Jaꞌ Dios Scolomal Conobꞌ Israel
Bꞌit yet chi atoj ebꞌ Israel bꞌey Jerusalén.
124
Toloj taꞌ ma colwa Jehová ketoj.¿Tzet mi wal jix cu elocoj? Jex wet Israelal, kalwej jaxca tiꞌ:
2 Toloj taꞌ ma colwa Jehová ketoj yet jix tit ebꞌ ánima yakꞌon jowal kin,
3 xax mi cu tukꞌle eytoj yu ebꞌ yin kiquisal, yutol caw chi cajtza stit sjowal ebꞌ kin.
4-5 Jaxca xacꞌal mi tol chi cu ijle bꞌey yu jaꞌ elom jaꞌ, xax mi cu qꞌueyle el yu sjowal scꞌul ebꞌ, jaxca chi yun yecꞌtoj jaꞌ elom jaꞌ kibꞌan.
6 Kalwej watxꞌ kꞌane tet Jehová, yutol ma yal scꞌul jix cu yaoc yul skꞌabꞌ ebꞌ yet chi cu qꞌueyle el yu ebꞌ.
7 Tuxa jix cu colcha el yul skꞌabꞌ ebꞌ. Jaxca chi yun scolcha el junoj noꞌ tzꞌiquin chi scol sbꞌa yul skꞌabꞌ naj aom ey yaal; jix nicꞌchatoj jun yaal tuꞌ, catuꞌ jix cu colcha can eloj.
8 Jaꞌ cu colbꞌanil, jaꞌ yin Jehová chi tita, jaꞌton naj jix waꞌnen satcan, cꞌal txꞌotxꞌ txꞌotxꞌ tiꞌ.