2 Miman ton yeoc Jehová bꞌey tzalan Sión. Eyoc masanil ebꞌ conobꞌ yalan yopiso Naj.

3 Al-le ojabꞌ watxꞌ kꞌane tet Naj, miman yeloc apnoj sbꞌi Naj, caw ey smey, yutol Asanxane Ocoj.

4 Jaach jin Diosal, Rey jaach toni, masanil cꞌal chi skeꞌ ja wu, yutol cha woche sjichanil. Jaꞌ sjichanil cꞌal swatxꞌilal, jaꞌ jix ja wakꞌ ey jon jaon yicꞌaal jon Jacob tiꞌ.

5 Kalwej watxꞌ kꞌane tet Jehová cu Diosal, eyojonwej kaan bꞌey yajantaj Naj, yutol Asanxane Ocoj.

6 Jaꞌ Moisés cꞌal Aarón eecꞌ ebꞌ xol ebꞌ yakꞌomal xaambꞌal tet Dios. Jaꞌ Samuel eyecꞌ xol ebꞌ chi txali tet Dios. Jaꞌ ebꞌ chi yal sbꞌa tet Jehová chi takꞌwi tet ebꞌ ta chi skꞌan scolwal ebꞌ.

7 Jaꞌ Dios jix kꞌanabꞌ tet ebꞌ ánima xol jun miman topan asun, yet jix yalon can wan cuybꞌanile cꞌal wan chejbꞌanile jix yakꞌ tet ebꞌ, yet chi sjijen ebꞌ.

8 Jaach Jehová cu Diosal, jix jaach takꞌwi tet ebꞌ ja conobꞌ. Jix ja wakꞌ mimancꞌulal yibꞌan spenail ebꞌ, catuꞌ jix ja waon pax oc syaꞌilal yibꞌan ebꞌ yu spenail jix yun ebꞌ.

9 Jex wet conobꞌ, Kalwej watxꞌ kꞌane tet Jehová cu Diosal. Eyojonwej Kaan sattaj Naj bꞌey tzalan yet eyilal.

¡Jaꞌ Jehová cu Diosal Asanxane Ocoj!