Watxꞌ Yet Ebꞌ Ánima Ey Yeloc Apnoj Jehová Yul Sat
112
¡Al-le ojabꞌ watxꞌ kꞌane tet Jehová!Caw tzalacꞌulal yet ebꞌ ánima tol ey yeloc apnoj Jehová yul sat, yutol chi tzala scꞌul ebꞌ sjijen cuybꞌanile chi yakꞌ Dios.
2 Jaꞌ yicꞌaal ebꞌ watxꞌ snaꞌbꞌal, caw watxꞌ chi eloc ebꞌ, yutol oj akꞌle yopiso ebꞌ sat txꞌotxꞌ txꞌotxꞌ tiꞌ yu Jehová.
3 Caw miman bꞌeomal ey bꞌey sna ebꞌ, catuꞌ ey cꞌal ecꞌ swatxꞌilal yetoj ebꞌ.
4 Caw ey scamcꞌulal ebꞌ, yutol watxꞌ snaꞌbꞌal ebꞌ, jichan cꞌal sbꞌeybꞌal ebꞌ. Jaxca junoj tzejtebꞌal chi txeclo a xol kꞌejkꞌinal, queytuꞌ yeoc Dios yetoj ebꞌ ánima watxꞌ snaꞌbꞌal.
5 Jaꞌ ebꞌ watxꞌ snaꞌbꞌal, yetoj camcꞌulal chi yakꞌon junoj tzetyetal yin maanil, watxꞌ cꞌal chi yun yiꞌon bꞌey jantaj tzet chi xon ebꞌ, cꞌam cꞌal elkꞌan.
6 Yu jun tuꞌ, cꞌam bꞌakꞌin oj can ebꞌ yalan. Jaꞌ ebꞌ ánima watxꞌ snaꞌbꞌal, caw naatil oj naꞌletej ebꞌ.
7 Cꞌam bꞌakꞌin oj xiw ebꞌ tet junoj kꞌane tol ey smey, yutol yelcꞌulal chi yaoc Jehová ebꞌ yipoj scꞌul.
8 Cꞌam cꞌal bꞌey oj xiw niꞌoj ebꞌ, tucꞌal chi tzee ebꞌ yin scajat.
9 Bꞌejan cꞌal scꞌul ebꞌ scolwa tet ebꞌ mebꞌa. Ey cꞌal scamcꞌulal ebꞌ, tol oj bꞌinale ebꞌ yu swatxꞌ bꞌeybꞌal tuꞌ.
10 Jaꞌ ebꞌ pena snaꞌbꞌal, chi tit sjowal ebꞌ yet chi yilon ya can ebꞌ ánima watxꞌ snaꞌbꞌal. Chi scꞌuxey yee ebꞌ yu chichoncꞌulal, yuxan oj qꞌueyle can el ebꞌ. Jaꞌ tzet chi yoche ebꞌ ánima pena snaꞌbꞌal oj tancan eloj.