Jex ẍejabꞌ Jehová, alwej watxꞌ kꞌane tet Naj.

2 Mac jex ey jex ecꞌ bꞌey yamakꞌil snail Jehová cu Diosal,

3 alwej watxꞌ kꞌane tet, yutol watxꞌ ton Naj. Bꞌitnanwej tet yutol watxꞌ snaꞌbꞌal kin jaon ánima jon tiꞌ.

4 Jaꞌ jix cu sicꞌon el jaon conobꞌ Israel jon tiꞌ, yet chi cu oc sconobꞌoj.

5 Wotaj sicꞌlebꞌil tol jaꞌ Jehová cu Diosal, yel xacꞌal tol miman yopiso yintaj masanil tzet chi al-le oc diosal.

6 Chi yun cꞌal masanil tzet chi yoche scꞌul Dios. Chi yun bꞌey satcan cꞌal bꞌey sat txꞌotxꞌ tiꞌ; chi yun bꞌey jaꞌ mar masantaꞌcꞌal bꞌey yich jaꞌ.

7 Chi yiꞌtej asun bꞌey stiꞌlaj txꞌotxꞌ txꞌotxꞌ; chi yiꞌtej raya yet chi jul nabꞌ; chi sjajeltej kaꞌeꞌ bꞌey scꞌuanbꞌal.

8 Jaꞌ Naj jix makꞌon cam ebꞌ sbꞌabꞌel unin yet junjun nail ebꞌ a Egipto, cꞌal bꞌabꞌel yuneꞌ junjun sjobꞌbꞌeal noꞌ ebꞌ.

9 Jaꞌ bꞌey snan yul yet Egipto tuꞌ, jix yatej wan tzet tol caw qꞌueyubꞌtaj yili yin naj rey cꞌal yin ebꞌ chi akꞌon servil naj rey tuꞌ.

10 Ecꞌal mimej conobꞌlaj jix qꞌueyle el yu; jix akꞌle lawoj el ebꞌ rey tol mimej yopiso.

11 Jix makꞌle cam naj Sihón, sreyal ebꞌ Amorreo, cꞌal naj Og, sreyal Basán, cꞌal masanil ebꞌ rey yul yet Canaán.

12 Jaxa txꞌotxꞌ xꞌotxꞌ ebꞌ rey tuꞌ jix yakꞌ can ey jon, jaon conobꞌ Israel jon tiꞌ, yet chi cu majon can oc txꞌotxꞌ.

13 Jaach Jehová jin Diosal, cꞌam bꞌakꞌin oj lawoj sbꞌinale ja bꞌi. Tucꞌaltaꞌ oj jaach naꞌletej.

14 Jaach oj ja waꞌne yeoc jowal xol ebꞌ conobꞌ, oj okꞌ pax ja cꞌul yin ebꞌ ja chejabꞌ.

15 Jaꞌ sdiosal ebꞌ txꞌoj conobꞌal, ánima jix waꞌnen wan tuꞌ, bꞌonbꞌil yetoj chꞌen oro cꞌal yetoj plata.

16 Ey stiꞌ, cꞌam chi skeꞌ skꞌanabꞌi; ey sat, cꞌam pax chi skeꞌ yilwani.

17 Ey xiquin, cꞌam chi skeꞌ yabꞌeni, yutol cꞌam chi yiꞌ niꞌoj skaꞌeꞌ.

18 Jaxca yechel wan comon dios tuꞌ, queytuꞌ yeoc ebꞌ jix waꞌnen wan echele tuꞌ, cꞌal ebꞌ chi yaoc snaꞌbꞌal yin.

19 Jex wet Israelal, kalwej watxꞌ kꞌane tet Jehová. Jex yakꞌomal xaambꞌal, jaꞌton jex yicꞌaal Aarón, alwej watxꞌ kꞌane tet Jehová.

20 Jex yicꞌaal Leví, alwej watxꞌ kꞌane tet Jehová. Je masanil jex tol ey yeloc apnoj Jehová yul je sat, alwej watxꞌ kꞌane tet.

21 Jaꞌ bꞌey txꞌotxꞌ tzalan Sión, al-le ojabꞌ watxꞌ kꞌane tet Jehová, yutol caan ecꞌ Naj bꞌey Jerusalén.

¡Al-le ojabꞌ watxꞌ kꞌane tet Naj!