Snaꞌbꞌaniltej Yet Jix Eltej Ebꞌ Israel Bꞌey Egipto
114
Jaꞌ yet jix eltej ebꞌ Israel bꞌey txꞌotxꞌ Egipto,jaꞌton ebꞌ yicꞌaal Jacob jix caey ecꞌ junoj tiempoal xol ebꞌ txꞌoj conobꞌal,
2 jaꞌ Judá jix oc can scalubꞌaloj Jehová, jaꞌ yin Israel jix yakꞌ yaawil.
3 Jaꞌ yet jix xꞌoxon sbꞌa Jehová tet jaꞌ Cajin Mar, eyman jix el jaꞌ tet. Jaꞌ jaꞌ miman Jordán jix meltzo jaꞌ yintaj.
4 Jaꞌ txꞌotxꞌ mimej wonan yetoj txꞌotxꞌ tzalquiltaj, jix a tꞌujlabꞌoj txꞌotxꞌ sattaj Naj jaxca noꞌ chiw, ma jaxca noꞌ yuneꞌ meꞌ.
5 ¿Tzet jix iꞌon jaꞌ mar, yuxan jix el jaꞌ? ¿Tzet jix iꞌon jaꞌ Jordán yuxan jix meltzo jaꞌ yintaj?
6 ¿Tzet jix iꞌon txꞌotxꞌ mimej wonan cꞌal txꞌotxꞌ tzalquiltaj, yuxan jix a tꞌujlabꞌoj txꞌotxꞌ jaxca noꞌ chiw, ma jaxca noꞌ yuneꞌ meꞌ?
7 Bꞌilwoj ojabꞌ a txꞌotxꞌ txꞌotxꞌ sattaj Jehová, Naj sDiosal Jacob.
8 Jaꞌton Naj jix iꞌon eltej jaꞌ jaꞌ sat jun chꞌen miman chꞌen, jaꞌ satlaj jun chꞌen miman chꞌen jix eltej jaꞌ snukꞌ jaꞌ, naabꞌ jaꞌ jix yun can oc chꞌen miman chꞌen tuꞌ yu Jehová.