Jix Eyqꞌuey Jowal Yu Jehová
98
Bꞌitnewej junoj acꞌ bꞌit tet Jehová,yutol caw qꞌueyubꞌtaj tzet jix yun Naj. Jaꞌ Naj jix cu colon el jaon sconobꞌ jon tiꞌ yetoj miman yipalil, yutol asanxane cꞌal oc yetoj sjichanil.
2 Jix xꞌoxel scolwal Jehová cꞌal sjichanil yul sat ebꞌ mimej conobꞌ.
3 Jix yun tzet jix yal ey jon jaon conobꞌ Israel jon tiꞌ, catuꞌ jix xꞌoxon scamcꞌulal ey jon. Masanil ebꞌ ánima bꞌey yul yibꞌankꞌinal tiꞌ, jix yil ebꞌ tol jix colwa cu Diosal ketoj.
4 Bꞌitnojonwej tet Jehová yin tzalacꞌulal, jantaj jon caan jon bꞌey sat txꞌotxꞌ tiꞌ. Kakꞌwej cu naꞌbꞌal cu bꞌitnen bꞌit tet Naj yin tzalacꞌulal.
5 Bꞌitnojonwej tet Jehová yetoj arpa, cꞌal yetoj wan mitxꞌkꞌabꞌe eyoc xꞌanil.
6 Bꞌitnojonwej yin tzalacꞌulal tet Jehová, yutol cu Reyal; bꞌitnojonwej yin cu xuon trompeta, cꞌal yin cu xuon noꞌ cacho.
7 Bꞌitnoj ojabꞌ jaꞌ mar yetoj masanil noꞌ noꞌ ey yul jaꞌ, bꞌitnoj ojabꞌ pax yul yibꞌankꞌinal tiꞌ yetoj masanil ebꞌ caan bꞌey.
8 Bꞌilwoj ojabꞌ a jaꞌ mimej jaꞌ. Jun laan ojabꞌ chi yun yel yaw txꞌotxꞌ mimej wonan yin tzalacꞌulal sattaj Jehová.
9 Yutol chi jul Jehová yakꞌon Yaawil yibꞌan txꞌotxꞌ txꞌotxꞌ tiꞌ. Jaꞌ Naj oj yakꞌ Yaawil yibꞌan conobꞌlaj bꞌey yul yibꞌankꞌinal tiꞌ, yin sjichanil cꞌal yin swatxꞌilal.