Jaꞌ Scamcꞌulal Dios Ey Cꞌal Ecꞌoj
136
Al-le ojabꞌ watxꞌ kꞌane tet Jehová,yutol watxꞌ snaꞌbꞌal Naj kin, yutol ey cꞌal scamcꞌulal.
2 Al-le ojabꞌ watxꞌ kꞌane tet Jehová, jaꞌton jun Dios tol miman yeloc apnoj yibꞌan ebꞌ chi al-le oc diosal, yutol ey cꞌal scamcꞌulal Naj.
3 Al-le ojabꞌ watxꞌ kꞌane tet Jehová, jaꞌton Naj Yaaw miman yeloc apnoj yibꞌan ebꞌ yaaw, yutol ey cꞌal scamcꞌulal Naj.
4 Asanne Naj jix waꞌnen masanil tzetyetal tol qꞌueyubꞌtaj yili ocoj, yutol ey cꞌal scamcꞌulal Naj.
5 Jaꞌ Naj jix waꞌnen satcan yetoj sjelanil, yutol ey cꞌal scamcꞌulal Naj.
6 Jaꞌ Naj jix jenbꞌantoj txꞌotxꞌ txꞌotxꞌ tiꞌ yibꞌanlaj jaꞌ jaꞌ, yutol ey cꞌal scamcꞌulal Naj.
7 Jaꞌ Naj jix waꞌnen cꞌu cꞌal xꞌaaw, yutol ey cꞌal scamcꞌulal Naj.
8 Jix swaꞌne cꞌu yet chi tzejtanele yet cꞌualil, yutol ey cꞌal scamcꞌulal Naj.
9 Jix swaꞌne xꞌaaw cꞌal weycan, yet chi tzejtanele yet akꞌbꞌalil, yutol ey cꞌal scamcꞌulal Naj.
10 Jaꞌ Naj jix makꞌon cam sbꞌabꞌel unin junjun ebꞌ a Egipto, yutol ey cꞌal scamcꞌulal Naj.
11 Jaꞌ Naj jix iꞌon eltej ebꞌ Israel yul yet txꞌotxꞌ Egipto, yutol ey cꞌal scamcꞌulal Naj.
12 Jix iꞌle eltej ebꞌ yu yetoj yipalil, yutol ey cꞌal scamcꞌulal Naj.
13 Jaꞌ Naj jix poꞌon ey snan jaꞌ Cajin Mar, yutol ey cꞌal scamcꞌulal Naj.
14 Catuꞌ jix iꞌle ecꞌtoj ebꞌ Israel snan xol jaꞌ mar tuꞌ, yutol ey cꞌal scamcꞌulal Naj.
15 Jaꞌ Naj jix aon cantoj ebꞌ sreyal Egipto cꞌal ebꞌ soldado yul jaꞌ Cajin Mar, yutol ey cꞌal scamcꞌulal Naj.
16 Jaꞌ Naj jix iꞌon bꞌey ebꞌ sconobꞌ bꞌey txꞌotxꞌ cusiltaj txꞌotxꞌ, yutol ey cꞌal scamcꞌulal Naj.
17 Jaꞌ Naj jix akꞌon cam ebꞌ mimej rey, yutol ey cꞌal scamcꞌulal Naj.
18 Jaꞌ Naj jix iꞌon can el skꞌinal ebꞌ rey caw ey sjelanil yin yopiso, yutol ey cꞌal scamcꞌulal Naj.
19 Jaꞌ Naj jix makꞌon cam naj Sihón, sreyal ebꞌ Amorreo, yutol ey cꞌal scamcꞌulal Naj.
20 Jix makꞌle cꞌal pax cam naj Og, sreyal Basán, yutol ey cꞌal scamcꞌulal Naj.
21 Jix poꞌole ecꞌ txꞌotxꞌ xꞌotxꞌ ebꞌ rey tuꞌ yu, yutol ey cꞌal scamcꞌulal Naj.
22 Jaꞌ Naj jix akꞌon can jun txꞌotxꞌ tuꞌ ey jon jaon Israel jon tiꞌ, yutol ey cꞌal scamcꞌulal Naj.
23 Jix cu naꞌletej yu Naj yet ey jon oc xol syaꞌtajilal, yutol ey cꞌal scamcꞌulal Naj.
24 Catuꞌ jix cu col-le el yul skꞌabꞌ ebꞌ chi jowi oc kin, yutol ey cꞌal scamcꞌulal Naj.
25 Jaꞌ Naj chi akꞌon sloꞌbꞌe ebꞌ ánima cꞌal noꞌ noꞌ, yutol ey cꞌal scamcꞌulal Naj.
26 ¡Al-le ojabꞌ watxꞌ kꞌane tet Naj sDiosal satcan, yutol ey cꞌal scamcꞌulal Naj yin tobꞌalkꞌinal!