2 Tzꞌajan cꞌal ja wotaj masanil tzet chi wunne; yin eyojto cꞌal ja wotajxa tzet chin naꞌ.

3 Ja wotajxa bꞌey chin ecꞌabꞌi, cꞌal bꞌey chin xewi; catuꞌ ja wotaj masanil tzet chi el wuneni.

4 Jaꞌ yet cꞌamto chin naꞌ junoj jin kꞌane chi walaꞌ, ja wotajxa tzet oj walaꞌ.

5 Joyan oc masanil ja wipal winlaj, ey cꞌal ecꞌ ja watxꞌ kꞌabꞌ wibꞌan.

6 Qꞌueyubꞌtaj xacꞌal yoc ja jelanil; caw cꞌam chi naꞌcha el wu; yutol miman ja weloc apnoj, caw chi qꞌueya jin cꞌul yu.

7 ¿Bꞌeytuꞌ oj skeꞌ webꞌan el jin bꞌa tet ja Wespíritu? ¿Bꞌeytuꞌ oj skeꞌ webꞌan el jin bꞌa ja sattaj?

8 Ta chin too satcan, ja tituꞌ ey jaach ecꞌoj; ta chin eycantoj yul-laj scꞌul txꞌotxꞌ txꞌotxꞌ, ey jaach cꞌal pax ecꞌ tituꞌ.

9 Ta chin too sattajto bꞌey chi aol cꞌu, ma chin too caey bꞌey skꞌaxepal jaꞌ mar bꞌey chi too cꞌu,

10 chi apni cꞌal oc ja watxꞌ kꞌabꞌ win tituꞌ. Chi woche chin ja quetz bꞌey yetoj ja watxꞌ kꞌabꞌ, yet chin ja wiꞌon bꞌeyoj.

11 Ta chin naꞌ tol jaꞌ bꞌey kꞌejkꞌinal chi webꞌa el jin bꞌa, caxcꞌal mi chi qꞌuexchatoj cꞌualil yin akꞌbꞌalil bꞌey ey jin ecꞌoj,

12 jaꞌ jun akꞌbꞌalil tuꞌ, ma skeꞌ jin scꞌubꞌan el ja sattaj; jaꞌ kꞌejkꞌinal laan yetoj sajkꞌinal yul ja sat. Cꞌam sqꞌuexanil akꞌbꞌalil yul ja sat, yutol sajkꞌinal cꞌal el masanil.

13 Jaach ton jix ja waꞌne masanil tzet ey yin jin mimanil. Jaach jix jin ja waꞌne yet ey jin oc yin jin txutx.

14 Caw qꞌueyubꞌtaj yili jantaj tzet jix ja waꞌne, yu jun tuꞌ, chi wal watxꞌ kꞌane ey jaach. Caw chi qꞌueya jin cꞌul wiloni, yuxan jaꞌ tinaniꞌ chi xa naꞌcha el jun tiꞌ wu sicꞌlebꞌil.

15 Jaꞌ yet jix chꞌibꞌoc jin mimanil yul scꞌul jin txutx, man ewan oj el yul ja sat, jaxca yet man to txequeloj weoc yin jin txutx.

16 Ja wotajxa yili jin mimanil yet cꞌamto chin ali. Ja wotaj masanil sbꞌisil scꞌual jin kꞌinal, tzꞌibꞌebꞌil yeoc yul an ja libro yet cꞌamto junoj cꞌual chi wilaꞌ.

17 Jaach jin Diosal, cꞌam chi naꞌcha el ja naꞌbꞌal wu; cꞌam slawubꞌal sbꞌisil ja jelanil.

18 Ta chin oc ian jin bꞌisoni, ecꞌbꞌan sbꞌisil yintaj chꞌen arena. Jaꞌ yet chi el jin weyan, tꞌanan jaach cꞌal oc win.

19 Jaach jin Diosal, iꞌcan el skꞌinal ebꞌ chi unen spenail, catuꞌ naat cha wiꞌ can el ebꞌ makꞌom cam ánima jin cꞌatan.

20 Yutol pena tzet chi yal ebꞌ chi jowi oc win, catuꞌ chi yalon pena kꞌane ebꞌ ja win.

21 Jaach Jehová jin Diosal, cꞌam chi woche ebꞌ cꞌam chach ocheni, catuꞌ cꞌam chi woche ebꞌ chi jowi oc ja win.

22 Cꞌam chi woche ebꞌ yin junelne, yutol chi jowi oc ebꞌ win.

23 Jaach jin Diosal, ocan tꞌanan yin jin pixan, il cꞌal pax oc jin naꞌbꞌal.

24 Tala cꞌuxan lalan jin to yin pena bꞌeybꞌale cha wilaꞌ, yuxan chi woche chin ja wijbꞌatoj yul sbꞌeal kꞌinale tol ey cꞌal ecꞌ yin tobꞌalkꞌinal.