2 Yutol yel xacꞌal qꞌueyubꞌtaj yili masanil tzet waꞌnebꞌil yu Jehová. Jaꞌ mactxequel chi camcꞌulnen Jehová, chi snaꞌoꞌtane ebꞌ yibꞌan.

3 Caw sakꞌal yili masanil tzet jix swaꞌne Naj, yutol miman yeloc apnoj. Ey cꞌal ecꞌ swatxꞌcꞌulal.

4 Caw qꞌueyubꞌtaj yoc masanil tzet jix swaꞌne, cꞌam bꞌakꞌin chi too qꞌueycꞌulal ku.

Caw chi okꞌ scꞌul Jehová kin, yutol caw ey scamcꞌulal.

5 Jaꞌ Naj chi akꞌon sloꞌbꞌe masanil ebꞌ ey yeloc apnoj yul sat. Yutol naꞌan cꞌal yu bꞌey jix yakꞌ can stiꞌ tet ebꞌ.

6 Jaꞌ Naj chi txꞌoxon yil masanil ebꞌ conobꞌ, jantaj tzet qꞌueyubꞌtaj yili jix swaꞌne. Jix yakꞌon can txꞌotxꞌ xꞌotxꞌ ebꞌ txꞌoj conobꞌal bꞌey chi kaey ecꞌ ebꞌ.

7 Chi yun cꞌal tzet chi yal Naj, yutol jichan toni. Jaꞌ cuybꞌanile chi yakꞌa, chi skeꞌ kaon oc yipoj cu cꞌul,

8 yutol cꞌam bꞌakꞌin chi ecꞌ eloj. Jix yakꞌon can cuybꞌanile yin sjichanil, chi yun cꞌal tzet chi yalaꞌ.

9 Jix scol can el ebꞌ sconobꞌ; jaꞌ bꞌey jix yakꞌ can stiꞌ, ey cꞌal ecꞌ yin tobꞌalkꞌinal. Yutol jaꞌ Dios, Asanxane Ocoj, yutol yel xacꞌal tol ey smey.

10 Jaꞌ yichbꞌanil jelanil, tol ey ojabꞌ yeloc apnoj Jehová yul cu sat. Caw jelan chi eloc snaꞌbꞌal ebꞌ chi bꞌeybꞌalnen cuybꞌanile chi yakꞌ Jehová, caw ey snaꞌbꞌal chi eloc ebꞌ. Al-le ojabꞌ watxꞌ kꞌane tet Jehová.