2 Jix yabꞌ tzet jix jin kꞌan tet, yuxan oj wal jin bꞌa tet Naj yajbꞌan iquis jin ecꞌoj.

3 Jaꞌ camich jix jin mitxꞌon ey jaxca junoj yaal. Jix jul syaꞌilal camich win. Yel xacꞌal jix xiwa jin cꞌul yu bꞌiscꞌulal.

4 Catuꞌ jix walon jin bꞌa tet Jehová. Jix jin oc tean yin, yet chi yakꞌon waꞌxoj jin cꞌul.

5 Jaꞌ Jehová, caw jichan toni, caw chi okꞌ scꞌul kin. Jaꞌ cu Diosal, yel xacꞌal tol watxꞌ snaꞌbꞌal.

6 Jaꞌ chi teynen ebꞌ yeynajil. Jaꞌ yet lalanxa yel wip, jaꞌ Naj chin colon eloj.

7 Jaꞌ tinaniꞌ eyxa jin watxꞌcꞌulal chi wabꞌe, yutol caw chi okꞌ scꞌul Jehová win,

8 yutol jix jin scolel yul skꞌabꞌ camich, cꞌal tet okꞌilal, catuꞌ ma jin ẍaꞌ telcꞌotoj.

9 Yajbꞌan iquis jin to ecꞌoj, oj jin jije cꞌal tzet chi yalaꞌ.

10 Jix waoc Jehová yipoj jin cꞌul, caxcꞌal ey jin ecꞌ snan xol miman syaꞌilal, jix walon jaxca tiꞌ: Caw ecꞌal tujan tzet chin ioni, jin chi.

11 Yutol manxa iquis oj jin chi wabꞌe, yuxan jix walaꞌ tol masanil tzet chi yal ebꞌ ánima, cꞌam chi skeꞌ kaon oc yipoj cu cꞌul.

12 ¿Tzet oj wute jin pajtzen masanil swatxꞌcꞌulal Jehová jix yakꞌ ey jin?

13 Oj wiꞌtej yal uva yet chi wakꞌon yin ofrendail tet Naj, yu walon yu diosalil tet yutol jix jin scoleloj.

14 Sattaj masanil ebꞌ sconobꞌ Dios, oj jin jije wunen bꞌey jix wakꞌcan jin tiꞌ tet Naj.

15 Caw miman yeloc apnoj yul sat Jehová, yet chi cam junoj yuninal tol cꞌamxa spenail eyoc yin snaꞌbꞌal, catuꞌ jichan cꞌal sbꞌeybꞌal.

16 Jaach Jehová jin Diosal, jain ton ja chejabꞌ jin tiꞌ. Jaach jix jin ja colcan eloj, yuxan jajbꞌil jin xa tinaniꞌ.

17 Yin bꞌitalil oj yun wakꞌon jin xaambꞌal ey jaach, yu walon yu diosalil catuꞌ oj wakꞌon bꞌina ja bꞌi.

18 Jaach Jehová jin Diosal, sattaj masanil ebꞌ ja conobꞌ, oj wunen bꞌey jix wakꞌcan jin tiꞌ ey jaach,

19 jaꞌton bꞌey yamakꞌil ja templo snan xol conobꞌ Jerusalén.

¡Al-le ojabꞌ watxꞌ kꞌane tet Jehová!