌon eyqꞌuey jowal ebꞌ, jaach ton jix jin ja colel yul skꞌabꞌ chꞌen espada chin makꞌon cam, jain David ja chejabꞌ jin tiꞌ.

11 Jaꞌ tinaniꞌ xin, col jin el tet yipalil ebꞌ txꞌoj conobꞌal, ebꞌ lekꞌtiꞌ chi yakꞌ stiꞌ yin tzetyetal man yeloj.

12 Chꞌibꞌ ojabꞌ ebꞌ kuninal jon, jaxca junoj awo tol yaꞌilbꞌil. Jaꞌ ebꞌ ix cu cutzꞌin jon, laan ojabꞌ ebꞌ ix jaxca junoj yoyal palacio tol watxꞌ yili.

13 Nonaj ojabꞌ el masanil scꞌunaꞌil cu loꞌbꞌe yu masanil tzetyetal. Yin ojabꞌxa smillonal chi yun sbꞌisil noꞌ cu jobꞌbꞌeal noꞌ jon, yin ojabꞌxa smilal chi yun sbꞌisil noꞌ bꞌey chi ecꞌ noꞌ lowoj.

14 Uneꞌwoj ojabꞌ noꞌ cu wacax jon; man ojabꞌ tucꞌal oj chi el yuneꞌ noꞌ. Cꞌam ojabꞌ mactxequel chi el yaw yul-laj scalleal cu conobꞌ tiꞌ yu syaꞌilal.

15 Yel xacꞌal watxꞌ yet junoj conobꞌ tol jaxca tuꞌ yeocoj. Yel xacꞌal watxꞌ yet junoj conobꞌ tol jaꞌ Jehová eyoc sDiosaloj.