ALEPHa
Alo watxꞌ kꞌane yin cuybꞌanile chi yakꞌ Dios.
119
Tzalacꞌulal yet ebꞌ cꞌam spenail chi ilcha oc yin,catuꞌ tzajan cꞌal oc ebꞌ yintaj cuybꞌanile chi yakꞌ Jehová.
2 Tzalacꞌulal yet ebꞌ chi jijen cuybꞌanile cꞌal tenchebꞌal chi yakꞌ Jehová, catuꞌ chi sjijen ebꞌ yin masanil scꞌul.
3 Jaꞌton ebꞌ cꞌam chi yun spenail, ebꞌ chi jijen cuybꞌanile chi yakꞌ Jehová.
4 Jaach jin Diosal, jaach jix ja walaꞌ tol sowalil chi jijele masanil ja chejbꞌanil.
5 Ey ojabꞌ cꞌal oc yin jin naꞌbꞌal jin jijen ja chejbꞌanil.
6 ¿Tzet yinal yuxan oj jin qꞌuixwoj, ta tol jain tiꞌ jijem jin tet masanil ja chejbꞌanil?
7 Oj wal watxꞌ kꞌane ey jaach yetoj jin watxꞌ naꞌbꞌal, yet chi cuycha ja ley wu, yutol jichan ton yeocoj.
8 Chi yoche jin cꞌul chin jije ja chejbꞌanil. Cꞌam ojabꞌ bꞌakꞌin chin ja bꞌejcanoj.
BꞌET
9 Jaꞌ ebꞌ naj achꞌe, ¿tzet wal oj yun sbꞌeytoj ebꞌ yin tol cꞌam spenail yin? Asanne yin sjijen ja kꞌane ebꞌ.
10 Jain tiꞌ, yin masanil jin cꞌul chach jin seyon ecꞌoj. Cꞌam ojabꞌ chi qꞌueytoj ja chejbꞌanil yin jin naꞌbꞌal.
11 Caw chi waoc yin jin cꞌul jin cuyon ja kꞌane, yet watxꞌ cꞌam chi oc jin penail ey jaach.
12 ¡Jaach jin Diosal! ¡Cuy jin cꞌal yin ja bꞌeybꞌal!
13 Oj wal can el masanil ja ley, jaꞌton wan albꞌilcan ja wu ey jin.
14 Caw tzalacꞌulal wet ta chin jije ja chejbꞌanil, ecꞌbꞌan swatxꞌil yintaj miman bꞌeomal.
15 Oj jin naoꞌtane ja chejbꞌanil jix ja wakꞌ ey jin, catuꞌ oj waon oc yin jin naꞌbꞌal jin bꞌeybꞌalneni.
16 Oj wakꞌ tzala jin cꞌul yin ja bꞌeybꞌal, catuꞌ man oj tojcan qꞌueycꞌulal ja kꞌane wu.
GUÍMEL
17 Akꞌ jin kꞌinal jain ja chejabꞌ jin tiꞌ, yet watxꞌ oj jin jije tzet chi yal ja kꞌane.
18 Jaj jin sat, yet watxꞌ chi naꞌcha el cuybꞌanil wu, jaꞌton wan tol qꞌueyubꞌtaj yoqui.
19 Ecꞌabꞌwom jin cꞌal bꞌey sat txꞌotxꞌ tiꞌ, cꞌam ojabꞌ cha cꞌubꞌa el ja chejbꞌanil ey jin.
20 Yin junjun txolan chi woche chi wotajne tzet chi yal ja kꞌane.
21 Cha tenchane ebꞌ ecꞌnaj chi yute sbꞌa, yetoj ebꞌ pena snaꞌbꞌal, jaꞌton ebꞌ chi yiꞌel snaꞌbꞌal yin ja chejbꞌanil.
22 Yu jun tuꞌ, chi waoc jin naꞌbꞌal yin ja chejbꞌanil, yuxan chi woche chin ja colel tet ebꞌ pena tzet chi snaꞌoc win cꞌal tet ebꞌ chin intajne can eloj.
23 Caxcꞌal mi chi snaꞌ ebꞌ yaaw tzet chi yun jin yetneni, jal jin jain ja chejabꞌ jin tiꞌ, jaꞌ ja ley chin naoꞌtane.
24 Chi wakꞌ tzala jin cꞌul yin ja chejbꞌanil, yutol chi yakꞌ jin naꞌbꞌal.
DÁLET
25 Tuxa chin cam chi wabꞌe; yuxan akꞌ cꞌal jin kꞌinal, jaxca cꞌaltaꞌ ja waloni.
26 Jix wal ey jaach tzet yili jin bꞌeybꞌal ja sattaj, jix ja wabꞌen tzet jix walaꞌ; cuy jin cꞌal yin ja bꞌeybꞌal.
27 Akꞌ naꞌcha el wu tzet chi yun jin jijen ja chejbꞌanil; chi yoche jin cꞌul chin naoꞌtane wan tzetyetal tol qꞌueyubꞌtaj yoqui.
28 Caw ey jin oc yin cuscꞌulal, akꞌ cꞌal stecꞌanil jin naꞌbꞌal jaxca yalon ja kꞌane.
29 Naat cha wiꞌel jin naꞌbꞌal yin lekꞌtiꞌal, catuꞌ cha wakꞌon ja watxꞌcꞌulal ey jin yet chin cuyon ja chejbꞌanil.
30 Jix jin seyecꞌ jun bꞌeybꞌale, catuꞌ chi woche tol chi wotajne el ja ley.
31 Jaach jin Diosal, ey cꞌal oc jin naꞌbꞌal yin ja chejbꞌanil, cꞌam ojabꞌ bꞌey chi wakꞌ jin qꞌuixwil.
32 Oj wakꞌ wip jin jijen ja chejbꞌanil, yutol cha wakꞌ jin tzalacꞌulal.
HE
33 Jaach jin Diosal, cuy jin yin ja bꞌeybꞌal, chi yoche jin cꞌul tol watxꞌ cꞌal jin bꞌeybꞌal masantaꞌcꞌal yet slawubꞌal.
34 Akꞌ jin naꞌbꞌal, yet watxꞌ chin bꞌeybꞌalne wan cuybꞌanile cha wakꞌa. ¡Yin masanil jin cꞌul chi woche tol jijem jin tet ja cuybꞌanil!
35 Quetz jin cꞌal bꞌey yul sbꞌeal ja chejbꞌanil, yutol jaꞌ yin chi wiꞌ jin tzalacꞌulal.
36 Akꞌ wotajne eloj, tol jaꞌ ojabꞌ ja chejbꞌanil chin jije, cꞌam ojabꞌ chi waoc jin naꞌbꞌal yin bꞌeomal.
37 Cꞌam ojabꞌ chin ja chaꞌtoj yintaj comon dios. Akꞌ cꞌal jin tzalacꞌulal yet watxꞌ chin bꞌeybꞌalne tzet cha woche.
38 Yun ojabꞌ bꞌey jix ja wakꞌcan ja tiꞌ win jain ja chejabꞌ jin tiꞌ, jaꞌton wan jix ja wal can tet ebꞌ jijem chi yute sbꞌa ey jaach.
39 Yutol watxꞌ ja ley yul jin sat, yuxan naat ojabꞌ cha wiꞌ can el snaꞌbꞌal ebꞌ chi alon junoj pena kꞌane win.
40 Caw chi woche masanil ja chejbꞌanil tiꞌ, akꞌ cꞌal jin kꞌinal yutol watxꞌ ton ja naꞌbꞌal.
VAW
41 Jaach Jehová jin Diosal, txꞌox ja camcꞌulal cꞌal ja colwal ey jin, jaxca ja waloni.
42 Queyton tuꞌ oj yun jin pajtzen tet ebꞌ chin txꞌemoni, yutol eyoc ja kꞌane yipoj jin cꞌul.
43 Ocan wetoj yin walon el ja kꞌane tol yel, yutol eyoc yin jin naꞌbꞌal jin jijen ja ley.
44 Chi woche chin jije tzet chi yal cuybꞌanile cha wakꞌa, cꞌam ojabꞌ chin bꞌejcanoj.
45 Queyton tuꞌ chi yun jin bꞌeytoj yin cꞌam tzet chin tenoni, yutol tzajan jin oc yintaj ja chejbꞌanil.
46 Jaꞌ sattaj ebꞌ rey oj wal tzetyetal cha walaꞌ, man oj jin qꞌuixwoj waloni.
47 Ey jin camcꞌulal yin ja chejbꞌanil, yutol jaꞌ yin chi wiꞌ jin tzalacꞌulal.
48 Jaꞌ ja chejbꞌanil chi woche chin camcꞌulne, oj jin naoꞌtane wan ja ley tiꞌ.
ZAÍN
49 Naꞌtej ja walbꞌen jix ja wal ey jin jain ja chejabꞌ jin tiꞌ. Jaꞌton ja kꞌane tuꞌ jix waoc yipoj jin cꞌul.
50 Jaꞌton ja kꞌane chi akꞌon jin kꞌinal, jaꞌ chi akꞌon smimanil jin cꞌul yet ey jin cuscꞌulal.
51 Jaꞌ ebꞌ ecꞌnaj chi yute sbꞌa, caw chi bꞌuchwa ebꞌ win; man yu oj tuꞌ, catuꞌ chi wiꞌon el jin naꞌbꞌal yin ja kꞌane.
52 Jaach jin Diosal, chin naꞌtej ja ley yet peyxa. Jaꞌ yu jun tuꞌ, yuxan chi wiꞌ smimanil jin cꞌul.
53 Jaꞌ ebꞌ ánima pena sbꞌeybꞌal, chi sbꞌejcan ja chejbꞌanil ebꞌ, yuxan chi tit jin jowal yin ebꞌ.
54 Jaꞌ ja chejbꞌanil chin bꞌitne skꞌaneal yin bꞌital bꞌey sat txꞌotxꞌ tiꞌ, yutol ecꞌabꞌwom jin cꞌal yul yibꞌankꞌinal tiꞌ.
55 Jaach Jehová jin Diosal, chach jin naꞌtej yet akꞌbꞌalil, chi yoche jin cꞌul tol chin bꞌeybꞌalne ja chejbꞌanil.
56 Chi jul jin tzalacꞌulal, yutol chin jije ja chejbꞌanil.
KET
57 Jaach jin Diosal, asanne jaach chach jin camcꞌulne yetoj masanil jin cꞌul. Tuxa jix walaꞌ tol chin jije tzet chi yal ja kꞌane.
58 Yin masanil jin cꞌul chi walon yu diosalil ey jaach, ey ojabꞌ ja camcꞌulal win jaxca jix yun ja walon canoj.
59 Jix jin naꞌ yin jin bꞌeybꞌal, yu jun tuꞌ, yuxan jix waoc yin jin cꞌul jin jijen ja chejbꞌanil.
60 Yin eymanil jix jin jije tzet chi yal ja chejbꞌanil.
61 Jaꞌ ebꞌ pena snaꞌbꞌal jix oc joyan ebꞌ win, yet chin yakꞌon eyqꞌuey ebꞌ yaloni, caxcꞌal mi jaxca tuꞌ chi snaꞌ ebꞌ, man oj toj qꞌueycꞌulal ja chejbꞌanil wu.
62 Jaꞌ yet chuman akꞌbꞌal chin a waanoj, yu walon yu diosalil ey jaach yu ja ley, yutol caw watxꞌ ton yaloni.
63 Jain tiꞌ, junne chi wute jin naꞌbꞌal yetoj ebꞌ chi oc yin eyilal ey jaach, cꞌal ebꞌ chi jijen ja chejbꞌanil.
64 Jaach jin Diosal, caw miman yeoc ja watxꞌcꞌulal bꞌey yul yibꞌankꞌinal tiꞌ, yu jun tuꞌ, cuy jin cꞌal yin ja bꞌeybꞌal.
TET
65 Jaach Jehová jin Diosal, watxꞌ ton ja naꞌbꞌal win jain ja chejabꞌ jin tiꞌ, jaxca yalon ja kꞌane.
66 Chi yoche jin cꞌul chin ja cuy yin jelanil, cꞌal wotajne el ja naꞌbꞌal, yutol chi waoc ja chejbꞌanil yipoj jin cꞌul.
67 Jaꞌ yet cꞌamto chi oc jin yaꞌilal, caw miman spenail jix el wuneni, jal tinaniꞌ xin, chin jije tzet chi yal ja kꞌane.
68 Jaach jin Diosal, caw watxꞌ ton ja naꞌbꞌal win, yutol watxꞌ cꞌal tzet chi el ja wuneni. Cuy jin cꞌal yin ja bꞌeybꞌal.
69 Jaꞌ ebꞌ ecꞌnaj chi yute sbꞌa, chi yal lekꞌtiꞌal kꞌane ebꞌ win; jal jin jain tiꞌ, chin jije ja chejbꞌanil yin masanil jin cꞌul.
70 Jaꞌ ebꞌ tuꞌ, jix etex el snaꞌbꞌal ebꞌ yu spenail, jal jin jain tiꞌ, chi wakꞌ tzala jin cꞌul yin cuybꞌanile cha wakꞌa.
71 Watxꞌ jix jin elocoj yet jix oc jin yaꞌilal, yutol jaꞌ yet tuꞌ, jix jin cuy ja chejbꞌanil.
72 Jaꞌ cuybꞌanile jix ja wakꞌ ey jin, yel xacꞌal watxꞌ yintaj chꞌen oro cꞌal chꞌen plata.
YOD
73 Jaach jin Diosal, jaach caw jix jin ja waꞌne. Akꞌ jin jelanil yet watxꞌ chi cuycha el ja chejbꞌanil wu.
74 Jaꞌ ebꞌ ey ja weloc apnoj yul sat, tzala ojabꞌ yet chin yilon ebꞌ, yutol jaꞌ ja kꞌane jix waoc yipoj jin cꞌul.
75 Jaach Jehová jin Diosal, wotaj tol jichan yeoc ja bꞌeybꞌal. Jaꞌ yet chin ja waon oc yin bꞌiscꞌulal, ey ton wal yu, yuxan queytuꞌ chin ja wute.
76 Jaꞌ ojabꞌ ja camcꞌulal chin mimancꞌulneni jaxca ja walon ey jin.
77 Txꞌox ja watxꞌcꞌulal ey jin, catuꞌ cha wakꞌon cꞌal jin cawil; yutol ey jin tzalacꞌulal yu ja chejbꞌanil.
78 El ojabꞌ sqꞌuixwil ebꞌ ecꞌnaj chi yute sbꞌa, yutol chi bꞌuchwa ebꞌ win, caxcꞌal mi tol cꞌam jin penail tet ebꞌ. Jal jin jain tiꞌ, chin naoꞌtane ja chejbꞌanil.
79 Jaꞌ ebꞌ ey ja weloc apnoj yul sat, syambꞌa ojabꞌ sbꞌa ebꞌ wetoj, jaꞌton ebꞌ otajnen ja chejbꞌanil.
80 Watxꞌ ojabꞌ yeoc jin naꞌbꞌal yin ja chejbꞌanil, yet watxꞌ cꞌam bꞌey oj jin qꞌuixwi aoj.
CAF
81 Caw chi ecꞌ yin jin naꞌbꞌal, bꞌakꞌin oj jin ja coloꞌ; yutol chi waoc ja kꞌane yipoj jin cꞌul.
82 Lalan yetex el jin sat yu jin majon yunen tzet jix ja wal canoj. Chin naꞌon jaxca tiꞌ: ¿Bꞌakꞌin wal oj jaach jul yu jin ja mimancꞌulneni? jin chi.
83 Caxcꞌal mi cꞌamxa wopiso yutol icham winaj jin xa, cꞌam cꞌal chi too qꞌueycꞌulal ja chejbꞌanil wu.
84 ¿Jantaj to wal tiempo oj wechbꞌane ja naꞌon oc yin ebꞌ chi jowi oc win?
85 Jaꞌ ebꞌ ecꞌnaj chi yute sbꞌa, ebꞌ cꞌam chi jijen tzet chi yal ja chejbꞌanil, jix swaꞌne jun jolan ebꞌ bꞌey oj jin mujle eytoj yalon ebꞌ.
86 Col jin el yul skꞌabꞌ ebꞌ naꞌbꞌal cꞌal chi chichon oc scꞌul ebꞌ win. Jal pax masanil ja chejbꞌanil, yel cꞌal chi yal masanil.
87 Tuxa chin cam yu ebꞌ, caxcꞌal mi jaxca tuꞌ weocoj, cꞌam cꞌal bꞌey chi too qꞌueycꞌulal ja chejbꞌanil wu.
88 Akꞌ cꞌal jin kꞌinal, jaxca taꞌ yeoc ja camcꞌulal, catuꞌ oj jin jijen tzetyetal cha walaꞌ.
LÁMED
89 Jaach Jehová jin Diosal, jaꞌ ja kꞌane cꞌam chi qꞌuexcha tzet chi yalaꞌ; ey cꞌal ecꞌ bꞌey satcan.
90 Jaꞌ ja camcꞌulal, ey cꞌal ecꞌoj. Jaach jix ja waꞌne oc yip sbꞌatxlubꞌal txꞌotxꞌ txꞌotxꞌ tiꞌ, yuxan cꞌam chi bꞌilwi bꞌey ey can eyoj.
91 Masanil tzetyetal jix ja waꞌne, watxꞌ yeoc jaxca jix yun ja walon canoj, catuꞌ lalan ja kꞌanbꞌalnen ebꞌ tinaniꞌ.
92 Ta jaꞌ ja chejbꞌanil tiꞌ cꞌam chi yakꞌ jin tzalacꞌulal, xax mi jin lawi el yu cuscꞌulal tinaniꞌ.
93 Yuxan cꞌam bꞌakꞌin chi too qꞌueycꞌulal ja chejbꞌanil tiꞌ wu. Jaꞌ yu ja kꞌane yuxan jix ja wakꞌ jin kꞌinal.
94 Col jin el xin, yutol ja wet jin cꞌaltaꞌa, tzajan jin yintaj ja chejbꞌanil.
95 Jaꞌ ebꞌ chi unen spenail, lalan yechbꞌanen ebꞌ tol oj qꞌueyle el ebꞌ, jal jin jain tiꞌ xin, jaꞌ tzet cha walaꞌ chin naoꞌtane.
96 Jix wilaꞌ tol cꞌam tzetyetal watxꞌ xacꞌal jaxca ja chejbꞌanil, yutol yel xacꞌal watxꞌ ton yaloni.
MEM
97 Yel xacꞌal chi cam jin cꞌul yin jin cuybꞌanil cha wakꞌa. Masanil tiempo chin naoꞌtane junjun cꞌu.
98 Naꞌan cꞌal ja chejbꞌanil wu, yuxan yel xacꞌal jelan jin yintaj ebꞌ chi jowi oc win.
99 Ecꞌbꞌan jin jelanil yintaj masanil ebꞌ cuynen jin, yutol caw chin naꞌ yin tzetyetal cha walaꞌ.
100 Yel xacꞌal tol chi naꞌcha el wu yintaj ebꞌ icham winaj, yutol jijem jin tet ja chejbꞌanil.
101 Ma yal jin cꞌul jix watoj jin bꞌa yin pena bꞌeybꞌale, yet watxꞌ jijem jin cꞌal yin ja kꞌane.
102 Ma cꞌal wiꞌel jin naꞌbꞌal yin tzet chi yal ja ley, yutol lalan jin ja cuyoni.
103 Jaꞌ ja kꞌane yel xacꞌal chiꞌ yintaj noꞌ yal awcabꞌ.
104 Yuxan caw jix wiꞌ jin naꞌbꞌal yin ja chejbꞌanil, yuxan cꞌam chi woche masanil pena bꞌeybꞌale.
NUN
105 Jaꞌ ja kꞌane jin tzejtebꞌal yeoc yet chin bꞌeyi, catuꞌ chi xꞌoxon jin bꞌe.
106 Jaach jin Diosal, jix wakꞌ jin tiꞌ ey jaach, yuxan sowalil oj jin jije wunen tzet chi walaꞌ. Yu jun tuꞌ, oj jin bꞌeybꞌalne ja ley, yutol jichan toni.
107 Jaach Jehová jin Diosal, yel xacꞌal tol chi cus jin cꞌul chi wabꞌe; akꞌ jin cawil, jaxca jix yun ja waloni.
108 Jaach jin Diosal, chi wal ey jaach tol cha chaꞌ jin watxꞌ kꞌane chi wal ey jaach yin masanil jin cꞌul, catuꞌ chin cuyon ja ley.
109 Caxcꞌal mi tol ey jin oc yul skꞌabꞌ camich, man yu oj tuꞌ, catuꞌ oj tojcan qꞌueycꞌulal ja kꞌane wu.
110 Jaꞌ ebꞌ pena snaꞌbꞌal, chi yaey yaal ebꞌ jin sattaj, ma cꞌaltaꞌ wintajne el ja chejbꞌanil.
111 Jaꞌ tzetyetal cha wal ey jin, jaꞌ chi waoc yipoj jin cꞌul masanil tiempo, yutol jaꞌ ja kꞌane chi akꞌon tzalabꞌoj jin cꞌul.
112 Tuxa jix waoc yin jin naꞌbꞌal jin jijen ja chejbꞌanil, masantaꞌcꞌal yet slawubꞌal.
SAMEC
113 Cꞌam chi woche ebꞌ ánima caabꞌ sat chi yute sbꞌa, yutol chin camcꞌulne cuybꞌanile cha wakꞌ ey jin.
114 Jaach ey jaach oc weneloj, jaꞌ ja win chin col jin bꞌa; jaꞌ ja kꞌane eyoc yipoj jin cꞌul.
115 Jaex penawom jex, elanwej jin cꞌatan, yutol asanne ẍejbꞌanil jin Diosal chi yoche jin cꞌul chin jije.
116 Jaach jin Diosal, akꞌ wip jaxca yalon ja kꞌane, yet watxꞌ cꞌam chi el jin qꞌuixwil yu tzet eyoc yipoj jin cꞌul.
117 Colwaan cꞌal wetoj yet watxꞌ chin colcha eloj, yutol caw chin tzala cꞌal jin jijen cuybꞌanile cha wakꞌ ey jin masanil tiempo.
118 Jix ja wintajne can el ebꞌ chi yiꞌel snaꞌbꞌal yin ja chejbꞌanil, yutol jaꞌ sjelanil ebꞌ yul yet, naꞌbꞌacꞌal toni.
119 Jaxca kꞌalem chi kꞌojle eloj, queytuꞌ yeoc ebꞌ penawom yul ja sat, jal jin jain tiꞌ, caw chin camcꞌulne masanil cuybꞌanile cha walaꞌ.
120 Jaꞌ jin mimanil chi bꞌilwi a ja sattaj, yutol chin xiw tet ja ley.
AYIN
121 Jaꞌ yin swatxꞌil cꞌal yin sjichanil chin bꞌey cꞌaltoj; cꞌam ojabꞌ chin ja bꞌejoc yul skꞌabꞌ ebꞌ chi jowi oc win.
122 Teyne jin cꞌal jain ja chejabꞌ jin tiꞌ; cꞌam ojabꞌ chin yetne ebꞌ ecꞌnaj chi yute sbꞌa.
123 Lalan yetex el jin sat yu jin majon ja jul yet chach jul jin ja coloni. ¿Bꞌakꞌin wal oj jin ja colel jaxca yalon ja kꞌane?
124 Watxꞌ ojabꞌ cꞌal chi yun jin ja camcꞌulnen jain ja chejabꞌ tiꞌ, jatacꞌalaꞌ jantaj ja watxꞌcꞌulal. Cuy jin cꞌal yin ja bꞌeybꞌal.
125 Akꞌ jin jelanil jain ja chejabꞌ jin tiꞌ, chi yoche jin cꞌul chi wotajne el tzetyetal cha walaꞌ.
126 Jaach Jehová jin Diosal, stiempoal xa ja waon oc syaꞌilal ebꞌ cꞌam chi jijen ja chejbꞌanil.
127 Jain tiꞌ, caw ey jin camcꞌulal yin ja chejbꞌanil, yintaj chꞌen oro yel xacꞌal watxꞌ yili,
128 yu jun tuꞌ, yuxan jijem jin cꞌal tet ja chejbꞌanil tuꞌ, jal masanil pena bꞌeybꞌale cꞌam chi woche.
PE
129 Qꞌueyubꞌtaj xacꞌal yoc ja kꞌane, yuxan chin jije tzet chi yalaꞌ.
130 Jaꞌ yet chi kocꞌ alnele el ja kꞌane, chi tzejtanenele jin naꞌbꞌal yu, chi cuycha el ebꞌ yeynajil ánima yu.
131 Chi yoche jin cꞌul ja chejbꞌanil, jaxca wal yochen jaꞌ junoj mactxequel ey stajin tiꞌal.
132 Il jintej, okꞌ ojabꞌ ja cꞌul win, jaxca ojabꞌ cha wute ja cꞌul yin ebꞌ chach camcꞌulneni.
133 Ijbꞌa jin yin ja bꞌeybꞌal, jaxca yalon ja kꞌane. Cꞌam ojabꞌ chin ja chaꞌ etex yu spenail.
134 Col jin el tet ebꞌ yaxkꞌainaj snaꞌbꞌal; chi yoche jin cꞌul chin jije ja chejbꞌanil.
135 Watxꞌ ojabꞌ yili jin bꞌeybꞌal jain ja chejabꞌ tiꞌ, catuꞌ chin ja cuyon yin ja bꞌeybꞌal.
136 Caw chi el yal jin sat wokꞌi, yutol cꞌam yeloc apnoj ja chejbꞌanil yul sat ebꞌ wet animail.
TZADE
137 Jaach jin Diosal, caw watxꞌ ton ja naꞌbꞌal, caw miman yeloc apnoj ja ley.
138 Masanil tzet cha walaꞌ, jichan toni, yuxan chi skeꞌ kaon oc yin cu cꞌul.
139 Chi tac xacꞌal el jin cꞌul yutol jaꞌ ebꞌ chi jowi oc win, jix too qꞌueycꞌulal ja kꞌane yu ebꞌ.
140 Jaꞌ tzet albꞌilcan ja wu, chi cꞌal yunne, yuxan ey cꞌal jin camcꞌulal ja win jain ja chejabꞌ jin tiꞌ.
141 Yeynajil ánima jin, intajnebꞌil jin el yu ebꞌ wet animail; caxcꞌal mi jaxca tuꞌ, man oj toj qꞌueycꞌulal ja chejbꞌanil wu.
142 Jaꞌ ja watxꞌilal ey cꞌaltaꞌ ecꞌoj, jaꞌ ja cuybꞌanil caw yel chi yalaꞌ.
143 Jaꞌ yet ey jin oc yin somcꞌulal yu junoj syaꞌilal caw chi tac jin cꞌul, jaxa ja chejbꞌanil chi akꞌon tzala jin cꞌul.
144 Jaꞌ tzet cha walaꞌ, caw jichan toni, aoc yin jin naꞌbꞌal yet watxꞌ chin iquisbꞌi cꞌal ecꞌoj.
COF
145 Jaach Jehová jin Diosal, yetoj masanil jin naꞌbꞌal chi walon jin bꞌa ey jaach, takꞌwan ey jin, yutol chi woche chin jije ja chejbꞌanil.
146 Jaꞌ ey jaach chi wal jin bꞌa; ocan wetoj xin, yet watxꞌ chin jije tzetyetal cha walaꞌ.
147 Jaꞌ yet cꞌamto chi kꞌinibꞌi, chin a waan jin kꞌanon ja colwal, yu chi waoc ja kꞌane yipoj jin cꞌul.
148 Jaꞌ yet cꞌam chi oc jin weyan yet akꞌbꞌalil, chin naoꞌtane ja kꞌane.
149 Jaach Jehová jin Diosal, ey ojabꞌ cꞌal oc ja txiquin ja wabꞌen tzet chi walaꞌ; akꞌ cꞌal jin cawil, jatacꞌalaꞌ ja watxꞌcꞌulal win.
150 Jaꞌ ebꞌ ánima chin ujten ecꞌoj lalan sjitzontej sbꞌa ebꞌ jin cꞌatan, jal yin ja chejbꞌanil xin, caw naat yeel snaꞌbꞌal ebꞌ.
151 Jal jaach, jaach jin Diosal, cawil ey jaach ecꞌoj, yel ton chi yal masanil ja chejbꞌanil.
152 Peyxa tax cꞌal jix wotajne el ja chejbꞌanil, tol jaach jix ja wa can ey yich ja ley tiꞌ.
REX
153 Il jintej xol jin yaꞌilal tiꞌ, catuꞌ chin ja colon eloj yutol cꞌam chi too qꞌueycꞌulal ja chejbꞌanil wu.
154 Colwaan cꞌal wetoj catuꞌ chin ja colon el yul skꞌabꞌ jin yaꞌilal, akꞌ jin kꞌinal, jaxca cꞌaltaꞌ yalon can ja kꞌane.
155 Jaꞌ ebꞌ pena sbꞌeybꞌal, cꞌam yalon yet ebꞌ ẍaꞌon ja colwal, yutol cꞌam chi yaoc scꞌul ebꞌ yin ja chejbꞌanil.
156 Jaach jin Diosal, caw miman yeoc ja watxꞌcꞌulal. Akꞌ jin kꞌinal, yutol caw watxꞌ ton ja naꞌbꞌal.
157 Caw ecꞌal ebꞌ chi jowi oc win, chi yoche ebꞌ chin yetne, jal jin jain tiꞌ cꞌam chi wiꞌel jin naꞌbꞌal yin tzetyetal cha walaꞌ.
158 Cꞌam chi woche ebꞌ ánima caabꞌ sat chi yute sbꞌa, yutol cꞌam chi sjije ebꞌ tzet chi yal ja kꞌane.
159 Jaach Jehová jin Diosal, yel xacꞌal chin camcꞌulne ja chejbꞌanil. Akꞌ cꞌal jin kꞌinal xin, yutol caw ey ja camcꞌulal win.
160 Jaꞌ ja kꞌane caw yel ton chi yalaꞌ. Jichan cꞌal masanil ja ley, cꞌam bꞌakꞌin chi lawi eyoj.
SIN
161 Jaꞌ ebꞌ mimej yaaw chin yujte ecꞌ ebꞌ, naꞌbꞌal cꞌal chin yujte ecꞌ ebꞌ yutol cꞌam jin penail, jal ja kꞌane ey cꞌal oc yin jin naꞌbꞌal.
162 Caw chi tzala jin cꞌul yetoj ja kꞌane, jaxca junoj mactxequel chi yamcha mimanoj stumin.
163 Cꞌam chi woche chi wal lekꞌtiꞌal kꞌane, yutol cꞌam chi ẍaꞌ jin cꞌul, asanne ja chejbꞌanil chin camcꞌulne.
164 Yin junjun txolan chi walon jin watxꞌ kꞌane ey jaach, yutol jichan cꞌal yalon ja ley.
165 Jaꞌ mactxequel chi camcꞌulnen ja chejbꞌanil tiꞌ, caw chi yakꞌ tzalabꞌoj scꞌul yetoj, catuꞌ cꞌam tzet chi akꞌon eyqꞌuey ebꞌ.
166 Jaach Jehová jin Diosal, lalan wechbꞌanen ja colwal, yutol lalan jin jijen ja chejbꞌanil.
167 Lalan jin jijen tzet albꞌilcan ja wu, yutol caw chin camcꞌulne ja chejbꞌanil.
168 Lalan jin jijen tzet cha walaꞌ, jaꞌton ja chejbꞌanil. Ja wotaj masanil jin bꞌeybꞌal.
TAW
169 Jaach Jehová jin Diosal, apnoj ojabꞌ oc yel waw ja sattaj, akꞌ tzꞌajna jin naꞌbꞌal jaxca yalon ja kꞌane.
170 Apnoj ojabꞌ oc jin txa ja sattaj; col jin eloj jaxca yalon can ja kꞌane.
171 Oj wal watxꞌ kꞌane ey jaach, yutol jaach jix jin ja cuy yin ja bꞌeybꞌal.
172 Oj jin bꞌitne junoj bꞌit yu tzet ja walnaj canoj, yutol jichan ton yeoc masanil ja chejbꞌanil.
173 Ey ojabꞌ cꞌal oc ja kꞌabꞌ win yet chin ja colon eloj, yutol caw chi waoc jin naꞌbꞌal yin ja chejbꞌanil.
174 Jaach Jehová jin Diosal, chi woche tol chin ja coloꞌ, yutol ey jin tzalacꞌulal yin masanil ja chejbꞌanil.
175 Chi woche tol cha wakꞌ cꞌal wiquisal, yet watxꞌ oj jin bꞌitnoj ey jaach. Oc ojabꞌ cꞌal ja watxꞌilal wetoj.
176 Jix jin qꞌueytoj jaxca junoj noꞌ meꞌ chi qꞌueytoj. Titan, sey jin ecꞌ jain ja chejabꞌ jin tiꞌ, yutol cꞌam chi too qꞌueycꞌulal ja chejbꞌanil wu.