2 Kalwej jaon Israel jon tiꞌ, tol jaꞌ scamcꞌulal Jehová ey cꞌal ecꞌ yin tobꞌalkꞌinal.

3 Yal ojabꞌ ebꞌ yakꞌomal xaambꞌal, tol jaꞌ scamcꞌulal Jehová ey cꞌal yin tobꞌalkꞌinal.

4 Kalwej jaon tol ey yeloc apnoj Jehová yul cu sat, tol jaꞌ scamcꞌulal Dios ey cꞌal yin tobꞌalkꞌinal.

5 Jaꞌ yet ey jin oc yin syaꞌilal jix jin kꞌan scolwal Jehová, jix yabꞌ tzet jix walaꞌ, catuꞌ jix jin scolon eloj.

6 Eyecꞌ Jehová wetoj. Cꞌam chin xiw yu tzet oj jin yute ebꞌ wet animail.

7 Eyecꞌ Jehová wetoj, yutol jin Colomal yeocoj, yuxan oj wil yeyqꞌuey ebꞌ cꞌam chin ocheni.

8 Yel xacꞌal watxꞌ tol chi kaoc Jehová yipoj cu cꞌul, yintaj pax tol jaꞌ ebꞌ ket animail chi kaoc yipoj cu cꞌul.

9 Yel xacꞌal watxꞌ tol chi kaoc Jehová yipoj cu cꞌul, yintaj pax tol jaꞌ ebꞌ yaaw chi kaoc yipoj cu cꞌul.

10 Jix joymo masanil nacionlaj win, jaꞌ yetoj yipal Jehová yuxan jix eyqꞌuey ebꞌ wu.

11 Jix cꞌal oc joyan ebꞌ winlaj, yetoj yipal Naj jix eyqꞌuey ebꞌ wu.

12 Jix oc cꞌal joyan ebꞌ winlaj jaxca noꞌ snoꞌal awcabꞌ, jaꞌ sjowal scꞌul ebꞌ jix tancan el jaxca junoj kꞌakꞌ eyoc yin teꞌ tajin qꞌuix. Jaꞌ yetoj yipal Jehová yuxan jix eyqꞌuey ebꞌ wu.

13 Caxcꞌal mi chi stenoc sbꞌa ebꞌ win yet watxꞌ chin telcꞌotoj yu ebꞌ snaꞌoni; cꞌam chin eyqꞌuey yu ebꞌ, yutol jaꞌ Jehová chin coloni.

14 Chin bꞌitni tet Jehová. Jaꞌ Naj chi akꞌon wip, yutol jin Colomal yeocoj.

15 Jaꞌ bꞌey sna ebꞌ ánima jijem, chi oc bꞌit yet tzalacꞌulal, yutol jix eyqꞌuey jowal yu ebꞌ. Caw qꞌueyubꞌtaj chi yun xꞌoxon yipalil Jehová.

16 Caw miman yeoc yipalil, jaꞌ yipalil tuꞌ caw qꞌueyubꞌtaj yoqui, jaꞌ chi akꞌon eyqꞌuey jowal.

17 Man oj jin camoj, yutol oj jin iquisbꞌoj ecꞌoj, yet watxꞌ oj walel tzet jix yun Naj win.

18 Caw miman tzꞌuum jix yaoc Naj win, ma yal scꞌul jix jin yaoc yul skꞌabꞌ camich.

19 Jajwej spuertail bꞌey chi octej ebꞌ jichan sbꞌeybꞌal; chi yoche jin cꞌul chi to wal yu diosalil tet Naj.

20 Jaꞌton jun spuertail bꞌey chi cu octoj sattaj Jehová; jaꞌ tituꞌ chi octoj ebꞌ jijem chi yute sbꞌa tet.

21 Chi wal yu diosalil ey jaach Jehová yu jix ja pajtze tzet chi wal ey jaach, yutol jin Colomal jaach.

22 Jaꞌ chꞌen chꞌen jix yintajne el ebꞌ waꞌnem na, jaꞌton jun tuꞌ yel miman yopiso jix oqui.

23 Queyton tuꞌ jix yute Jehová, yuxan caw chi qꞌueya cu cꞌul kiloni.

24 Jaꞌton jun cꞌual tiꞌ, jix eloc tzet naꞌbꞌil yu Jehová, yuxan chi cu tzala tinaniꞌ, yutol colchanaj jon xa.

25 Jaach Jehová jin Diosal, ocan tꞌanan kin jon. Colwaan ketoj jon, yet watxꞌ, watxꞌ cꞌal chi cu eloc jon.

26 Al-le ojabꞌ watxꞌ kꞌane tet Naj chejbꞌiltej yu Jehová. Chi kal watxꞌ kꞌane ey jex mac jex chex jul bꞌey stemplo Jehová tiꞌ.

27 Jaꞌ Jehová Dios toni, jaꞌ Naj chi akꞌon sajkꞌinal yin cu bꞌeybꞌal. Cu naꞌwejtej yetoj junoj kꞌin, catuꞌ chi kiꞌonwejtej teꞌ skꞌabꞌlaj teꞌ eyoc xaj, catuꞌ chi cu ecꞌwej joyoyoj yinlaj jun yet xaambꞌal.

28 Jaach jin Diosal, chi wal yu diosalil ey jaach, yutol jin Diosal jaach, catuꞌ chi walon watxꞌ kꞌane yu ja mimanbꞌilal.

29 Al-le ojabꞌ yu diosalil tet Jehová, yutol caw watxꞌ snaꞌbꞌal Naj; jaꞌ scamcꞌulal ey cꞌal ecꞌoj.