2 ¿Tzet yu, yuxan oj skꞌanle ebꞌ txꞌoj conobꞌal ey jon, bꞌeytuꞌ eyoc jun je Diosal tuꞌ?

3 Jaach cu Diosal, jaꞌ bꞌey satcan tuꞌ ey jaach ecꞌoj; jix ja waꞌne masanil tzet chi yoche ja cꞌul.

4 Jal sdiosal ebꞌ txꞌoj conobꞌal xin, ánima cꞌal chi waꞌneni, naꞌbꞌa oro, naꞌbꞌa plata cꞌal eloj.

5 Ey stiꞌ sdiosal ebꞌ tuꞌ, cꞌam chi skeꞌ skꞌanabꞌi. Ey sat, cꞌam chi skeꞌ yilwani.

6 Ey xiquin, cꞌam chi yabꞌe. Ey xaam, cꞌam chi skeꞌ sukꞌten sabꞌ junoj tzetyetal.

7 Ey skꞌabꞌ, cꞌam chi skeꞌ smitxꞌon tzetyetal. Ey yajan, cꞌam chi skeꞌ sbꞌeyecꞌoj, cꞌam pax chi skeꞌ skꞌanabꞌi.

8 Jaꞌ ebꞌ chi waꞌneni, cꞌal ebꞌ chi yaoc scꞌul yin wan tuꞌ, laan ebꞌ jaxca wan comon sdiosal tuꞌ.

9 Jex wet conobꞌ Israel, awej oc Jehová yipoj je cꞌul. Jaꞌ Naj chi oc ketoj catuꞌ chi cu scolon eloj.

10 Jex yalomal oc stiꞌ ebꞌ ánima tet Jehová, awej oc Jehová yipoj je cꞌul. Jaꞌ Naj chi oc ketoj, catuꞌ chi cu scolon eloj.

11 Mac jon tol miman yeloc apnoj Jehová yul cu sat, kawej oc Naj yipoj cu cꞌul. Jaꞌ Naj chi oc ketoj, catuꞌ chi cu scolon eloj.

12 Jaꞌ Jehová chi cu naꞌontej jaon tiꞌ, catuꞌ oj yakꞌon swatxꞌcꞌulal kibꞌan. Oj yakꞌ syaaxilal kibꞌan jaon Israel jon tiꞌ, oj yakꞌon swatxꞌcꞌulal yibꞌan ebꞌ yicꞌaal Aarón, jaꞌton ebꞌ yakꞌomal xaambꞌal ebꞌ ánima tet Dios.

13 Oj yakꞌon syaaxilal ey jon mac jon tol ey yeloc apnoj Naj yul cu sat, caxcꞌal miman keloc apnoj yin kopiso, ma yeynajil jon.

14 Jaꞌ ojabꞌ Jehová chi iꞌon a can sbꞌisil ebꞌ kuninal, cꞌal ebꞌ kitxiquin.

15 Jaꞌ ojabꞌ Jehová, Naj jix waꞌnen satcan cꞌal txꞌotxꞌ txꞌotxꞌ tiꞌ, yakꞌ ojabꞌ syaaxilal ey jon.

16 Jaꞌ Jehová ey yet satcan, jal txꞌotxꞌ txꞌotxꞌ tiꞌ jix yakꞌ yul cu kꞌabꞌ jaon ánima jon tiꞌ.

17 Jaꞌ ebꞌ camnajxa, eyxa ecꞌ ebꞌ bꞌey ey spixan ebꞌ camom, cꞌamxa chi skeꞌ yalon watxꞌ kꞌane ebꞌ tet Jehová.

18 Jal jon jaon tiꞌ xin, oj kal watxꞌ kꞌane tet Naj tinaniꞌ cꞌal yin tobꞌalkꞌinal.

¡Al-le ojabꞌ watxꞌ kꞌane tet Jehová!